ବ୍ରହ୍ମଗିରି : କୋଭିଡ ପାଇଁ ବିନା ଭକ୍ତରେ ହେବ ଅଲାରନାଥଙ୍କ ଅନବସର ଯାତ୍ରା। ଯାହାକୁ ନେଇ ଦୁଃଖରେ ଭକ୍ତ ଏବଂ ସେବାୟତ । ଶ୍ରୀ ଜଗନ୍ନାଥଙ୍କ 108 କଳସ ଜଳରେ ମହାସ୍ନାନ ପରେ ଶ୍ରୀଜୀଉମାନେ 15 ଦିନ ପାଇଁ ଜ୍ଵରରେ ପଡିଯାନ୍ତି । ଏହି ସମୟରେ ପ୍ରଭୁଙ୍କର ଚାଲିଥାଏ ଗୁପ୍ତସେବା। ଜଗନ୍ନାଥଙ୍କ ଦର୍ଶନରୁ ଭକ୍ତମାନେ ବଞ୍ଚିତ ହୋଇ ଛୁଟି ଆସନ୍ତି ବ୍ରହ୍ମଗିରିସ୍ଥ ଅଲାରନାଥ ପୀଠକୁ।
କିମ୍ବଦନ୍ତୀ ଅନୁସାରେ ଏହି ସମୟରେ ଅଲାରନାଥଙ୍କ ଚତୁର୍ଦ୍ଧାମୂର୍ତ୍ତୀ ଦର୍ଶନରେ ଜଗନ୍ନାଥଙ୍କ ଦର୍ଶନର ସମଫଳ ପ୍ରାପ୍ତି ହୋଇଥାଏ । 15 ଦିନ ବ୍ରହ୍ମଗିରି ପଲଟିଯାଏ ଦ୍ବିତୀୟ ଶ୍ରୀକ୍ଷେତ୍ର । ଭକ୍ତଙ୍କ ଗହଳି ଚହଳିରେ ଆନନ୍ଦ ବଜାରରେ ପ୍ରସାଦର ପସରା ଖୋଲିଯାଏ । ଅଲାରନାଥଙ୍କ ପ୍ରିୟ ଖିରି ଭୋଗ ପାଇ ଭକ୍ତ ଆତ୍ମ ତୃପ୍ତି ପାଇଥାଏ। କିନ୍ତୁ ମହାମାରୀ ପାଇଁ ଯାତ୍ରାକୁ ଆସିପାରିବେନି ଭକ୍ତ । ପ୍ରଶାସନ ପକ୍ଷରୁ 144 ଧାରା ଜାରି ହୋଇଛି । ଗତବର୍ଷ ଭଳି ଚଳିତ ବର୍ଷ ବିନା ଭକ୍ତରେ ହେବ ଅନବସର ଯାତ୍ରା । 15 ଦିନ ଦୁର୍ଲଭ ଦର୍ଶନରୁ ବଞ୍ଚିତ ହେବେ ଭକ୍ତ।
ବ୍ରହ୍ମଗିରିରୁ ଦେବାଶିଷ ଦାସ, ଇଟିଭି ଭାରତ
