ନୂଆପଡା: ଜିଲ୍ଲାରେ ପ୍ରବାସୀ ଶ୍ରମିକଙ୍କ ସାହାଯ୍ୟ ପାଇଁ ଆଗେଇ ଆସିଛି ସ୍ବେଚ୍ଛାସେବୀ ଅନୁଷ୍ଠାନ ଲୋକଦୃଷ୍ଟି । ସ୍ଥାନୀୟ ଖଡିଆଳ ବ୍ଲକର ଟିଏମସି ସେଣ୍ଟରରେ ରହିଥିବା ପ୍ରବାସୀମାନେ କ୍ବାରେଣ୍ଟାଇନ ଅବଧି ସାରି ଘରକୁ ଯିବାକୁ ଥିବା ବେଳେ ଏମାନଙ୍କୁ ଶୁଖିଲା ରାସନ ଯୋଗାଇଛି ଲୋକଦୃଷ୍ଟି ଅନୁଷ୍ଠାନ । ଦାଦନ ଶ୍ରମିକମାନଙ୍କୁ ଚାଉଳ, ଡାଲି, ତେଲ, ଲୁଣ ଓ ମସଲା ଆଦି ଯୋଗାଇ ଦିଆଯାଇଥିବା ଜଣାପଡିଛି ।
ଏଥିସହ କୁନି କୁନି ଶିଶୁଙ୍କ ପାଇଁ ପୁଷ୍ଟିକର ଖାଦ୍ୟ ଓ ଅନ୍ୟ ଖାଦ୍ୟ ସାମଗ୍ରୀ ମଧ୍ୟ ଯୋଗାଇ ଦିଆଯାଇଛି । ସେପଟେ ଚାଷୀ ପରିବାରଙ୍କୁ ପନିପରିବା ବିହନ ଯଥା କାକୁଡି, କଲରା, ଶିମ୍ବ, ମାଖନ ଆଦିର ବିହନ ବଣ୍ଟାଯାଇଛି । ଏହାପଛରେ ଉଦ୍ଦେଶ୍ୟ ହେଉଛି ଟିଏମସି ସେଣ୍ଟରରୁ ଯାଇ ଶ୍ରମିକ ତଥା ଚାଷୀମାନେ ନିଜ ବାଡି ବଗିଚାରେ ଚାଷ କାର୍ଯ୍ୟା ସ୍ବାଭାବିକ କରି ସୁଖଦ ଜୀବନଯାପନ କରିବା ।
ସୂଚନା ମୁତାବକ ଖଡିଆଳ ବ୍ଲକର 5ଗୋଟି ଗ୍ରାମ ପଞ୍ଚାୟରୁ 2000 ପ୍ରବାସୀ ଓଡିଆ ଶ୍ରମିକଙ୍କୁ ସ୍ବେଚ୍ଛାସେବୀ ଅନୁଷ୍ଠାନ ପକ୍ଷରୁ ସହାୟତା ଯୋଗାଇ ଦିଆଯାଇଛି । ଲୋକଦୃଷ୍ଟି ଅନୁଷ୍ଠାନ ଓ ସମାଜସେବୀ ବିକ୍ରମ ଲାଲଜୀଙ୍କ ମିଳିତ ଉଦ୍ୟମରେ ପ୍ରବାସୀମାନଙ୍କୁ ଦିଆଯାଇଥିବା ଏହି ସାହାଯ୍ୟକୁ ସ୍ଥାନୀୟ ଅଞ୍ଚଳରେ ବେଶ ପ୍ରଶଂସା କରାଯାଇଛି । ସେପଟେ ଏହି ସହାୟତା ବଣ୍ଟନ କାର୍ଯ୍ୟକ୍ରମରେ ମୁଖ୍ୟ ଅତିଥି ଭାବେ ଦାବରୀ ଗ୍ରାମ ପଞ୍ଚାୟତ ସରପଞ୍ଚ ନରେନ୍ଦ୍ର ହେର୍ଣ୍ଣା, ଲୋକଦୃଷ୍ଟି ସହନିର୍ଦ୍ଦେଶକ ଭୂତେଶ ମେହେର ସାମିଲ ହୋଇଥିଲେ ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
