ବ୍ରହ୍ମଗିରି: ପୁରୀବାସୀଙ୍କ ମନରୁ ଲିଭିନି ଫନି, ଫାଇଲିନର ତାଣ୍ଡବ। ଫନିର କରାଳ ରୂପ ଏବେ ବି ପୁରୀବାସୀଙ୍କ ସ୍ମୃତିରେ ଉଜ୍ଜୀବିତ । ଫନିରେ ହଜାର ହଜାର ଲୋକଙ୍କ ଘର ଉଜୁଡି ଯାଇଥିବା ବେଳେ ଶହଶହ ହେକ୍ଟର ଫସଲ ନଷ୍ଟ ହୋଇଯାଇଥିଲା । ଫନିରେ ବିଶେଷ ଭାବରେ ପୁରୀ ଜିଲ୍ଲାର ବ୍ରହ୍ମଗିରି, କୃଷ୍ଣପ୍ରସାଦ ଅଧିକ କ୍ଷତିଗ୍ରସ୍ତ ହୋଇଥିଲା । ତେବେ ଆଜି ପର୍ଯ୍ୟନ୍ତ ବି ସରକାରୀ ସହାୟତାରୁ ବଞ୍ଚିତ କୃଷ୍ଣପ୍ରସାଦର ଶତାଧିକ ହିତାଧିକାରୀମାନେ ।
ବର୍ଷ ବର୍ଷ ଧରି ସରକାରୀ ସହାୟତାରୁ ବଞ୍ଚିତ ଥିବା ଫନି ଫାଇଲିନ କ୍ଷତିଗ୍ରସ୍ତ ହିତାଧିକାରୀମାନେ ଏବେ କଠୋର ନିଷ୍ପତ୍ତି ନେଇଛନ୍ତି କୃଷ୍ଣପ୍ରସାଦବାସୀ । ବାତ୍ୟା ନିରୋଧକ କ୍ରିୟାନୁଷ୍ଠାନ କମିଟି ଆବାହକ ସୁବାସ ଚନ୍ଦ୍ର ଜେନାଙ୍କ ନେତୃତ୍ୱରେ ପ୍ରାୟ ୧ କିଲୋମିଟର ପଦ ଯାତ୍ରାରେ ଶହଶହ କ୍ଷତିଗ୍ରସ୍ତ ହିତାଧିକାରୀ ସରକାରଙ୍କ ବିରୁଦ୍ଧରେ ନାରା ଦେଇ ବିକ୍ଷୋଭ ପ୍ରଦର୍ଶନ କରିଛନ୍ତି।
ନିଜର ହକ ପାଇଁ ହାତରେ ବ୍ୟାନର ଧରି ସରକାରୀ ଅଧିକାରୀଙ୍କ ବିରୁଦ୍ଧରେ ସ୍ଲୋଗାନ ଦେଇଛନ୍ତି । ବ୍ଲକ କାର୍ଯ୍ୟାଳୟ ଆଗରେ ନ୍ୟାୟ ନପାଇବା ପର୍ଯ୍ୟନ୍ତ ଅହରାତ୍ର ଧାରଣା ଦେବେ ବୋଲି କହିଛନ୍ତି କ୍ଷତିଗ୍ରସ୍ତ ହିତାଧିକାରୀ । ଗୋଟିଏ ପଟେ ସରକାର ସମ୍ପୂର୍ଣ୍ଣ ଭାବରେ କ୍ଷତିଗ୍ରସ୍ତମାନଙ୍କୁ ସହାୟତା ପ୍ରଦାନ କରିବା କଥା କହୁଥିବା ବେଳେ ସରକାରୀ ଅଧିକାରୀମାନେ ତାକୁ କାର୍ଯ୍ଯକାରୀ କରୁନାହାନ୍ତି ।
କ୍ଷତିଗ୍ରସ୍ତ ହିତାଧିକାରୀ ମାନେ ସରକାରୀ ଅଫିସରଙ୍କୁ ଗୁହାରୀ କରି କରି ଥକି ପଡ଼ିଥିଲେ ଶେଷରେ ହାଇକୋର୍ଟଙ୍କ ଦ୍ବାରସ୍ଥ ମଧ୍ୟ ହୋଇଥିଲେ । ଫାଇଲିନ ବାତ୍ୟାର ଘର ଭଙ୍ଗିଥିବା କ୍ଷତିଗ୍ରସ୍ତଙ୍କୁ ସରକାରୀ ନିୟମ ଅନୁଯାୟୀ ଘର ପ୍ରଦାନ ପାଇଁ ହାଇକୋର୍ଟ ରାୟ ଦେଇଛନ୍ତି । ହେଲେ କୋର୍ଟଙ୍କ ରାୟକୁ ମଧ୍ୟ ସରକାରୀ ବାବୁ ଅଣଦେଖା କରିଥିବା ଅଭିଯୋଗ କରିଛନ୍ତି ହିତାଧିକାରୀମାନେ।
ଆଜିକୁ ବର୍ଷବର୍ଷ ଧରି ବାତ୍ୟାର ଘର ହରାଇଥିବା କ୍ଷତିଗ୍ରସ୍ତମାନେ ଆନ୍ଦୋଳନ କରି ଆସୁଛନ୍ତି । ଖାଲି ପାଦରେ ଚାଲି ଚାଲି ପୁରୀ ଜିଲ୍ଲାପାଳଙ୍କ ନିକଟରେ ଗୁହାରି କରିଥିଲେ ମଧ୍ଯ ସଫଳତା ପାଇ ନଥିଲେ । ଖାଲି ପ୍ରତିଶୃତି । ତେବେ ସବୁଠାରୁ ନିରାଶ ହେବା ପରେ କୃଷ୍ଣପ୍ରସାଦ ବ୍ଲକ ସମ୍ମୁଖରେ ଧାରଣା ଦେବା ପାଇଁ କ୍ଷତିଗ୍ରସ୍ତ ମାନେ ନିଷ୍ପତ୍ତି ନେଇଥିଲେ । କିନ୍ତୁ ବ୍ଲକ ବିଡ଼ିଓ ଧାରଣା କାରି ନିକଟକୁ ନଯାଇ ସମ୍ପୂର୍ଣ୍ଣ ଭାବେ ବ୍ଲକ କାର୍ଯ୍ୟାଳୟକୁ ଆସିବା ବନ୍ଦ କରିଦେଇଥିବା ଅଭିଯୋଗ କରିଛନ୍ତି । ତବେ କେବେ ସରକାର ଏମାନଙ୍କ ଶୁଣିବେ ଦେଖିବାକୁ ବାକି ।
ଇଟିଭି ଭାରତ, ବ୍ରହ୍ମଗିରି
