ନୂଆପଡା: ପୁଣି ଚର୍ଚ୍ଚା ପରିସରକୁ ଆସିଲା ଆସନ୍ନ ପ୍ରସୂତୀଙ୍କୁ ଖଟିଆରେ ବୁହା ଭଳି ଅଭାବନୀୟ ଦୃଶ୍ୟ । ଦୁର୍ଗମ ସମାଡପଦର ଗାଁରେ ଖଟିଆରେ ବୁହାହେଲେ ଗର୍ଭବତୀ ମହିଳା । ଖରାପ ରାସ୍ତା ଆଉ ବାଟ ସାରା ଝିପଝିପ୍ ବର୍ଷା, ଖଟିଆରେ ପ୍ରସବ ବେଦନାରେ ଛଟପଟ ମହିଳା ଶେଷରେ ଜଙ୍ଗଲୀ ରାସ୍ତାରେ ପ୍ରସବ କରିଛନ୍ତି । ଏହି ଚିତ୍ର ପୁଣି ଥରେ ରାଜ୍ୟର ସ୍ବାସ୍ଥ୍ୟସେବାର ନଗ୍ନ ଚିତ୍ରକୁ ପଦାରେ ପକାଇଛି ।
ସୂଚନା ଅନୁସାରେ ସମାଡପଦର ଗାଁର ମୁକେଶ ମାଝୀଙ୍କ ସ୍ତ୍ରୀ ପ୍ରମିଳା ମାଝୀଙ୍କ ସୋମବାର ରାତ୍ରି 8ଟା ସମୟରେ ଗର୍ଭ ଯନ୍ତ୍ରଣା ହୋଇଥିଲା । ନିଘଞ୍ଚ 4 କିଲୋମିଟର ଦୁର୍ଗମ ପାଦଚଲା ଘାଟି ରାସ୍ତା ଅତିକ୍ରମ କରି ଖଡ଼ିଆଳ ସରକାରୀ ହସ୍ପିଟାଲକୁ ନେବା ସମ୍ଭବ ହୋଇନଥିଲା । ଆମ୍ବୁଲାନ୍ସକୁ କଲ୍ କରାଯାଇଥିଲେ ମଧ୍ୟ କୌଣସି ଫଳ ମିଳି ନଥିଲା । ରାତ୍ରି ତମାମ ଗର୍ଭ ଯନ୍ତ୍ରଣାପରେ ମଙ୍ଗଳବାର ସକାଳ 7ଟା ସମୟରେ ପାହାଡ଼ର ଘାଟି ରାସ୍ତାଦେଇ ଖଟିଆରେ ବୋହି ଆଣୁଥିଲେ । ହେଲେ ଜଙ୍ଗଲ ଘାଟି ବାଟରେ ଏକ ନବଜାତ ଶିଶୁ କନ୍ୟା ଜନ୍ମ ଦେଇଛନ୍ତି ପ୍ରମିଳା ମାଝୀ ।
ଦୁଃଖର ବିଷୟ ଆମ୍ବୁଲାନ୍ସକୁ ଖବର ଦେବା ପରେ ମଧ୍ୟ ଆସିଲା ନାହିଁ । ଯାହାଫଳରେ ବାଧ୍ୟ ହୋଇ ପୁଣି ଖଟିଆରେ ବୋହି ନିଜ ଗାଁ ସମାଡପଦରକୁ ବୋହି ନେଇଛନ୍ତି ।
ନୂଆପଡାରୁ ମୋତିଲାଲ ବାଗ୍, ଇଟିଭି ଭାରତ
