ପୁରୀ: ରାଜ୍ୟରେ ଦିନକୁ ଦିନ ବେକାରୀ ସମସ୍ୟା ବଢ଼ି ଚାଲିଛି । ବିଜେଡି ସରକାର ଯୁବକମାନଙ୍କୁ ନିଯୁକ୍ତି କଥା କହୁଥିବା ବେଳେ ଏହା ଧୂଆଁ ବାଣରେ ପରିଣତ ହୋଇଥିବା କଂଗ୍ରେସ ଅଭିଯୋଗ କରିଛି । ଯାହାକୁ ନେଇ ଯୁବଗୋଷ୍ଠୀଙ୍କ ମଧ୍ୟରେ ରାଜ୍ୟ ସରକାରଙ୍କ ଉପରେ ଅସନ୍ତୋଷ ବଢିବାରେ ଲାଗିଛି । ଗରୀବ ଲୋକଙ୍କୁ ଆବାସ ଯୋଜନାରେ ଟଙ୍କା ମଗା ଯାଉଛି । ଗରିବ ଲୋକଙ୍କୁ ଟଙ୍କା ନଦେଇ ପାରିଲେ ଆବାସ ଯୋଜନାରୁ ବଞ୍ଚିତ କରାଯାଉଥିବା ବେଳେ ଦଳୀୟ ଆଧାରରେ ବିଜେଡ଼ିର କର୍ମୀ ଓ ନେତାଙ୍କୁ ଆବାସ ଘର ପ୍ରଦାନ କରାଯାଉଛି । ବ୍ଳକ୍ରୁ ପଞ୍ଚାୟତ ଯାଏ ବିଜେଡ଼ିର କୁଜି ନେତା ନିଜର ରାଜ୍ ଚଳାଉଥିବା କଂଗ୍ରେସର ଅଭିଯୋଗ । ଏହାକୁ ନେଇ ପୁରୀ ସଦର ବ୍ଲକ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିଛି କଂଗ୍ରେସ ।
ଏହିଭଳି ବହୁ ସମସ୍ୟାକୁ ନେଇ ପୁରୀ ଜିଲ୍ଲା କଂଗ୍ରେସ ପକ୍ଷରୁ ପୁରୀ ସଦର ବ୍ଳକ ଅଫିସ ଘେରାଉ କରାଯାଇଛି । ବ୍ଳକ୍ ଅଫିସ୍ରେ ବ୍ୟାପକ ଦୁର୍ନିତୀ, ପିସି କାରବାର ସମେତ ନାରୀ ନିର୍ଯାତନା ବୃଦ୍ଧି, ଦରଦାମ ବୃଦ୍ଧି, ଟାଟା ପାୱାର ବିଲ୍ ଆଦାୟ କରିବା ଆଳରେ ଜୁଲୁମ, ଚାଷୀ ମାରଣ ନୀତି, ଶ୍ରୀମନ୍ଦିର ରତ୍ନ ଭଣ୍ଡାର ଓ ଚାରି ଦ୍ଵାର ସରକାର ନଖୋଲିବା ଆଦି ଏକାଧିକ ପ୍ରସଙ୍ଗକୁ ନେଇ ପୁରୀ ଜିଲା କଂଗ୍ରେସ ପକ୍ଷରୁ ଆଜି ପୁରୀ ସଦର ବ୍ଳକ ଘେରାଉ କରାଯାଇଛି । ପୁରୀ ଜିଲ୍ଲା କଂଗ୍ରେସର ସଭାପତି ଜୟ ନାରାୟଣ ପଟ୍ଟନାୟକଙ୍କ ନେତୃତ୍ୱରେ ଏକ ପ୍ରତିବାଦ ସଭା ଆୟୋଜନ କରାଯାଇଥିଲା । ବରିଷ୍ଠ କଂଗ୍ରେସ ନେତା ଶିବାନନ୍ଦ ରାୟ, ବିନାୟକ ଦାସମହାପାତ୍ର, ଯୁବ ନେତା ସୁଜିତ୍ ମହାପାତ୍ର, ଅମରେନ୍ଦ୍ର ପାଇକରାୟ, ସ୍ଵାଧୀନ ପଣ୍ଡା, ବିଶ୍ଵନାଥ ଦାସ ଏବଂ କଂଗ୍ରେସର ଅନେକ କର୍ମୀ ଏହି ଘେରାଉ କାର୍ଯକ୍ରମରେ ସାମିଲ ହୋଇଥିଲେ ।
