ପୁରୀ: ବୁଲା ଗାଈଗୋରୁଙ୍କ ନିୟନ୍ତ୍ରଣ ନିମନ୍ତେ ବୈଠକ ଅନୁଷ୍ଠିତ । ପୁରୀରେ ଚାଲିଥିବା ମୋ ଧାମ ମୋ ଗର୍ବ ଅଭିଯାନ ଅଧିନରେ ଗାଈଗୋରୁଙ୍କୁ ଉନ୍ନତ ସେବା ଯୋଗାଇ ଦେବାର ଲକ୍ଷ୍ୟ ରଖି ସହରରେ ଗାଈଗୋରୁଙ୍କ ଏଣେତେଣେ ବୁଲାବୁଲିକୁ ନିୟନ୍ତ୍ରଣ କରିବାକୁ ପୁରୀ ପୌରସଂସ୍ଥା ପକ୍ଷରୁ ପଦକ୍ଷେପ ଗ୍ରହଣ କରାଯାଇଛି ।
ଏ ସଂକ୍ରାନ୍ତୀୟ ଏକ ବୈଠକ ଜିଲ୍ଲାପାଳ ବଲୱନ୍ତ ସିଂଙ୍କ ଅଧ୍ୟକ୍ଷତାରେ ଜଗନ୍ନାଥ ବଲ୍ଲଭ ପ୍ରାଙ୍ଗଣ ପରିସରରେ ଅନୁଷ୍ଠିତ ହୋଇଛି । ଏଥିରେ ଗୋପାଳକ, ଗୋ ସୁରକ୍ଷାକାରୀ ଏବଂ ଆଦିତ୍ୟ ବାହିନୀର ସ୍ବେଚ୍ଛାସେବୀ ପ୍ରମୁଖ ଉପସ୍ଥିତ ଥିଲେ ।
ଗାଈଗୋରୁ ଯେପରି ବାହାରେ ବୁଲାବୁଲି ନକରନ୍ତି ଏଥିପ୍ରତି ସଂପୃକ୍ତ ଗୋପାଳକ ନଜର ରଖିବେ । ଆବଶ୍ୟକୀୟ ଗୁହାଳ କିମ୍ବା ପାଳିତ ଗାଈଗୋରୁଙ୍କ ସେବା କରିବାରେ ଅକ୍ଷମତା ପ୍ରକାଶ କଲେ ସଂପୃକ୍ତ ଗୋପାଳକ ଆସନ୍ତା ୧୫ ଦିନ ମଧ୍ୟରେ ଅବଗତ କଲେ ସେମାନଙ୍କ ଉପଯୁକ୍ତ ରକ୍ଷଣାବେକ୍ଷଣ ପ୍ରଶାସନ ପକ୍ଷରୁ କରାଯିବ ବୋଲି ଜିଲ୍ଲାପାଳ କହିଛନ୍ତି ।
ଏଥିପାଇଁ ପ୍ରତି ୨୦ ଜଣ ଗୋପାଳକ ନିମନ୍ତେ ଜଣେ ଗୋବଂଶ ସାଥୀ ନିଯୁକ୍ତ କରାଯାଇ ସଂପୃକ୍ତ ଗୋରୁଙ୍କ ବିଷୟରେ ତଥ୍ୟ ରଖାଯିବ । ଏପରିକି ସମସ୍ତ ଗାଈଗୋରୁଙ୍କ ଟ୍ରାକିଂ କରାଯାଇ କେଉଁ ପାଳକଙ୍କ ଗାଈ ବାହାରେ ବୁଲୁଛି ନଜର ରଖାଯିବ ।
ଆସନ୍ତା ଜାନୁୟାରୀ ପହିଲାରୁ ଗାଇଗୋରୁଙ୍କୁ ବାହାରକୁ ଛାଡୁଥିବା ବ୍ୟକ୍ତିଙ୍କ ବିରୁଦ୍ଧରେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ । ସହରରେ ୨୭୪ ଜଣ ଗୋପାଳକଙ୍କ ୨୩୩୪ ଗାଈଗୋରୁ ଥିବା ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ ଡ. ପ୍ରସନ୍ନ କୁମାର ପୃଷ୍ଟି ସୂଚନା ଦେଇଥିଲେ ।
ଗାଇଗୋରୁଙ୍କ ଆବଶ୍ୟକୀୟ ଚିକିତ୍ସା ନିମନ୍ତେ ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀଙ୍କ କାର୍ଯ୍ୟାଳୟ ପରିସରରେ ସ୍ବତନ୍ତ୍ର ଯତ୍ନକେନ୍ଦ୍ର ଖୋଲାଯିବ । ଗୋରୁମାନଙ୍କ ଉନ୍ନତ ଚିକିତ୍ସା ଓ ସେବା ଯୋଗାଇ ଦେବାକୁ ଆନୁଷଙ୍ଗିକ ବ୍ୟବସ୍ଥା କରାଯିବ ।
ମୃତ ଗାଈଗୋରୁଙ୍କ ଉଚିତ ସତ୍କାର କରିବା ପାଇଁ ପଦକ୍ଷେପ ନିଆଯାଇଛି ବୋଲି ଜିଲ୍ଲାପାଳ କହିଛନ୍ତି । ଗୋବର ସଂଗ୍ରହ ପାଇଁ ଗୋପାଳକ ମାନଙ୍କ ସହ ଆଲୋଚନା କରାଯାଇ ପୌରସଂସ୍ଥା ପକ୍ଷରୁ ପଦକ୍ଷେପ ନିଆଯିବ । ଏହି ଅବସରରେ ଅନ୍ୟମାନଙ୍କ ମଧ୍ୟରେ ପୌରସଂସ୍ଥା ନିର୍ବାହୀ ଅଧିକାରୀ ବିଜୟ କୁମାର ଦାସ, ଜିଲ୍ଲା ମୁଖ୍ୟ ପ୍ରାଣୀ ଚିକିତ୍ସାଧିକାରୀ ଡ. ପ୍ରସନ୍ନ କୁମାର ପୃଷ୍ଟି, ନୋଡାଲ ଅଧିକାରୀ ଡ.ଆଲୋକ ରଞ୍ଜନ ମିଶ୍ର ପ୍ରମୁଖ ଉପସ୍ଥିତ ଥିଲେ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
