ଭୁବନେଶ୍ବର: ବାତ୍ୟା ଫନି ବିଧାରେ ଚୁରମାର ହୋଇଯାଇଛି ଶ୍ରେଣୀ ଗୃହ । ତଳେ ପଡିଛି ଶ୍ରେଣୀ ଗୃହ କାନ୍ଥ । ବର୍ଷା ପାଣି ଖାଉଛି ବ୍ଲାକବୋର୍ଡ । ଏପରି ଦୃଶ୍ୟ ଦେଖିବାକୁ ମିଳିଛି ଖୋଦ ଗଣଶିକ୍ଷା ମନ୍ତ୍ରୀ ସମୀର ଦାସଙ୍କ ନିର୍ବାଚନ ମଣ୍ଡଳୀରେ । ନିମାପଡା ବ୍ଲକ ଧନୁଆ ପଞ୍ଚାୟତର ପ୍ରାଥମିକ ଓ ଉଚ୍ଚ ବିଦ୍ଯାଳୟରେ ଏପରି ଅବସ୍ଥା ଶିକ୍ଷା ବ୍ୟବସ୍ଥାର ଉଜୁଡା ଚିତ୍ରକୁ ପଦାରେ ପକାଇଛି ।
ଏପଟେ ବିଦ୍ୟାଳୟ ଶୁକ୍ରବାର ଖୋଲିଥିଲେ ମଧ୍ୟ ଛାତ୍ରଛାତ୍ରୀ ମାନେ ବାତ୍ୟା ଆଶ୍ରୟ ସ୍ଥଳୀରେ ପଢୁଛନ୍ତି । ‘ଫନି’ ମାଡକୁ ଇତି ମଧ୍ଯରେ ଦେଢମାସ ବିତିଛି । ତେବେ ଏପର୍ଯ୍ୟନ୍ତ ମଧ୍ୟ ବିଦ୍ୟାଳୟର ମରାମତି ହୋଇନାହିଁ ଏବଂ ପିଲାମାନେ ବିଦ୍ୟାଳୟ ବଦଳରେ ଆଶ୍ରୟ ସ୍ଥଳରେ ପଢୁଛନ୍ତି । ଯାହା ଶିକ୍ଷା ବିଭାଗର ପାରିବାପଣିଆକୁ ଅଙ୍ଗୁଳି ଉଠାଇଛି ।
ବିଦ୍ୟାଳୟ ଖୋଲିବା ପୂର୍ବରୁ ଗଣଶିକ୍ଷା ମନ୍ତ୍ରୀ କହିଥିଲେ ଯେ ସବୁ ବିଦ୍ୟାଳୟ ଠିକ୍ ରହିଛି । ଯେଉଁ ବିଦ୍ୟାଳୟ ଠିକ୍ ନାହିଁ ସେଠାକାର ଛାତ୍ରଛାତ୍ରୀଙ୍କୁ ପାଖ ବିଦ୍ୟାଳୟକୁ ନିଆଯିବାକୁ ଯୋଜନା ହୋଇଛି । ତେବେ ମନ୍ତ୍ରୀଙ୍କ ମୁହଁଫୁଟାଣି ତାଙ୍କ ନିର୍ବାଚନ ମଣ୍ଡଳୀରେ ଶିକ୍ଷାର ଦୟନୀୟ ଚିତ୍ର ଦେଖିଲେ ବାରି ହୋଇପଡୁଛି ।
ଭୁବନେଶ୍ବରରୁ ତାପସ ପରିଡା, ଇଟିଭି ଭାରତ
