ପୁରୀ: କୋଣାର୍କ ଐତିହ୍ୟ ସୂର୍ଯ୍ୟମନ୍ଦିରର ସଂରକ୍ଷଣ ଦିଗରେ ପୁଣି ଏଏସଆଇ କାର୍ଯ୍ୟ ଆରମ୍ଭ କରିଛି । ଗତ ଜାନୁଆରୀ ୩ ତାରିଖରୁ ବାଲି କଢା କାର୍ଯ୍ୟ ଆରମ୍ଭ ହୋଇ ମାର୍ଚ୍ଚ ମାସ ପର୍ଯ୍ୟନ୍ତ ଚାଲିଥିଲା । ମାତ୍ର କୌଣସି କାରଣକୁ ନେଇ ଏହି ବାଲି କଢା କାର୍ଯ୍ୟ ଏଏସଆଇ ପକ୍ଷରୁ ଦୀର୍ଘ ଦିନ ପାଇଁ ବନ୍ଦ ରଖାଯାଇଥିଲା । ପୁନର୍ବାର ଏଏସଆଇ ପକ୍ଷରୁ କ୍ରେନ ସାହାଯ୍ୟରେ ବଡ଼ ବଡ଼ ଲୁହା ବିମ ସବୁ ଲଗାଯାଇ କାର୍ଯ୍ୟ କରାଯାଉଛି । ଏବେ ମନ୍ଦିର ଉତ୍ତର ଓ ପଶ୍ଚିମ କୋଣରେ ଲିଫ୍ଟ ପାଇଁ ମୂଳଦୁଆ ନିର୍ମାଣ ପରେ ଲୁହା ବିମ ଲଗାଯାଉଛି ।
ଉନ୍ନତ ବୈଷୟିକ ଜ୍ଞାନକୌଶଳ ପ୍ରୟୋଗ କରାଯାଇ ସ୍ୱତନ୍ତ୍ର ଲିଫ୍ଟ ମାଧ୍ୟମରେ ମନ୍ଦିର ଚୂଡ଼ାରୁ ଗର୍ଭଗୃହରେ ରହିଥିବା ବାଲି ଗୁଡିକୁ ପର୍ଯ୍ୟାୟକ୍ରମେ ମନ୍ଦିର ପାଦଦେଶକୁ ସୁରକ୍ଷିତ ଉପାୟରେ ବାହାର କରାଯିବ । ପରେ ପାଦଦେଶରୁ ପାଇପ ସାହାଯ୍ୟରେ ବାଲି ଗୁଡିକ ସ୍ୱତନ୍ତ୍ର ରାସ୍ତା ଦେଇ ଉତ୍ତର ପଶ୍ଚିମ କୋଣରେ ସୁରକ୍ଷିତ ଭାବେ ରଖାଯିବ । ବାଲି ନିଷ୍କାସନ କାର୍ଯ୍ୟ ସରିଲେ ପର୍ଯ୍ୟଟକଙ୍କ ପାଇଁ ଜଗମୋହନ ଦ୍ବାର ଖୋଲାଯିବ । ଏଥିପାଇଁ ମନ୍ଦିର ପରିସରରେ କାର୍ଯ୍ୟଭାର ନେଇଥିବା ସଂସ୍ଥାର ଅଧିକାରୀମାନଙ୍କ ସହ ଏଏସଆଇର ସ୍ଥାନୀୟ ଅଧିକାରୀ ଦେବେନ୍ଦ୍ର କୁମାର ଉପସ୍ଥିତ ଥିଲେ । ମନ୍ଦିର ପରିସରରେ ଦୀର୍ଘ ମାସ ଧରି ପଡ଼ି ରହିଥିବା ଲୁହା ବିମକୁ କ୍ରେନ୍ ମାଧ୍ୟମରେ ଉଠାଯାଇ ମନ୍ଦିରକୁ ସୁରକ୍ଷିତ ରଖିବା ପାଇଁ ଲଗାଯାଉଛି ।
