ପୁରୀ: ଗିରଫ ହେଲେ ବଳଙ୍ଗା ଥାନା ASI । ଦୁଷ୍କର୍ମ ଅଭିଯୋଗରେ ପୁରୀ ବଳଙ୍ଗା ଥାନା ASI ଚିତରଞ୍ଜନ ଦାଶଙ୍କୁ ଆଜି(ଶୁକ୍ରବାର) ପୁରୀ ପୋଲିସ ଗିରଫ କରିଛି । ଜଣେ ମହିଳାଙ୍କୁ ତାଙ୍କ କ୍ବାଟର୍ସରେ ଦୁଷ୍କର୍ମ କରିଥିବା ଅଭିଯୋଗ ଘଟଣାକୁ ନେଇ ପୋଲିସ ଗିରଫ କରିଛି ।
ଡାକ୍ତରୀ ମାଇନା ଓ ବିଭିନ୍ନ ଦିଗକୁ ପୋଲିସ ତଦନ୍ତ କରି ପ୍ରମାଣ ମିଳିବା ପରେ ଅଭିଯୁକ୍ତ ASI ଚିତରଞ୍ଜନ ଦାଶକୁ ଗିରଫ କରାଯାଇ ଥିବା ପୁରୀ ଏସପି ସୂଚନା ଦେଇଛନ୍ତି । ଏନେଇ ବଳଙ୍ଗା ପୋଲିସ ଷ୍ଟେସନରେ ଏକ ମାମଲା ରୁଜୁ ହୋଇଛି। ପିପିଲି SDPO ଏହି ଘଟଣାର ତଦନ୍ତ କରୁଥିବା ବେଳେ ପୁରୀ ଏସପି ଉମାଶଙ୍କର ଦାସ ଏହି ଘଟଣା ଉପରେ ତୀଷ୍ମ ନଜର ରଖିଛନ୍ତି ।
ଗତକାଲି(ଗୁରୁବାର) ଅଭିଯୋଗ ହେବା ପରେ ଅଭିଯୁକ୍ତକୁ ଅଟକ ରଖାଯାଇଥିଲା। ଅଭିଯୋଗ ଅନୁଯାୟୀ, ପୀଡିତା ଜଣକୁ ଏକ ଅଭିଯୋଗରେ ସାହାଯ୍ୟ କରିବେ ବୋଲି କହି ପୁରୀ ବଳଙ୍ଗା ଥାନା ଏଏସଆଇ ଚିତ୍ତରଞ୍ଜନ ଦାଶ ତାଙ୍କ କ୍ବାଟର୍ସକୁ ଡାକି ନେଇ ସେଠାରେ ଉକ୍ତ ମହିଳାଙ୍କୁ ଦୁଷ୍କର୍ମ କରିଥିଲେ।
ଏହି ଘଟଣା ସ୍ଥାନୀୟ ଅଞ୍ଚଳରେ କିଛି ସମାଜସେବୀ ଜାଣିବା ପରେ ପୀଡିତାଙ୍କୁ ନେଇ ପିପିଲି SDPOଙ୍କ ନିକଟରେ ଏହି ଅଭିଯୋଗ କରିଥିଲେ । ପିପିଲି SDPO ଅଭିଯୋଗ ଗ୍ରହଣ କରି ତଦନ୍ତ ଆରମ୍ଭ କରିଥିଲେ। ତେବେ ଏହି ଘଟଣାକୁ ନେଇ ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଥିଲା।
ରାଜ୍ୟ ସରକାରଙ୍କ 'ମୋ ସରକାର' କଡାକଡି ଭାବେ କାର୍ଯ୍ୟକାରୀ ହେବାକୁ ନିର୍ଦ୍ଦେଶ ଥିବାବେଳେ ଜଣେ ପୋଲିସ କର୍ମଚାରୀଙ୍କ ନାଁରେ ଦୁଷ୍କର୍ମ ଅଭିଯୋଗ ଆସିବା ବିଭିନ୍ନ ମହଲରେ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି ।
ପୁରୀରୁ ଶକ୍ତି ପ୍ରସାଦ ମିଶ୍ର, ଇଟିଭି ଭାରତ
