ନୂଆପଡା: ଭୂତାଣୁ ଠାରୁ ବଳିଗଲା ଭୋକ । ଅସହ୍ୟ ଭୋକ ଆଗରେ ଏହି ଭାଇରସ ଲଢେଇକୁ ଭୂଲିବାକୁ ବାଧ୍ୟହେଲା ଏହି ନିରୁପାୟ ମଣିଷ । ଭୋକ ବିକଳରେ ଯାହା ମିଳିଲା ତାକୁ ଗୋଟେଇ ଖାଇଲା । ତେବେ କୋରୋନା ମହାମାରୀ ପ୍ରକୋପ ତଥା ଭାଇରସ ସହ ସ୍ବଚ୍ଛତାର ଏହି ଲଢେଇ ମଧ୍ୟରେ ନୂଆପଡା ଜିଲ୍ଲା ସଦର ମହୁକମା ଠାରେ ଦେଖାବାକୁ ମିଳିଛି ଏମିତି ଏକ ଦୃଶ୍ୟ ।
ତେବେ ଘଟଣାଟି ବ୍ଲକ କାର୍ଯ୍ୟାଳୟ ପରିସରରେ ହିଁ ଘଟିଛି । ବ୍ଲକ କାର୍ଯ୍ୟାଳୟ ନିକଟରେ ଥିବା ଡଷ୍ଟବିନରୁ ଖାଦ୍ୟ ଉଠାଇ ଖାଇବାରେ ଲାଗିଛନ୍ତି ଏହି ଭୋକିଲା ମଣିଷ ଜଣଙ୍କ । ଅସହ୍ୟ ଭୋକକୁ ସହି ନପାରି ଡ଼ଷ୍ଟବିନରୁ ପଚା ସଢା ଓ ଦୂଷିତ ଖାଦ୍ୟକୁ ଖାଇ ଚାଲିଛନ୍ତି ଏହି ଅସହାୟ ଭୋକିଲା ବ୍ୟକ୍ତି । ଆଉ ଏହି ଭିଡିଓଟି ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି ।
ତେବେ ଏଠାରେ ଗୋଟିଏ ପ୍ରଶ୍ନ ଉଠୁଛି । କୋଭିଡ-19 ମୁକାବିଲା ଓ ସ୍ବଚ୍ଛାତାର ଡିଣ୍ଡିମ ପିଟୁଥିବା ରାଜ୍ୟ ସରକାରଙ୍କ ପୁଳା ପୁଳା ଯୋଜନା ଏଠି କଣ କରୁଛି । ଜାତୀୟ ଖାଦ୍ୟ ସୁରକ୍ଷା ଯୋଜନା ଓ ରାଜ୍ୟ ସରକାରଙ୍କ ଯୋଜନା କଣ ଏଠାରେ ଫେଲ ମାରିଛି । ତେବେ ଭିଡିଓଟିକୁ ନେଇ ଏବେ ବୁଦ୍ଧିଜୀବି ମହଲରେ ଅସନ୍ତୋଷ ପ୍ରକାଶ ପାଇଛି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
