ପୁରୀ: ଆଗକୁ ପବିତ୍ର କାର୍ତ୍ତିକ ମାସ । ମହାପ୍ରଭୁଙ୍କ ମହାପ୍ରସାଦ ପାଇବା ଆଶାରେ ଅଛନ୍ତି ଭକ୍ତ । ତେବେ ଶ୍ରୀମନ୍ଦିରରେ କୋଭିଡ କଟକଣାକୁ ନେଇ ଆଵଶ୍ୟକ ମୁତାବକ ବରାଦ ହୋଇଥିବା ଅବଢ଼ା ରନ୍ଧା ଯାଉନି । ଏଣୁ କାର୍ତ୍ତିକ ମାସରେ ଯେପରି ସମସ୍ତ ଭକ୍ତ ମହା ପ୍ରଭୁଙ୍କ ମହାପ୍ରସାଦ ପାଇବେ, ସେ ନେଇ ସରକାର ଓ ପ୍ରଶାସକ ବ୍ୟବସ୍ଥା କରିବାକୁ ଶ୍ରୀମନ୍ଦିର ପରିଚାଳନା କମିଟି ସଦସ୍ୟ ମାଧବ ଚନ୍ଦ୍ର ମହାପାତ୍ର କହିଛନ୍ତି ।
ଦୀର୍ଘ 7 ମାସ ହେବ ଭକ୍ତମାନେ ସରକାରଙ୍କ କୋଭିଡ କଟକଣା ପାଇଁ ମହାପ୍ରଭୁଙ୍କ ଦର୍ଶନରୁ ବଞ୍ଚିତ ଅଛନ୍ତି । ଏଣୁ ମହାପ୍ରସାଦ ଟିକକ ପାଇଁ ଆକୁଳ ଭକ୍ତ । ଯେହେତୁ ଆଗକୁ କାର୍ତ୍ତିକ ମାସ, ଏଣୁ ସ୍ବତନ୍ତ୍ର ବ୍ୟବସ୍ଥା କରିବାକୁ ଦାବି ହୋଇଛି । ସେପଟେ ଶ୍ରୀମନ୍ଦିର ଉନ୍ନୟନ ପ୍ରଶାସକ କହିଛନ୍ତି ଯେ, ଏ ନେଇ ଅଗାମୀ ଦିନରେ ଆଲୋଚନା କରାଯାଇ ପଦକ୍ଷେପ ନିଆଯିବ । କାର୍ତ୍ତିକ ମାସରେ କିଭଳି ଭକ୍ତ ମାନେ ମହାପ୍ରସାଦ ପାଇବେ, ସେଥିପାଇଁ ଶ୍ରୀମନ୍ଦିର ପ୍ରଶାସନ ପକ୍ଷରୁ ସୁଆର ମହାସୁଆର ନିଯୋଗ ସହିତ ଆଲୋଚନା ହେବ ।
ଗତ ଏକ ମାସ ହେବ ପୁରୀ ଜିଲ୍ଲା ବାହାରୁ କୌଣସି ବ୍ୟକ୍ତିଙ୍କ ବରାଦି ଅବଢ଼ା ନେଇ କଟକଣା ରହିଥିଲା । କୋଭିଡ ଗାଇଡ଼ ଲାଇନ ଅନୁଯାୟୀ ଏହି କଟକଣା ଲାଗିଥିଲା । ତେବେ ଏହି କଟକଣା ହଟିଥିବାବେଳେ ଭକ୍ତମାନେ ବରାଦି ଅବଢ଼ା ନେବା ନେଇ କୌଣସି ଅସୁବିଧା ନ ଥିବା ସୁଆର ମହାସୁଆର ନିଯୋଗ ପକ୍ଷରୁ କୁହାଯାଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
