ପୁରୀ: ସୁଧାରି ପାରିଲାନି ସୁପ୍ରିମକୋର୍ଟଙ୍କ ଛାଟ । ଏବେବି ଶ୍ରୀମନ୍ଦିରରେ ଶ୍ରଦ୍ଧାଳୁଙ୍କ ଠାରୁ ଦକ୍ଷିଣା ଆଦାୟ ନେଇ ଭକ୍ତଙ୍କୁ ଦୁର୍ବ୍ୟବହାର ସାମ୍ନା କରିବାକୁ ପଡୁଛି । ଏମିତି ଘଟଣା ଘଟିଛି ଶ୍ରୀମନ୍ଦିର ସିଂହଦ୍ବାର ସମ୍ମୁଖରେ । ଶ୍ରୀମନ୍ଦିରକୁ ଆସିଥିବା ଜଣେ ଭକ୍ତଙ୍କ ଠାରୁ ଅଣ ସେବାୟତ ଜୋର ଜବରଦସ୍ତ ଦକ୍ଷିଣା ଆଦାୟକୁ ନେଇ ସିଂହଦ୍ବାର ସମ୍ମୁଖରେ ଗଣ୍ଡଗୋଳ ଘଟିଛି ।
ଘଟଣାକୁ ନେଇ ଉଭୟଙ୍କ ମଧ୍ୟରେ ବଚସା ଓ ହାତାହାତି ପରେ ମୁତୟନ ଜେଟିପି ପୋଲିସକୁ ଡକାଇ ଉକ୍ତ ଅଣସେବାୟତଙ୍କୁ ଜିମା ଦେଇଛନ୍ତି । ଅଭିଯୋଗ ଅନୁସାରେ ଜଣେ ଶ୍ରଦ୍ଧାଳୁ ନିଜ ପରିବାର ନେଇ ଶ୍ରୀମନ୍ଦିର ବୁଲିବାକୁ ଆସିଥିବା ବେଳେ ଅଣସେବାୟତ ଜଣକ ଦର୍ଶନ ଓ ଭୋଗ କରାଇଦେବା କହି ଜୋର ଜବରଦସ୍ତ ଭକ୍ତଙ୍କ ପକେଟରୁ ଟଙ୍କା ନେଇଯାଇଥିଲେ।
ଏହାର ପ୍ରତିବାଦ କରିବାରୁ ଅଣସେବାୟତ ଜଣଙ୍କ ଖରାପ ଭାଷାରେ ଗାଳି ଗୁଲଜ କରିଥିଲେ । ଯାହାକୁ ନେଇ ଉଭୟ ଙ୍କ ମଧ୍ୟରେ ଗଣ୍ଡଗୋଳ ହୋଇଥିଲା। ସେପଟେ ଅଣସେବାୟତଙ୍କୁ ଅଟକ ରଖି ପଚରାଉଚରା କରୁଛି ପୋଲିସ । ତେବେ ଅଟକ ଥିବା ବ୍ୟକ୍ତିଙ୍କ ପରିଚୟ ଜଣା ପଡିନଥିବା ବେଳେ ପୋଲିସ ଘଟଣାର ତଦନ୍ତ କରୁଛି।
ଘଟଣାରେ ସତ ପ୍ରମାଣିତ ହେଲେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ପୋଲିସ କହିଛି। ଅନ୍ୟପଟେ ଏହି ଘଟଣାକୁ ଜଗନ୍ନାଥପ୍ରେମୀ ଓ ଭକ୍ତ ମହଲରେ ତୀବ୍ର ଅସନ୍ତୋଷ ସୃଷ୍ଟି ହୋଇଛି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
