ପୁରୀ: ଜାରି ରହିଛି ଶ୍ରୀକ୍ଷେତ୍ରରେ ରଥଯାତ୍ରା । ଏନେଇ ଶ୍ରୀଜିଉମାନଙ୍କୁ ରଥ ଉପରେ ଦର୍ଶନ କରିଛନ୍ତି ଜଗତଗୁରୁ ଶଙ୍କରାଚାର୍ଯ୍ୟ । ମହାପ୍ରଭୁଙ୍କୁ ରଥ ଉପରେ ନିଜ ଶିଷ୍ୟଙ୍କ ସହ ଶଙ୍କରାଚାର୍ଯ୍ୟ ଦର୍ଶନ କରିବା ସହ ସାରା ବିଶ୍ବରୁ କୋଭିଡ ମହାମାରୀ ଦୂରେଇ ଯାଉ ଓ ଲୋକଙ୍କ କଲ୍ୟାଣ ପାଇଁ ମହାପ୍ରଭୁଙ୍କୁ ପ୍ରାର୍ଥନା କରିଛନ୍ତି । ଏହାସହ କୋଭିଡ ମାହାମରୀ ପାଇଁ ବିନା ଭକ୍ତରେ ହେଉଥିବା ରଥଯାତ୍ରାକୁ ଶଙ୍କରାଚାର୍ଯ୍ୟ ସ୍ବାଗତ କରିଛନ୍ତି ।
ଏପଟେ ପଶ୍ଚିମବଙ୍ଗ ନିର୍ବାଚନରେ ପ୍ରଧାନମନ୍ତ୍ରୀ ଓ ଗୃହମନ୍ତ୍ରୀଙ୍କ ରାଲିରେ ଲକ୍ଷାଧିକ ଲୋକ ସାମିଲ ହେବା ଘଟଣାକୁ ନେଇ ଜଗତଗୁରୁ କହିଛନ୍ତି ଯେ, ନିର୍ବାଚନରେ ରାଜନେତାମାନେ କୋଭିଡକୁ ଭୁଲିଗଲେ। କିନ୍ତୁ ଧାର୍ମିକ କାର୍ଯ୍ୟରେ କୋଭିଡ କଟକଣା କଡାକଡି ହେଉଛି। ଏଣୁ ରାଜନେତାମାନଙ୍କ ସଦ୍ବୁଦ୍ଧି ଉଦୟ ହେଉ ବୋଲି ଜଗତଗୁରୁ କହିଛନ୍ତି । ସେହିପରି ଶ୍ରୀମନ୍ଦିର ପ୍ରଶାସନ ପକ୍ଷରୁ ହେଉଥିବା ଶ୍ରୀମନ୍ଦିର ପରିଚଳନା କମିଟିରେ ତାଙ୍କ ମତାମତ ନିଆ ନ ଯିବାକୁ ନେଇ ସେ ଦୁଃଖ ପ୍ରକାଶ କରିଛନ୍ତି।
ଯେତେବେଳେ ହିନ୍ଦୁ ସନାତନ ଧର୍ମ ବିଲୁପ୍ତ ହେବାକୁ ବସିଥିଲା, ସେତେବେଳେ ଶଙ୍କରାଚାର୍ଯ୍ୟ ତାହାର ପୁନଃସ୍ଥାପନା ଓ ପ୍ରଚାର କରିଥିଲେ । କିନ୍ତୁ ଆଜି ସେହି ଜଗତଗୁରୁ ଶଙ୍କରାଚାର୍ଯ୍ୟଙ୍କୁ ଶ୍ରୀମନ୍ଦିର ପ୍ରଶାସନ ଅବହେଳା କରିବା ଦୁଃଖର ବିଷୟ ବୋଲି ଶଙ୍କରାଚାର୍ଯ୍ୟ କହିଛନ୍ତି।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
