ପୁରୀ: ଆସନ୍ତା ଶୁକ୍ରବାର ମହାଶିବରାତ୍ରି ତଥା ଜାଗର। ବାବା ଲୋକନାଥଙ୍କ ପୀଠରେ ଜାଗର ପାଳନ ନେଇ ଲକ୍ଷାଧିକ ଭକ୍ତଙ୍କ ସମାଗମ ହେବ। ଏଥିପାଇଁ ପ୍ରଶାସନର ପ୍ରସ୍ତୁତି ଶେଷ ହୋଇଛି। ଜାଗର ଦିନ ଲୋକନାଥଙ୍କ ପୀଠରେ ରାତି 3 ଟାରେ ଉଠିବ ମହାଦୀପ ।
ଭକ୍ତଙ୍କ ଦର୍ଶନ ନିମନ୍ତେ ବ୍ୟାରିକେଡ ସହ ଅଲୋକ, ପାନୀୟ ଜଳ, ସଫେଇ ନେଇ ବିଭିନ୍ନ ବିଭାଗ ଦାୟିତ୍ବ ଦିଆଯାଇଛି । କିନ୍ତୁ ଚଳିତ ବର୍ଷର ମୁଖ୍ୟ ଆକର୍ଷଣ ହେବ କଟକରୁ ଆସିଥିବା ବିଶାଳ ଦୀପ। ଯାହାକି ପଙ୍କ ଉଦ୍ଧାର ଏକଦଶୀ ଠାରୁ ଜାଗର ପର୍ଯ୍ୟନ୍ତ ଜଳିବ ଏହି ଦୀପ ।
ଏହି ଦୀପର ଲମ୍ବ ସାଢେ 6 ଫୁଟ ରହିଥିବାବେଳେ ଏବଂ ଏହାର ଓସାର ରହିଛି ସାଢେ 4 ଫୁଟ । ସେହିପରି ଦୀପର ଗଭୀରତା ରହିଛି 2 ଫୁଟ। ଏହି ଦୀପ ଦେଢ କୁଇଣ୍ଟାଲ ଘିଅ ଧାରଣ କରିବାର କ୍ଷମତା ରହିଛି । ଆଜିଠାରୁ ଦୀପ ଜଳିବାକୁ ବ୍ୟବସ୍ଥା ରହିଥିବା ବେଳେ ସମୁଦାୟ 4 ସହ କିଲୋ ଘିଅ ଜଳିବ। ‘ଜଗତ ମଙ୍ଗଳ ଜାଗର ଦୀପ’ ନାମରେ ଏହି ଦୀପକୁ ରାମକୃଷ୍ଣ ହୋତା ନାମକ ଜଣେ ସମାଜସେବୀ ଲୋକନାଥ ପୀଠରେ ଦୀପ ଜାଳିବା ନେଇ ବ୍ୟବସ୍ଥା କରିଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