ଏହା ମଧ୍ୟ ପଢନ୍ତୁ....ଓଡିଶାରେ କେନ୍ଦ୍ର ଅର୍ଥ ମନ୍ତ୍ରୀ, ଦେଖନ୍ତୁ ପୁରୀ ଗସ୍ତ ସମୟର ଫଟୋ
ରାଜ୍ୟରେ ମହିଳାଙ୍କ ବିରୋଧରେ ନିର୍ଯାତନା ବୃଦ୍ଧି ପାଉଛି । ମାମଲା ରୁଜୁ ହେଲେ ବି ନିର୍ଯାତନା ପୀଡ଼ିତା ନ୍ୟାୟ ପାଇବାରୁ ବଞ୍ଚିତ ହେଉଛନ୍ତି । ବିଜେଡିର ନେତାମାନେ ଥାନାରେ ହସ୍ତକ୍ଷେପ କରି ଅଭିଯୁକ୍ତଙ୍କୁ ସୁରକ୍ଷା ଦେଉଛନ୍ତି । ଚାଷୀଙ୍କୁ ଠିକ୍ ଭାବେ ସାର ବିହନ ମିଳୁନାହିଁ । ଫଳରେ ଚାଷୀ ଆଜି ବଜାରରୁ ଚଢ଼ା ଦରରେ ସାର, ବିହନ କିଣି ଆର୍ଥିକ କ୍ଷତିର ସମ୍ମୁଖୀନ ହେଉଛିନ୍ତି । ଟାଟା କମ୍ପାନୀ ଦିନ କୁ ଦିନ ବିଦ୍ୟୁତ୍ ବିଲ ବଢାଇ ଚାଲିଥିବା ବେଳେ ଗରିବ ଲୋକଙ୍କୁ ମୋଟା ଅଙ୍କର ଫାଇନ କାଟି ଶୋଷଣ କରୁଛି । ବିଦ୍ୟୁତ୍ ସେବା ଉନ୍ନତି କରିବା ବଦଳରେ ଲୋକଙ୍କୁ ଅଧିକ ବିଲ କରି ଶୋଷଣ କରୁଥିବା ଆଜି ପ୍ରତିବାଦ ସଭାରେ ଅଭିଯୋଗ କରିଛନ୍ତି ପୁରୀ କଂଗ୍ରେସ ।
ଶ୍ରୀମନ୍ଦିର 4 ଦ୍ଵାର ଭକ୍ତଙ୍କ ପାଇଁ ବନ୍ଦ ଥିବାରୁ ଲାଇନ୍ରେ ଘଣ୍ଟା ଘଣ୍ଟା ଧରି ଠିଆ ହୋଇ କଷ୍ଟ ପାଉଛନ୍ତି ଭକ୍ତ । ସେହିପରି ରତ୍ନ ଭଣ୍ଡାର ଅବସ୍ଥା ଖରାପ ଥିବା ବେଳେ ଏହାର ଯାଞ୍ଚ ପାଇଁ ସରକାର କୌଣସି ପଦକ୍ଷେପ ନେଇନାହାନ୍ତି । ଏଣୁ ଏହି ସବୁ ଜନ ବିରୋଧୀ ନୀତିକୁ ବିରୋଧ କରି ବ୍ଳକ ଅଫିସ ଘେରାଉ କରାଯାଇଥିବା ପୁରୀ ଜିଲା କଂଗ୍ରେସ ପକ୍ଷରୁ କୁହାଯାଇଛି ।
ଇଟିଭି ଭାରତ, ପୁରୀ
