ପୁରୀ: ଚତୁର୍ଥ ଦିନରେ ପହଞ୍ଚିଛି ଏମାର ମଠର ଉଚ୍ଛେଦ ପ୍ରକ୍ରିୟା। ପ୍ରଶାସନ ପାଇଁ ଅଡୁଆ ବଢାଉଛନ୍ତି ମହନ୍ତ । ଏମାର ମଠର ମହନ୍ତ ରାଜ ଗୋପାଳ ରାମାନୁଜ ଦାସ, ମୁଖ୍ୟ ମଠରୁ ବାହାରିବାକୁ ନାରାଜ। ଯାହା ଫଳରେ ପୁରୁଣା ଗୃହ ଭାଙ୍ଗି ପାରିନି ପ୍ରଶାସନ ।
ପ୍ରଶାସନ ବିନା ଆଲୋଚନାରେ ରଘୁନନ୍ଦନ ଲାଇବ୍ରେରୀକୁ ଭାଙ୍ଗିଛି । ଯାହାର ବିରୋଧ କରି ପ୍ରତିବାଦ କରୁଛନ୍ତି ମହନ୍ତ। ଅନ୍ୟପଟେ ପୁରୀ ଅତିରିକ୍ତ ଜିଲ୍ଲାପାଳ ଏହାକୁ ଖଣ୍ଡନ କରିଛନ୍ତି। ସେ କହିଛନ୍ତି, ଏମାର ମଠ ମହନ୍ତଙ୍କ ସହିତ ସମସ୍ତ ପ୍ରକାର ଆଲୋଚନା ସରିଛି। ତାଙ୍କୁ ମଠ ନିକଟରେ ରହିବା ପାଇଁ ଏକ କଣ୍ଟେନର ଗୃହ ଯୋଗାଇ ଦିଆଯିବାର ମଧ୍ୟ ବ୍ୟବସ୍ଥା ହୋଇଛି।
ମଠ ମହନ୍ତ ଓ ତାଙ୍କ ଶିଷ୍ୟ ସେଠାରେ ରହି ପାରିବେ। ମଠର ମନ୍ଦିରକୁ ଭଙ୍ଗାଯିବ ନାହିଁ। ସେମାନେ ସେଠି ରହି ମନ୍ଦିରର ପୂଜାର୍ଚ୍ଚନା କରିବେ। ପରବର୍ତ୍ତୀ ସମୟରେ ପ୍ରଶାସନ ମହନ୍ତଙ୍କ ପାଇଁ ଥଇଥାନର ବ୍ୟବସ୍ଥା କରିବ।
ଅନ୍ୟପଟେ ମଠ ମହନ୍ତ ମୁଖ୍ୟ ମଠ ଗାଦି ନଛାଡିବା ନେଇ ଚର୍ଚ୍ଚା ବଢିବାରେ ଲଗିଛି। ମଠ ତଳେ ଅନେକ ଦୁର୍ମୂଲ୍ୟ ଜିନିଷ ତଥା ସୁନା, ହୀରା ଆଦି ସାମଗ୍ରୀ ଥାଇ ପାରେ ବୋଲି ମଧ୍ୟ ଚର୍ଚ୍ଚା ହେଉଛି। ଯେଉଁ କାରଣରୁ ମହନ୍ତ ମଠ ଛାଡୁ ନାହାନ୍ତି।
ଏଠାରେ ସୂଚନାଯୋଗ୍ୟ, ପୁର୍ବରୁ ଏହି ମଠରୁ 2011 ମସିହାରେ 5 ଶହରୁ ଅଧିକ ରୁପା ଇଟା ବାହାରି ଥିଲା । ରାଜ୍ୟର ଏକ ଧନୀଶାଳୀ ମଠ ଭାବେ ଏମାର ମଠ ପରିଗଣିତ । ଏଣୁ ମଠ ତଳେ ଆହୁରି ଭୂତଳ ଗୃହ ଥିବା ବେଳେ ଅନେକ ମୂଲ୍ୟବାନ ସାମଗ୍ରୀ ଥିବା ଚର୍ଚ୍ଚା ହେଉଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
