ନୂଆପଡା: ଜିଲ୍ଲା ବିଜୁ ଜନତା ଦଳ ସଭାପତି ମନୋଜ କୁମାର ମିଶ୍ର କଳାହାଣ୍ଡି ସାଂସଦ ବସନ୍ତ ପଣ୍ଡାଙ୍କ ବିରୁଦ୍ଧରେ ସୋମବାର ଗଣମାଧ୍ୟମ ଆଗରେ ନିନ୍ଦା ପ୍ରକାଶ କରିଛନ୍ତି । କଳାହାଣ୍ଡି ସାଂସଦ ବସନ୍ତ ପଣ୍ଡା ନୂଆପଡା ବିଧାୟକ ରାଜେନ୍ଦ୍ର ଢୋଲକିଆଙ୍କୁ ଅଶାଳୀନ ଅସଭ୍ୟ ଭାଷାରେ ଗାଳିକରିବା ସେ ଅଭିଯୋଗ ଆଣିଛନ୍ତି । ଯାହାକି ଜଣେ ସାଂସଦଙ୍କ ମୁହଁରୁ ଶୋଭାପାଉନାହିଁ ବୋଲି ନୂଆପଡା ବିଜୁ ଜନତା ଦଳ ସଭାପତି ମନୋଜ କୁମାର ମିଶ୍ର କହିଛନ୍ତି ।
ମହାମାରୀ କୋରୋନା ଭାଇରସକୁ ରୋକିବା ପାଇଁ ଗତ 21ତାରିଖ ଶନିବାର ଦିନ ନୂଆପଡା ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଜିଲ୍ଲା ପରିଷଦର ଏକ ସ୍ବତନ୍ତ୍ର ବୈଠକ ଅନୁଷ୍ଠିତ ହୋଇଥିଲା । ବୈଠକରେ ନୂଆପଡା ଜିଲ୍ଳାପାଳ ମଧୁସ୍ମିତା ସାହୁ, କଳାହାଣ୍ଡି ସାଂସଦ ବସନ୍ତ ପଣ୍ଡା, ନୂଆପଡା ବିଧାୟକ ରାଜେନ୍ଦ୍ର ଢୋଲକିଆ,ଜିଲ୍ଲା ପରିଷଦ ଅଧ୍ୟକ୍ଷା ନମିତା ପ୍ରଧାନ ସମେତ ପରିଷଦର ସଭ୍ୟାସଭ୍ୟ, ଜିଲ୍ଲାସ୍ତରୀୟ ଅଧିକାରୀ ଉପସ୍ଥିତ ଥିଲେ ।
ଏହି ସମୟରେ ବୈଠକରେ ଧାନ କିଣାବିକା ବିଷୟ ଉପରେ ଆଲୋଚନା ହେଉଥିଲା । ଏହାପରେ ବିଧାୟକ ଏବଂ ସାଂସଦଙ୍କ ମଧ୍ୟରେ କଥା କଟାକଟି ଆରୋପ ପ୍ରତ୍ୟାରୋପ ହୋଇଥିଲା । ସଭାର ଗାରିମାକୁ କ୍ଷୁଣ୍ଣକରି ସଭା ମଧ୍ୟରେ ବିଧାୟକ ରାଜେନ୍ଦ୍ର ଢୋଲକିଆଙ୍କୁ ବିଭିନ୍ନ ଅସଭ୍ୟ ଭାଷାରେ ଗାଳିଗୁଲଜ କରିଥିଲେ । ଏହାର ପ୍ରତିବାଦରେ ନୂଆପଡା ବିଜୁ ଜନତା ଦଳ ସଭାପତି ମନୋଜ କୁମାର ମିଶ୍ର,ନୂଆପଡା ଜିଲ୍ଲା ପରିଷଦ ଅଧ୍ୟକ୍ଷ ନମିତା ପ୍ରଧାନ ସୋମବାର ଗଣମାଧ୍ୟମ ଆଗରେ ନିନ୍ଦା ପ୍ରକାଶ କରିଛନ୍ତି । ସାଂସଦ ପୁନଃ ଏପରି ଆଚରଣ ଦେଖାଇଲେ ଆଗାମୀ ଦିନରେ ଦୃଢ ପ୍ରତିବାଦ କରିବେ ବୋଲି ଚେତାବନୀ ଦେଇଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
