ନୂଆପଡା: ବୋଡେନ ବ୍ଲକରେ କିରୋସିନି ହଡପ ଅଭିଯୋଗ । ଅଭିଯୋଗ ଆଣିଛନ୍ତି ଖଡ଼ିଆଳ ବିଧାୟକ ଅଧିରାଜ ମୋହନ ପାଣିଗ୍ରାହୀ । କିରୋସିନି ଘୋଟାଲା ସମ୍ପର୍କରେ ଅବଗତ କରିବାପାଇଁ ଗୁରୁବାର ବୋଡେନ ବିଡିଓ ପୂର୍ଣ୍ଣଚନ୍ଦ୍ର ଭୋଇ ଏବଂ ବ୍ଲକ ଯୋଗାଣ ଅଧିକାରୀ ମୋହିତ ଭୋଇଙ୍କୁ ଜଣାଇଛନ୍ତି । ଘଟଣାର ଉଚ୍ଚ ସ୍ତରୀୟ ତଦନ୍ତ କରି ଦୋଷୀ ବିରୁଦ୍ଧରେ ଦୃଢ କାର୍ଯ୍ୟାନୁଷ୍ଠାନ ପାଇଁ ଦାବିକରିଛନ୍ତି ଖଡ଼ିଆଳ ବିଧାୟକ । ନଚେତ ଆଗାମୀ ଦିନରେ ଘଟଣାକୁ ବିଧାନସଭା ପ୍ରଶ୍ନ ଉତ୍ତର କାଳରେ ଅଭିଯୋଗ କରିବେ ବୋଲି ପ୍ରକାଶ କରିଛନ୍ତି ।
ସୂଚନା ଅନୁସାରେ, ଆଦିବାସୀ ବହୁଳ ବୋଡେନ ବ୍ଲକ କରଙ୍ଗାମାଲ ଗ୍ରାମପଂଚାୟତରେ ଗତ 2019 ମସିହା ଜୁଲାଇ ମାସ ପର୍ଯ୍ୟନ୍ତ ହିତାଧିକାରୀ ମାନଙ୍କୁ କିରୋସିନି ବଣ୍ଟନ କରାଯାଇଛି । ପରେ 2020 ମସିହା ଜୁଲାଇ ମାସରେ ପୁଣି କିରୋସିନି ବଣ୍ଟନ କରାଯାଇଛି । 2019 ଜୁଲାଇରୁ 2020 ଜୁଲାଇ ମାସ ବାକିତକ ମଝିରେ ମାସମାସ ଧରି ହିତାଧିକାରୀ କିରୋସିନି ପାଇନାହାନ୍ତି ବୋଲି ବିଧାୟକ ଅଭିଯୋଗ କରିଛନ୍ତି ।
ଅପରପକ୍ଷେ କିରୋସିନି ଡ଼ିଲର କହୁଛନ୍ତି ପ୍ରତିମାସର ଡିପୋରୁ କିରୋସିନି ଦେଇଛନ୍ତି । ବ୍ଲକ ଯୋଗାଣ ଅଧିକାରୀ ମଧ୍ୟ କହୁଛନ୍ତି କିରୋସିନି ଗ୍ରାମପଂଚାୟତ ନେଇଛି । ଯୋଗାଣ ସହାୟକ ମଧ୍ୟ କହୁଛନ୍ତି କିରୋସିନି ନେଇ ବାଣ୍ଟିଛନ୍ତି । ଦୁର୍ଭାଗ୍ୟର ବିଷୟ ହିତାଧିକାରୀ କିରୋସିନି ପାଇନାହାଁନ୍ତି । ତେବେ ହଜାର ହଜାର ଲିଟର କିରୋସିନି ଗଲା କୁଆଡେ । ଅପରପକ୍ଷେ ଘଟଣାର ତଦନ୍ତପରେ ସତ୍ୟାସତ୍ୟ ଜଣାପଡିବ ବୋଲି ବୋଡେନ ବିଡିଓ ପ୍ରକାଶ କରିଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
