ନୂଆପଡା: ବିକାଶ ଲୋକଙ୍କ ପାଇଁ । ଜନତାଙ୍କ ଜୀବନଙ୍କୁ ସହଜ କରିବାକୁ ସରକାର ମାଳମାଳ ଯୋଜନା କରୁଛନ୍ତି । ହେଲେ କଣ ଏହାର ପ୍ରକୃତ କାର୍ଯ୍ୟକ୍ଷମ ହୋଇ ପାରୁଛି । କଣ ବାସ୍ତବରେ ଲୋକ ସରକାରୀ ଯୋଜନାରୁ ଉପକୃତ ହେଉଛନ୍ତି । କଣ ଲୋକଙ୍କୁ ସେମାନଙ୍କ ମୌଳିକ ଅଧିକାର ମିଳିଛି । ଆଜି ବି ଅନେକ ଲୋକ ଶିକ୍ଷା ସ୍ବାସ୍ଥ୍ୟ ଭଳି ମୌଳିକ ସୁବିଧାରୁ ବଞ୍ଚିତ । ନୂଆପଡା ଜିଲ୍ଲା ଛତିଶଗଡ଼ ସୀମାନ୍ତ କସେଇପାଣି ଗାଁ ଲୋକଙ୍କୁ ମିଳିପାରିନାହିଁ ମୌଳିକ ଅଧିକାର । ଶିକ୍ଷା, ସ୍ୱାସ୍ଥ୍ୟ ଗମନାଗମନ, ବିଜୁଳି ଓ ପାଣି ସବୁକିଛି ଅବ୍ୟବସ୍ଥିତ ।
ନୂଆପଡା ସଦର ମହୁକମା ଠାରୁ 120 କିଲୋମିଟର ଦୂର ଛତିଶଗଡ଼ ସୀମାନ୍ତ ସିନାପାଲି ବ୍ଳକ କସେଇପାଣି ଗାଁର ଅଟିପଡ଼ା ଦରଲୀପଡ଼ା, ମୁନ୍ଧେବାହେଲି 3ଟି ପଡା ରହିଛି । ଏଠାରେ ପାଖାପାଖି 70 ଗୋଟି ଆଦିବାସୀ ପରିବାର ବାସ କରନ୍ତି । ସ୍ଥାନୀୟ ଲୋକଙ୍କ କହିବା ଅନୁସାରେ ଦୀର୍ଘ 65 ବର୍ଷକାଳ ହେବ ଏଠାରେ ବାସ କରିଛନ୍ତି । ହେଲେ ସରକାରଙ୍କ ଜନକଲ୍ୟାଣ ଯୋଜନାଠୁ ଏମାନେ ଯୋଜନ ଦୂରରେ। ବିଶୁଦ୍ଧ ପାନୀୟ ଜଳ ସଙ୍କଟ ଦେଖା ଦେଇଛି । ଗାଁକୁ ଯାତାୟତ କରିବାପାଇଁ ଭଲ ରାସ୍ତା ନାହିଁ । ପ୍ରାଥମିକ ବିଦ୍ୟାଳୟ କିମ୍ବା ଅଙ୍ଗନୱାଡି କେନ୍ଦ୍ର ବି ନାହିଁ । ବିଜୁଳି ଖୁଣ୍ଟ ତାର ଲାଗିଛି ହେଲେ ଦୀର୍ଘ ଏକ ବର୍ଷ ହେବ ଆଲୁଅ ନାହିଁ । ଏଭଳି ଏକାଧିକ ମୌଳିକ ଅଧିକାରରୁ ବଞ୍ଚିତ କସେଇପାଣି ଗାଁ ଏହି 3 ପଡା ଲୋକ । ସମସ୍ୟା ନେଇ ସ୍ଥାନୀୟ କୁସୁମଜୋର ସରପଞ୍ଚଙ୍କୁ ଜଣାଇଛନ୍ତି ଲୋକେ , ହେଲେ ଗାଁ ଲୋକଙ୍କୁ ସମସ୍ୟା ପ୍ରତି ସରପଞ୍ଚ ବାବୁଙ୍କ ଟିକେ ହେଲେ ନଜର ନାହିଁ ।
