ପୁରୀ: ଶ୍ରୀମନ୍ଦିର ସୁରକ୍ଷା ଜୋନ 75 ମିଟରରୁ 3 ଶହ ପ୍ଲଟ ହେବ ଅଧିଗ୍ରହଣ । ଏନେଇ ଖୁବଶୀଘ୍ର ବିଜ୍ଞପ୍ତି ପ୍ରକାଶ ପାଇବ । ଜମି ଅଧିଗ୍ରହଣ ପ୍ରକ୍ରିୟାକୁ ତ୍ବରାନ୍ବିତ କରିବା ପାଇଁ 30 ଅଫିସରଙ୍କୁ ନେଇ ଗଠିତ ହେବ ଏକ ସ୍ବତନ୍ତ୍ର କମିଟି ।
ବିଜ୍ଞପ୍ତି ଜାରି ପରେ ପ୍ରତ୍ୟେକ ପ୍ଲଟର ସ୍ବତ୍ତାଧିକାରୀଙ୍କ ସହ ସିଧା ଆଲୋଚନା କରାଯିବ । ବିଜ୍ଞପ୍ତିର ଏକ ମାସ ମଧ୍ୟରେ ଜମି ଦେବାକୁ ଚାହୁଁଥିବା ଲୋକଙ୍କୁ ସରକାରୀ ନିଷ୍ପତ୍ତି ମୁତାବକ ଜମି ମୂଲ୍ୟର ୧୦ ପ୍ରତିଶତ ଅଧିକ କ୍ଷତିପୂରଣ ମିଳିବ ଦିଆଯିବ ବୋଲି ଜିଲ୍ଲାପାଳ କହିଛନ୍ତି ।
ଶ୍ରୀମନ୍ଦିର ଚୌହଦିର ୭୫ ମିଟର ମଧ୍ୟରେ ୩୦୦ ପ୍ଲଟ ରହିଥିବାବେଳେ ଏଥିରେ ବ୍ୟକ୍ତିଗତ 230ଟି ପ୍ଲଟ ରହିଛି । ଏହି ପ୍ଲଟଗୁଡ଼ିକର ସୂଚନା ସମ୍ବଳିତ ବିଜ୍ଞପ୍ତି ପ୍ରକାଶ ପରେ ହିଁ ଜମି ଅଧିଗ୍ରହଣ ପାଇଁ ପଦକ୍ଷେପ ନିଆଯିବ । ତେବେ ଜମି ଅଧିଗ୍ରହଣ ସୂଚନା ଏବଂ ବିଭିନ୍ନ ସରକାରୀ ସୂଚନା ତଥା ଥଇଥାନ ସମ୍ପର୍କରେ ବିସ୍ଥାପିତଙ୍କୁ ସୂଚନା ଦେବା ପାଇଁ ପୁରୁଣା ଡାକବଙ୍ଗଳାରେ ଖୋଲାଯାଇଛି ସ୍ବତନ୍ତ୍ର ସେଲ । ଇଚ୍ଛୁକ ମାନେ ଏହି ସେଲରୁ ସମସ୍ତ ସୂଚନା ପାଇ ପାରିବେ ବୋଲି ଜିଲ୍ଲାପାଳ କହିଛନ୍ତି ।
ଜମି ଅଧିଗ୍ରହଣ ଏହି ଦାୟିତ୍ବରେ ରହିଛନ୍ତି, ସ୍ବତନ୍ତ୍ର ଭାବେ ପୁରୀକୁ ଯାଇଥିବା 5ଜଣ ଯୁବ ଆଇଏଏସଙ୍କ ସମେତ 5 ଜଣ ଓଏଏସ, 5 ରାଜ୍ୟସ୍ବ ଅଧିକାରୀ, 5ଜଣ ଓଏଏସ ପ୍ରୋଭେସନର(ଶିକ୍ଷା ନବୀଶ) । ତେବେ ସରକାରୀ ଅଧିଗ୍ରହଣ ନୀତି ୨୦୧୩ ଆଧାରରେ ଜମି ଅଧି ଗ୍ରହଣ କରାଯିବ ବୋଲି ଜିଲ୍ଲପାଳ କହିଛନ୍ତି । ଅନ୍ୟପଟେ ଶ୍ରୀସେତୁ ନିର୍ମାଣ ପାଇଁ ଜମି ଚିହ୍ନଟ ଏବଂ ସର୍ଭେ ଚାଲିଛି । ସର୍ଭେ ବେଳେ କେତେକ ସରକାରୀ ଜମି, ଶ୍ରୀମନ୍ଦିର ମନ୍ଦିର ପ୍ରଶାସନର ଜମି ଏବଂ କିଛି ଘରୋଇ ଜମି ଚିହ୍ନଟ ହୋଇଛି ।
ଏହି ଜମି ଚିହ୍ନଟ ଏବଂ ସର୍ଭେ ଶେଷ ପରେ ଅଧିଗ୍ରହଣ ପାଇଁ ସରକାରଙ୍କୁ ଚିଠି ଲେଖାଯିବ । ପରେ ଏହି ସେତୁ ନିର୍ମାଣ ପାଇଁ ଆବଶ୍ୟକ ଜମିର ଅଧିଗ୍ରହଣ ହେବ । ସେତୁ ପାଇଁ ଅଧିକାଂଶ ଜମି ସରକାରୀ ମାଲିକାନାରେ ରହିଥିବାରୁ ଜମି ଅଧିଗ୍ରହଣ ପ୍ରକ୍ରିୟା ସହଜ ହେବ ବୋଲି ଆଶା କରୁଛି ପ୍ରଶାସନ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
