ନୂଆପଡା: ସରକାର ଗମନା ଗମନା ସୁବିଧା ପାଇଁ କୋଟି କୋଟି ଅର୍ଥ ଖର୍ଚ୍ଚ କରୁଛନ୍ତି । କିନ୍ତୁ ବନ୍ୟା ବିତ୍ପାତରେ ପୋଲ ଧୋଇ ଯାଇ 3 ବର୍ଷ ବିତି ଯାଇଥିଲେ ମଧ୍ୟ ସରକାରଙ୍କ ଦୃଷ୍ଟି ପଡିନାହିଁ । ଲୋକେ ଗଛ ପକାଇ କାଠ ପୋଲ ନିର୍ମାଣ କରି ବିପଦସଂକୁଳ ଅବସ୍ଥାରେ ଯାତାୟତ କରୁଛନ୍ତି । କେତେବେଳେ ଯେ ଏହି କାଠ ପୋଲ ଭାଙ୍ଗି ଯିବ ତାହା କହିବା ମୁସ୍କିଲ । ଏ ଭଳି ସମସ୍ୟାର ସମ୍ମୁଖୀନ ହେଉଛିନ୍ତି ନୂଆପଡା ଜିଲ୍ଲାର ମାଓ ପ୍ରବଣ ନୂଆମାଲପଡା ଗ୍ରାମପଞ୍ଚାୟତ ସ୍ଥିତ ଆଦିବାସୀ ବହୁଳ ଅଖଡାଭଟା ଗ୍ରାମବାସୀ ।
ଜିଲ୍ଲା ସଦର ମହୁକମା ଠାରୁ 120 କିଲୋମିଟର ଦୂରତା ମାଓ ପ୍ରବଣ ଅଞ୍ଚଳ ଅଖଡାଭଟା। ଯେଉଁଠାରେ ସରକାର ତଥା ଜିଲ୍ଲା ପ୍ରଶାସନର ନିଷ୍କ୍ରିୟତା କାରଣରୁ ବିପଦ ସଂକୁଳ ଅବସ୍ଥାରେ ଲୋକେ ଯାତାୟତ କରୁଛନ୍ତି । ରାସ୍ତା ଉପରେ ଗଛ ପକାଇ କାଠ ପୋଲ ନିର୍ମାଣକରି ପ୍ରତିଦିନ ଯାତାୟତ କରୁଛନ୍ତି ଶତାଧିକ ଲୋକ । ଏହି କାଠ ପୋଲ ଉପରେ ସାଇକଲ, ମୋଟର ସାଇକଲ ବିପଦକୁ ଆମନ୍ତ୍ରଣ କରି ଯାତାୟତ କରୁଛନ୍ତି । ସେହିପରି ଆମ୍ବୁଲାନ୍ସ କିମ୍ବା 4 ଚକିଆ ଯାନବାହାନ ଯିବା ଆସିବା ସମ୍ପୂର୍ଣ୍ଣ ଠପ ହୋଇପଡିଛି । ଅତିଆବଶ୍ୟକୀୟ ସ୍ଥଳେ ପଡୋଶୀ ଛତିଶଗଡ଼ ରାଜ୍ୟ ତେନ୍ତୁଳିଖୁଣ୍ଟି ,ଜେରଗାଁ, ସାଲେଭଟା ଦେଇ ଦୀର୍ଘ 13 କିଲୋମିଟର ଦୂରତା ବୁଲିକି ଯାତାୟତ କରୁଛନ୍ତି ସ୍ଥାନୀୟ ଲୋକେ । ଅପରପକ୍ଷେ ପୋଲ ନିର୍ମାଣ କରିବାପାଇଁ ସ୍ଥାନୀୟ ଲୋକେ ବାରମ୍ବାର ପ୍ରଶାସନକୁ ଜଣାଇଥିଲେ ମଧ୍ୟ କୌଣସି ସୁଫଳ ମିଳିନାହିଁ ।
ଯୋଗାଯୋଗ ବିଛିନ୍ନ ଥିବା ଅଞ୍ଚଳ ପ୍ରତି ସରକାର ସ୍ବତନ୍ତ୍ର ଦୃଷ୍ଟିଦେଇ ଯୋଗାଯୋଗ କରିବା ପାଇଁ ଗ୍ରାମ୍ୟ ସଡକ ଯୋଜନା ନାଁ ରେ ବ୍ୟାପକ ଅର୍ଥ ଖର୍ଚ୍ଚ କରୁଛନ୍ତି । ଏହି ମାଓ ପ୍ରବଣ ନୂଆମାଲପଡା ଗ୍ରାମପଞ୍ଚାୟତ ସ୍ଥିତ ଅଖଡାଭଟା ଗାଁ ପ୍ରତି ଅଣଦେଖା କରିଛନ୍ତି । 2018 ମସିହା ପ୍ରଳୟଙ୍କରୀ ବନ୍ୟା ବିତ୍ପାତରେ ଅଖଡାଭଟା ଗାଁରାସ୍ତା ଉପରେ ଥିବା ପୋଲ ସମ୍ପୂର୍ଣ୍ଣ ଧୋଇଯାଇ ଯୋଗାଯୋଗ ବିଛିନ୍ନ ହୋଇଥିଲା । ତତ୍କାଳୀନ ସିନାପାଲି ବିଡିଓ, ତହସିଲଦାର କ୍ଷେତ୍ର ପରିଦର୍ଶନ କରି ପୋଲ ନିର୍ମାଣ କରିବାପାଇଁ ସ୍ଥାନୀୟ ଲୋକଙ୍କୁ ଦୃଢ ପ୍ରତିଶୃତି ଦେଇଥିଲେ । ଅପରପକ୍ଷେ ପ୍ରତିଶୃତି ଦେବା 3 ବର୍ଷ ବିତିଯାଇଥିଲେ ମଧ୍ୟ ସ୍ଥାନୀୟ ଲୋକଙ୍କ ସମସ୍ୟା ଦୂର ହୋଇ ପାରିନାହିଁ । ଯାହାଫଳରେ ସ୍ଥାନୀୟ ଲୋକମାନଙ୍କ ମଧ୍ୟରେ ଦିନକୁ ଦିନ ଆନ୍ଦୋଳନ ଦାନା ବାନ୍ଧୁଛି ।
ସମସ୍ୟାର ସମାଧାନ ପାଇଁ ସିନାପାଲି ବିଡିଓ ସଦାଶିବ ନାଏକଙ୍କ ସହ ଆମ ନୂଆପଡା ପ୍ରତିନିଧି ଆଲୋଚନା କରିଛନ୍ତି । ଅଖଡାଭଟା ପୋଲ ନିର୍ମାଣ ପ୍ରୋପଜାଲ ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥା ନୂଆପଡାଙ୍କୁ ପଠାଇଛନ୍ତି । ହେଲେ କୌଣସି କାରଣ ରୁ ତାହା ଫେରିଆସିଛି । ପୁନଃ ପ୍ରୋପଜାଲ ପଠାଇବେ ଏବଂ ପୋଲ ନିର୍ମାଣ ପାଇଁ ବିହିତ ପଦକ୍ଷେପ ନେବେ ବୋଲି ସିନାପାଲି ବିଡିଓ ପ୍ରତିଶୃତି ଦେଇଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
