ନୂଆପଡା: ଜିଲ୍ଲାର ଖଡ଼ିଆଳ ବ୍ଲକ ବରଗାଁର ବହୁ ଚର୍ଚ୍ଚିତ 120 ବର୍ଷର ବୃଦ୍ଧାଙ୍କୁ ସାକ୍ଷାତ କରିବା ପାଇଁ ଆଜି(ଶନିବାର) କଳାହାଣ୍ଡି ସାଂସଦ ବସନ୍ତ ପଣ୍ଡା ବରଗାଁ ପହଞ୍ଚିଛନ୍ତି । 120ବର୍ଷିଆ ଅସହାୟ ବୃଦ୍ଧା ଲବେ ବାଗ ଏବଂ ବୃଦ୍ଧାଙ୍କ 60 ବର୍ଷିଆ ଝିଅ ପୁଞ୍ଜିମତିଙ୍କୁ ସାକ୍ଷାତ କରି ଘଟିଯାଇଥିବା ସମସ୍ତ ବିଷୟ ଉପରେ ପଚାରି ବୁଝିଛନ୍ତି ।
ସୂଚନାନୂସାରେ, ଗତ କିଛିଦିନ ହେବ ବ୍ୟାଙ୍କରୁ ଟଙ୍କା ଉଠାଣ ପାଇଁ ବୃଦ୍ଧା ଲବେ ବାଗଙ୍କୁ ବୃଦ୍ଧା ଝିଅ ପୁଞ୍ଜିମତି ଖଟିଆରେ ଘୋଷାଡି ଘୋଷାଡି ଉତ୍କଳ ଗ୍ରାମ୍ୟ ବ୍ୟାଙ୍କ ବରଗାଁକୁ ଦୀର୍ଘ 4ଶହ ମିଟର ନେଇଥିଲେ । ଏପରି ଘଟଣାଟି ବିଭିନ୍ନ ଗଣମାଧ୍ୟମରେ ପ୍ରକାଶ ପାଇବା ପରେ ଏହାକୁ ପ୍ରତ୍ୟେକ ମହଲରେ ନିନ୍ଦା କରାଯାଇଛି ।
ଏଭଳି ହୃଦୟ ବିଦାରକ ଘଟଣା ପାଇଁ ବ୍ୟାଙ୍କ ମ୍ୟାନେଜରଙ୍କୁ ଚାକିରିରୁ ନିଲମ୍ବିତ କରାଯାଇଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ନିର୍ଦ୍ଦେଶ କ୍ରମେ ଶନିବାର କଳାହାଣ୍ଡି ସାଂସଦ ବସନ୍ତ ପଣ୍ଡା ବୃଦ୍ଧାଙ୍କୁ ସାକ୍ଷାତ କରି ଶୁଖିଲା ଖାଦ୍ୟ ସାମଗ୍ରୀ ସହିତ କିଛି ଆର୍ଥିକ ସହଯୋଗ କରିଛନ୍ତି । ଆଗାମିଦିନରେ ବାସ ଗୃହ, ପାନୀୟଜଳର ସୁ-ବ୍ୟବସ୍ଥା କରିବେ ବୋଲି ପ୍ରତିଶ୍ରୁତି ଦେଇଛନ୍ତି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
