ପୁରୀ: ରାଜ୍ୟରେ ବନ୍ୟା ପରିସ୍ଥିତି ଏବେ ନିୟନ୍ତ୍ରଣକୁ ଆସିଥିବା ବେଳେ ପୁରୀ ଜିଲ୍ଲାରେ ଆରମ୍ଭ ହୋଇଛି ବନ୍ୟା ପରବର୍ତ୍ତୀ ସ୍ଥିତି ସମୀକ୍ଷା । ଜିଲ୍ଲାରେ ବନ୍ୟା ଜଳ ଛାଡିବା ପରେ ଏବେ ସ୍ଥିତି ସମୀକ୍ଷା କରିଛନ୍ତି ଜିଲ୍ଲା ପ୍ରଶାସନ । ଏହି ସମୟରେ ଦେଖାଯାଇଛି କି ବନ୍ୟା ଜଳ ଛାଡିବା ପରେ ଜିଲ୍ଲାର ବିଭିନ୍ନ ସ୍ଥାନରେ ଫସଲ ନଷ୍ଟ ହେବାରୁ ଚିନ୍ତାରେ ପଡିଛି ଚାଷୀକୂଳ । ଏନେଇ ସମୀକ୍ଷା ସମୟରେ କ୍ଷତିଗ୍ରସ୍ତ ହୋଇଥିବା ଚାଷ ଜମି ସମେତ ବିଭିନ୍ନ ପନିପରିବା ଚାଷର କ୍ଷତି ଆକଳନ ଜାରି ରହିଛି ।
ଜିଲ୍ଲା କୃଷି ଓ ରାଜସ୍ବ ବିଭାଗ ମିଳିତ ଭାବେ ଏହି ସର୍ଭେ କରୁଥିବା ଜଣା ପଡିଛି । ସେପଟେ ସହାକାରୀ କୃଷି ଅଧିକାରୀ କ୍ଷେତ୍ର ପରିଦର୍ଶନ କରୁଛନ୍ତି । ଚୂଡାନ୍ତ କ୍ଷୟକ୍ଷତି ରିପୋର୍ଟ ଆସିବା ପରେ କ୍ଷତି ସହିଥିବା ଚାଷୀଙ୍କୁ ରାଜ୍ୟ ସରକାରଙ୍କ ଘୋଷଣା ଅନୁଯାୟୀ ସହାୟତା ଦିଆଯିବ। ତେବେ ବନ୍ୟା ଯୋଗୁଁ ବ୍ୟାପକ ଫସଲ ହାନି ହୋଇଛି । ବିଶେଷ କରି ଧାନ ଓ ପନିପରିବା ଚାଷୀ ବ୍ୟାପକ କ୍ଷତି ସହିଛନ୍ତି । ତେଣୁ ତୁରନ୍ତ ଚାଷୀଙ୍କ କ୍ଷତି ଆକଳନ କରାଯାଇ କ୍ଷତି ପୂରଣ ଦେବାକୁ ଚାଷୀ ଦାବି କରିଛନ୍ତି ।
ସୂଚନା ଅନୁଯାୟୀ ପୁରୀ ଜିଲ୍ଲାର ମୋଟ 11ଟି ବ୍ଲକରୁ 7ଟି ବ୍ଲକ ବନ୍ୟା ଦ୍ବାରା ପ୍ରଭାବିତ ହୋଇଛି । ପିପିଲି, କଣାସ, ଡେଲାଙ୍ଗ, ନିମାପଡା ଓ ଗୋପ ଆଦି ଅଞ୍ଚଳରେ ବ୍ୟାପକ ଚାଷ ଜମି ଦୟା, ରାଜୁଆ, କୁଶଭଦ୍ରା, ଭାର୍ଗବୀ ଓ ଧନୁଆ ନଦୀର ବନ୍ୟା ଜଳ ଯୋଗୁଁ କ୍ଷତିଗ୍ରସ୍ତ ହୋଇଥିଲା।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
