ପୁରୀ: ଶ୍ରୀଜଗନ୍ନାଥ ମନ୍ଦିର ଚାରି ପାଖରୁ ୭୫ ମିଟର ଚଉଡ଼ାରେ ସବୁ ନିର୍ମାଣ ହଟାଇ ଦିଆଯିବ । ବୈଧ ହେଉକି ବେଆଇନ ଜବରଦଖଲ ନିର୍ମାଣ, ସବୁ ଭଙ୍ଗାଯାଉଛି । ମେଘନାଦ ପାଚେରି ପାଖରୁ ୭୫ ମିଟର ସରହଦ ଭିତରେ ଥିବା ଦୋକାନ ବଜାର, ଘରଦ୍ବାର ସବୁ ଭାଙ୍ଗି ସଫା କରିଦିଆଯିବ ।
ଶ୍ରୀମନ୍ଦିର ତଥା ଭକ୍ତମାନଙ୍କ ସୁରକ୍ଷାକୁ ନଜରରେ ରଖି ଜଷ୍ଟିସ୍ ବିପି ଦାସ କମିଶନଙ୍କ ମଧ୍ୟବର୍ତ୍ତୀକାଳୀନ ରିପୋର୍ଟର ସୁପାରିସକ୍ରମେ ଏଭଳି ନିଷ୍ପତ୍ତି ନେଇଛନ୍ତି ରାଜ୍ୟ ସରକାର । ତେବେ ସରକାରଙ୍କ ଏହି ନିଷ୍ପତ୍ତିକୁ ସମାଲୋଚନା କରିଛନ୍ତି ସେବାୟତ ଓ ବୁଦ୍ଧିଜୀବୀ । ଏହାଦ୍ବାରା ପୁରୀ ସହର ତଥା ଶ୍ରୀଜଗନ୍ନାଥ ସଂସ୍କୃତି ଲୋପ ପାଇଯିବ ବୋଲି ଅଭିଯୋଗ କରିଛନ୍ତି । ଏଣୁ ପୁରୀ ସହରକୁ ସରକାର ଯେଉଁ ଐତିହ ସହର ନେଇ ସ୍ବପ୍ନ ଦେଖୁଛନ୍ତି ତାହା ଏହା ଦ୍ବାରା ନିଶ୍ଚିହ୍ନ ହୋଇଯିବ ବୋଲି ଆଶଙ୍କା କରୁଛନ୍ତି ସେବାୟତ ।
ଏହି ସବୁ ନିଷ୍ପତ୍ତିରୁ ସରକାର ଓହରିବାକୁ ବରିଷ୍ଠ ସେବାୟତ ଓ ପୁରୀ ସହର ବାସୀ ଦାବି କରିଛନ୍ତି। ଅନ୍ୟପଟେ ପୁରୀ ଜିଲ୍ଲାପାଳଙ୍କ କହିବା କଥା ସରକାରଙ୍କ ତରଫରୁ ନିର୍ଦେଶ ଆସିବା ପରେ ଯାହା କିଛି ପଦକ୍ଷେପ ନିଆଯିବ।
ତେବେ ପୂର୍ଵ ନିଷ୍ପତ୍ତି ମୁତାବକ ମେଘନାଦ ପାଚେରୀକୁ ଲାଗିଥିବା ଘର ଗୁଡିକ 19 ତାରିଖରେ ଭଙ୍ଗାଯିବ ବୋଲି କହିଛନ୍ତି ଜିଲ୍ଲାପାଳ ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