ତେବେ ଏହି ବାଲି କଢ଼ା ଯିବା କାର୍ଯ୍ୟ ଯେଉଁ ମେସିନ ସ୍ଥାପନ ହେଉଛି ଏଏସଆଇ ଅଧିକାରୀ ଓ ଏକ୍ସପର୍ଟଙ୍କ ଉପସ୍ଥିତିରେ ହେଉଛି । ଯେଭଳି ସୂର୍ଯ୍ୟ ମନ୍ଦିରର କାରୁକାର୍ଯ୍ୟରେ କୌଣସି ପ୍ରତିକୂଳ ପ୍ରଭାବ ନପଡ଼ିବ ସେ ଦିଗରେ ଧ୍ୟାନ ଦିଆଯାଇଛି । ଦୀର୍ଘ ବର୍ଷ ହେବ ଲୁହା ପାଇପରେ କୋଣାର୍କ ମନ୍ଦିରକୁ ରଖାଯାଇଥିଲା । ହେଲେ ବିଭିନ୍ନ ମହଲରୁ ଦାବି ପରେ ଲୁହା ପାଇପ ଏଏସଆଇ ହଟାଇଥିଲା । ଗତ 2020ରେ କୋଣାର୍କ ସୂର୍ଯ୍ୟ ମନ୍ଦିର ସୁରକ୍ଷା ନେଇ ଏକ ବୈଠକ ହୋଇଥିଲା । କେନ୍ଦ୍ର ପର୍ଯ୍ୟଟନ ମନ୍ତ୍ରୀ, ଏଏସଆଇଡିଜି, ସୂର୍ଯ୍ୟ ମନ୍ଦିର ପାଇଁ ଥିବା ଆମିକସକ୍ୟୁରି ଏନ କେ ମହାନ୍ତି ପ୍ରମୁଖ ଯୋଗ ଦେଇଥିବାବେଳେ କୋଣାର୍କ ସୂର୍ଯ୍ୟ ମନ୍ଦିରର ସୁରକ୍ଷା ପାଇଁ ମନ୍ଦିର ଭିତରେ ଥିବା ବାଲିକୁ କଢ଼ା ଯିବାନେଇ ନିଷ୍ପତ୍ତି ହୋଇଥିଲା ।
ଏହା ବି ପଢନ୍ତୁ...ନ୍ୟୁୟର୍କର ଐତିହାସିକ ଟାଇମ୍ସ ସ୍କୋୟାରରେ ଶୋଭା ପାଇଲା କୋଣାର୍କ ସୂର୍ଯ୍ୟ ମନ୍ଦିର ଚକ୍ର
ପୂର୍ବରୁ ବ୍ରିଟିଶ ସାସନ ସମୟରେ କୋଣାର୍କ ମନ୍ଦିରର ସୁରକ୍ଷା ପାଇଁ ଗର୍ଭଗୃହ ଭିତରେ ବାଲି ଭର୍ତ୍ତି କରାଯାଇ ରାସ୍ତା ବନ୍ଦ କରି ଦିଆଯାଇଥିଲା । ତେବେ ମନ୍ଦିର ଗର୍ଭଗୃହରୁ ବାଲି କାଢିବା ନିଷ୍ପତ୍ତି ପରେ ମନ୍ଦିର ସମ୍ବେଦନଶୀଳ ସ୍ଥାନ ଗୁଡିକର ସୁରକ୍ଷା ପାଇଁ ଲୁହା ବିମ ଲଗାଯାଉଛି। ଘୋଡା, ହାତୀ ଦ୍ଵାରରେ ବିମ୍ ଲଗାଯାଇଛି । ତେବେ ମନ୍ଦିର ଗର୍ଭ ଗୃହରୁ ବାଲି କାଢିବା ପ୍ରକ୍ରିୟା 3 ବର୍ଷ ଧରି ଲାଗିବ ବୋଲି ପୂର୍ବରୁ ଏଏସଆଇ ପକ୍ଷରୁ କୁହାଯାଇଥିଲା । 1903ରେ କୋଣାର୍କ ମନ୍ଦିରର ଗର୍ଭଗୃହରେ ଇଂରେଜମାନେ ବାଲି ଭର୍ତ୍ତି କରି ଗର୍ଭଗୃହ ଦ୍ୱାର ବନ୍ଦ କରିଥିଲେ।
ଇଟିଭି ଭାରତ, ପୁରୀ
