ପୁରୀ:ପୁରୀରେ ପୁଣି ବାରହା ଆତଙ୍କ । ଲୋକନାଥ ରୋଡ଼ ପାର୍ବତୀ ପୁର ଅଞ୍ଚଳରେ ଦୁଇଟି ବାରହା ରାତିରେ ବୁଲୁଥିବାର ଦୃଶ୍ୟ ସିସିଟିଭିରେ କଏଦ ହୋଇଛି । ଯାହାକୁ ନେଇ ସ୍ଥାନୀୟ ଅଞ୍ଚଳର ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଛି । ତୁରନ୍ତ ଏହି ବାରହାକୁ କାବୁ କରିବା ପାଇଁ ସ୍ଥାନୀୟ ଲୋକେ ଦାବି କରିଛନ୍ତି ।
ତେବେ ଗତକିଛି ଦିନ ପୂର୍ବରୁ ପୁରୀ ସ୍ୱର୍ଗଦ୍ୱାର ଅଞ୍ଚଳରେ ବାରହା ଆକ୍ରମଣରେ ୬ ଜଣ ଆହତ ହୋଇଥିବା ବେଳେ ଦୁଇଜଣ ଗୁରୁତର ଆହତ ହୋଇ ସଦର ମୁଖ୍ୟ ଚିକିତ୍ସାଳୟରେ ଚିକିତ୍ସିତ ହେଉଥିଲେ । ଏନେଇ ଖବର ପରେ ପୋଲିସ, ଅଶ୍ନିଶମ ବିଭାଗ ସହ ଜଙ୍ଗଲ ଓ ପରିବେଶ ବିଭାଗ ଲୋକନାଥ ରୋଡ଼ ଛପନଛକର ଏକ ନାଳ ଭିତରୁ ବାରାହକୁ ଉଦ୍ଧାର କରିଥିଲେ । ପରେ ଏହାକୁ ନେଇ ସାତପଡ଼ା ଜଙ୍ଗଲରେ ଛଡ଼ାଯାଇଥିଲା ।
ତେବେ ଗୋଟିଏ ନୁହେଁ ପ୍ରାୟ ୫ ରୁ ୬ ଟି ବାରହା ଲୋକନାଥ ରୋଡ଼ ପାଇକ ସାହି ଓ ପାର୍ବତୀପୁର ଅଞ୍ଚଳରେ ବୁଲୁଥିବାର ଲୋକ ସେହି ସମୟରେ ଅଭିଯୋଗ କରିଥିଲେ । ସ୍ଥାନୀୟ ଲୋକଙ୍କ ଅଭିଯୋଗକୁ ବନ ବିଭାଗ ହାଲୁକା ଭାବେ ଗ୍ରହଣ କରିବା ସହ ଅଣଦେଖା କରିଥିଲା । ଯାହାକି ଏପଟେ ବାରହା ପୁଣି ସେହି ଅଞ୍ଚଳରେ ଦେଖାଦେଇଛି ।
ବୁଧବାର ରାତିରେ ବାରହା ବୁଲୁଥିବାର ଭିଡ଼ିଓ ସିସିଟିଭିରେ କଏଦ ହୋଇଛି । ତେଣୁ ତୁରନ୍ତ ପରିବେଶ ବିଭାଗ ବାରହାକୁ କାବୁ କରନ୍ତୁ ବୋଲି ଦାବି ହୋଇଛି । ନଚେତ ଆଗକୁ ଶ୍ରୀମନ୍ଦିର ଖୋଲିବା, ପର୍ଯ୍ୟଟନ ଋତୁ ଆସିବା ଏବଂ ପୁରୀରେ ପର୍ଯ୍ୟଟକ ତଥା ତୀର୍ଥଯାତ୍ରୀଙ୍କ ସଂଖ୍ୟା ବଢ଼ିବାକୁ ଥିବାରୁ ସମସ୍ତଙ୍କ ପ୍ରତି ବିପଦ ଦେଖାଦେଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
