ପୁରୀ: ଅସ୍ତରଙ୍ଗ ଥାନା ଅଧିନ ପାଟସୁନ୍ଦରପୁର ଗାଁରେ ଅଭାବନୀୟ ଘଟଣା । ଛେଳି ଉପରେ ଗାଡି ମାଡିଯିବାକୁ କେନ୍ଦ୍ର କରି ଛୁରାମାଡ ଭଳି ସାଙ୍ଘାତିକ ଘଟଣା ଘଟିଛି । ଘଟଣାସ୍ଥଳରେ ଛେଳି ଜଗୁଆଳିର ମୃତ୍ୟୁ ହୋଇଛି । ଘଟଣାରୁ ଜଣାପଡିଛି ଯେ, ଅକ୍ଷୟ ଦାସ ନାମକ ଜଣେ ଛେଳି ଜଗୁଆଳି ରାସ୍ତାରେ ଛେଳି ଚରାଉଥିବା ସମୟରେ ସେହି ବାଟଦେଇ ରାଜୁ ଦାସ ନାମକ ବ୍ୟକ୍ତି ବାଇକରେ ଆସୁଥିବା ବେଳେ ଗୋଟିଏ ଛେଳିକୁ ଧକ୍କା ଦେଇଥିଲା ।
ପରେ ଉଭୟଙ୍କ ମଧ୍ୟରେ ବଚସା ହୋଇଥିଲା । ବଚସା ପରେ ରାଜୁ ଗ୍ରାମକୁ ଯାଇ ତା’ର ଦୁଇ ସହଯୋଗୀଙ୍କୁ ଆଣି ପୁଣି ଅକ୍ଷୟଙ୍କ ସହିତ ବଚସା କରିଥିଲା । ବଚସା ଏତେ ମାତ୍ରାରେ ଉଗ୍ରରୂପ ନେଲା ଯେ ବାଇକ ଚାଳକ ରାଜୁ ରାଗରେ ଛେଳିଚରାଳୀଙ୍କ ପେଟରେ ଛୁରାମାଡ କରିଥିଲେ । ଛେଳି ଜଗୁଆଳିଙ୍କ ଘଟଣାସ୍ଥଳରେ ମୃତ୍ୟୁ ଘଟିଥିଲା । ଖବର ପାଇଁ ଅସ୍ତରଙ୍ଗ ପୋଲିସ ଘଟଣା ସ୍ଥାନରେ ପହଞ୍ଚିବା ପୂର୍ବରୁ ଅଭିଯୁକ୍ତ ଫେରାର ହୋଇଯାଇଥିଲା । ତେବେ ଘଟଣାସ୍ଥଳରୁ ମୃତଦେହ ଜବତ କରି ତଦନ୍ତ ଚଳାଇଛନ୍ତି ଅସ୍ତରଙ୍ଗ ପୋଲିସ । ସ୍ଥାନୀୟ ଅଞ୍ଚଳରେ ଉତ୍ତେଜନା ଲାଗି ରହିଥିବା ହେତୁ ପୋଲିସ ପକ୍ଷରୁ କଡା ନଜର ରଖାଯାଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
