ନୂଆପଡା: ପଶ୍ଚିମ ଓଡିଶାର କୃଷିଭିତ୍ତିକ ଗଣପର୍ବ ନୂଆଁଖାଇ । ଏନେଇ ଚଳଚଞ୍ଚଳ ନୂଆପଡା ଜିଲ୍ଲା । ସବୁଠି ଉତ୍ସାହର ମାହୋଲ । ଏ ପର୍ବ ଲୋକଙ୍କ ଭାବାବେଗ ସହ କାହିଁ କେଉ କାଳରୁ ଜଡିତ । ଅନ୍ୟ ପର୍ବପର୍ବାଣୀ ଠାରୁ ନୂଆଖାଇ ପରମ୍ପରା ଟିକେ ନିଆରା। ନୂଆଖାଇ ଯେତିକି ପାଖେଇ ଆସୁଛି ପୁରପଲ୍ଲୀରେ ଲୋକଙ୍କ ଉତ୍କଣ୍ଠା ସେତିକି ବଢ଼ିବାରେ ଲାଗିଛି । ତେବେ ଖଡିଆଳ ବ୍ଲକ ବଣ ପାହାଡ଼ ଘେରା ଦୁର୍ଗମ ମହୁଳଝରଣ ଗାଁରେ ମଧ୍ୟ ନୂଆଖାଇର ବେଶ ପ୍ରଭାବ ଦେଖା ଦେଇଛି ।
ତେବେ ମହୁଳଝରଣ ଗାଁ ର ବିପ୍ଳବୀ ଆଦିବାସୀ ମୁଖିଆ ପିଙ୍ଗଲ ମାଝୀ ପାହାଡ଼ି ଇଲାକାର ଗାଁ ଗଣ୍ଡାକୁ ଯାଇ ସ୍ବରଚିତ ଗୀତ ନୃତ୍ୟ ଜରିଆରେ ଲୋକଙ୍କୁ ବୁଝାଉଛନ୍ତି । ଏଥିସହ ପଶ୍ଚିମ ଓଡ଼ିଶାର ଲୋକଗୀତ ଡାଲଖାଇ- ରସରକେଲି-ଜାଇଫୁଲ ଗୀତର ବାସ୍ନାରେ ମହକାଇ ଦେଉଛନ୍ତି ଗାଁ ଗଣ୍ଡା । ଗୀତ ଶୁଣି ନୃତ୍ୟ ଦେଖି ଲୋକେବି ପିଙ୍ଗଲ ମାଝୀଙ୍କୁ ବେଶ ଗ୍ରହଣ କରୁଛନ୍ତି । ତେବେ ରାଗ ରୋଷ ମାନ ଅଭିମାନ ଭୁଲିଯାଇ ସମସ୍ତେ ଏକାଠି ହୋଇ ନୂଆଖାଇ ବା ନବାନ୍ନ ଭକ୍ଷଣ କରିବାପାଇଁ ସଚେତନ ସୃଷ୍ଟି କରୁଛନ୍ତି ମହୁଳଝରଣ ଗାଁର ପିଙ୍ଗଲ ମାଝୀ ।
ଇଟିଭି ଭାରତ, ନୂଆପଡା
