ପୁରୀ: ଶ୍ରୀମନ୍ଦିର ଆନନ୍ଦ ବଜାରରେ ଫଟୋ ଭାଇରାଲ ଘଟଣା । ଉକ୍ତ ଘଟଣାର ତଦନ୍ତ ପରେ ପୋଲିସ ମୁଖ୍ୟ ଅଭିଯୁକ୍ତ ଦେବାଶିଷ ସିଂକୁ ଗିରଫ କରିଛି ।
ସୂଚନାନୁସାରେ, ଆନନ୍ଦବଜାରରେ ଫଟୋ ଭାଇରାଲ ଘଟଣାକୁ ନେଇ ଶ୍ରୀମନ୍ଦିର କାର୍ଯ୍ୟାଳୟ ପକ୍ଷରୁ ସିଂହଦ୍ବାର ଥାନାରେ ମାମଲା ରୁଜୁ ହୋଇଥିଲା । ଏହା ପରେ ପୋଲିସ ପୁରୀ କୁମ୍ଭାରପଡାର ଦେବାଶିଷ ସିଂ ଏବଂ ନୟାଗଡ ଫତେଗଡର ରାଜା ଦଳେଇଙ୍କୁ ଅଟକ ରଖି ପଚରାଉଚରା କରୁଥିଲା । ଗିରଫ ଦେବାଶିଷ ଉକ୍ତ ଫଟୋକୁ ନିଜ ହ୍ବାଟସଆପର ପ୍ରଫାଇଲ ଫଟୋରେ ରଖିଥିଲେ । ତେବେ ସେ କିଭଳି ମୋବାଇଲ ଫୋନ ଶ୍ରୀମନ୍ଦିର ଭିତରକୁ ନେଇ ସେଲଫି ନେଇଥିଲା ସେ ନେଇ ପୋଲିସ ମନ୍ଦିରର ସିସିଟିଭି ଫୁଟେଜ ଅନୁଧ୍ୟାନ କରୁଛି ।
ରବିବାର ଶ୍ରୀମନ୍ଦିର ଆନନ୍ଦ ବଜାର ମଧ୍ୟରେ କିଛି ଲୋକ ପ୍ରସାଦ ସେବନ କରୁଥିବା ଫଟୋ ଭାଇରାଲ ହୋଇଥିଲା । ମନ୍ଦିରରେ କଡା ସୁରକ୍ଷା ବ୍ୟବସ୍ଥା ଭିତରେ କିଭଳି ମୋବାଇଲ ଭିତରକୁ ଗଲା ତାକୁ ବିଭିନ୍ନ ମହଲରେ ପ୍ରଶ୍ନ ଉଠିଥିଲା । ଏଥିସହିତ ପୋଲିସ ପ୍ରଶାସନ ଶ୍ରୀମନ୍ଦିର ସୁରକ୍ଷା ନେଇ ସମ୍ବେଦନଶୀଳ ନଥିବା ଅଭିଯୋଗ ହୋଇଥିଲା । ଉକ୍ତ ଘଟଣା ପରେ ଆଗାମୀ ଦିନରେ 4 ଦ୍ବାରରେ ଚେକିଂ ବ୍ୟବସ୍ଥାକୁ କଡାକଡି କରାଯିବ ବୋଲି ଶ୍ରୀମନ୍ଦିର ଡ୍ୟୁଟିରେ ଥିବା ପୋଲିସ କର୍ମଚାରୀଙ୍କୁ ନିର୍ଦ୍ଦେଶ ଦିଆଯାଇଥିବା ପୁରୀ ଏସପି କହିଛନ୍ତି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
