ନୂଆପଡା: ସମ୍ପନ୍ନହେଲା ଚୌହାନ ବଂଶୀୟ ଇଷ୍ଟଦେବୀ ମା' ସମଲେଶ୍ବରୀ ଏବଂ ରକ୍ତାମ୍ବରୀଙ୍କ ଯୋଡି ଛତର ଯାତ୍ରା । ଅନ୍ୟ ଜିଲ୍ଲା ଗୁଡିକରେ ବିଭିନ୍ନ ଦେବାଦେବୀଙ୍କ ଛତର ଯାତ୍ରା ଚାଲିଥିବାବେଳେ, ଖଡ଼ିଆଳରେ ମଧ୍ୟ ଯୋଡି ଛତର ଯାତ୍ରା ଅନୁଷ୍ଠିତ ହୋଇଥାଏ, ଯାହାକି ଏକ ବିରଳ ପରମ୍ପରା ବୋଲି ଗବେଷକ ମାନେ ମତ ଦିଅନ୍ତି । ଯୋଡି ଛତର ଯାତ୍ରା ଦେଖିବା ପାଇଁ ପଡ଼ୋଶୀ କଳାହାଣ୍ଡି, ବଲାଙ୍ଗୀର, ନବରଙ୍ଗପୁର ସମେତ ଛତିଶଗଡ଼ ରାଜ୍ୟରୁ ଖଡ଼ିଆଳକୁ ହଜାର ହଜାର ଶ୍ରଦ୍ଧାଳୁଙ୍କ ସମାଗମ ହୋଇଥାଏ ।
ରାଜା ରାଜୁଡା ଶାସନ କାଳରେ ଖଡ଼ିଆଳ ତତ୍କାଳୀନ ଚୌହାନ ବଂଶୀୟ ରାଜା ରତନ ସିଂ ଦେଓ ଖଡ଼ିଆଳ ଗଡ଼ଜାତ ରାଜ୍ୟର ସୁରକ୍ଷା ପାଇଁ 1820 ମସିହା ପଲମାଗଡରୁ ବଡ ଭଉଣୀ ଦେବୀ ମା' ରକ୍ତାମ୍ବରୀକୁ ଆଣି ରାଜ ଦରବାରରେ ସ୍ଥାପନା କରିଥିଲେ । ସେହିଭଳି ସାନ ଭଉଣୀ ଦେବୀ ମା' ସମଲେଶ୍ବରୀଙ୍କୁ କୋମନା ଗଡରୁ ଆଣି ଇଷ୍ଟଦେବୀ ରୂପେ ସ୍ଥାପନା କରିଥିଲେ । ସେହି ଶହଶହ ବର୍ଷର ଐତିହ୍ୟ ପରମ୍ପରାକୁ ରକ୍ଷା କରିବା ନେଇ ବର୍ତ୍ତମାନର ଯୁବରାଜ ଦେବ ଦେବ ସିଂ ଦେଓଙ୍କ ନେତୃତ୍ୱରେ ଖଡ଼ିଆଳ ଠାରେ ଯୋଡି ଛତର ଯାତ୍ରା ପାଳିତ ହୋଇ ଆସୁଛି । ଉଭୟ ମା’ ପ୍ରତିବର୍ଷ ଦଶହରା ପୀଠ ଦଶମୀ ଦିନ ଛତର ଦେହରେ ବିରାଜ ମାନ କରି ଘର ଘର ଯାଇ ପୂଜା ପାଉଥିଲେ । ହେଲେ ଚଳିତ ବର୍ଷ ଉଭୟ ମା'ଙ୍କ ଯୋଡି ଛତର ଘର ଘର ନ ଯାଇ ଭବ୍ୟ ସମାରୋହରେ ବଜାର ତାଳେ ତାଳେ ସହରର ମୁଖ୍ୟ ରାସ୍ତାରେ ଯୋଡ଼ି ଛତରଯାତ୍ରା ଭ୍ରମଣ କରୁଥିବା ଦେଖିବାକୁ ମିଳିଥିଲା ।
ଏହା ମଧ୍ୟ ପଢନ୍ତୁ-ମା’ ମାଣିକେଶ୍ୱରୀଙ୍କ ପ୍ରସିଦ୍ଧ ଛତର ଯାତ୍ରା, ଦୁଲୁକିଲା ଭବାନୀପାଟଣା
ଯୋଡି ଛତର ଯାତ୍ରା ସମୟରେ ଶ୍ରଦ୍ଧାଳୁ ମା'ଙ୍କୁ ଦର୍ଶନ କଲେ ମାନସିକ ପୂରଣ ହୋଇଥାଏ ବୋଲି ଲୋକଙ୍କ ବିଶ୍ୱାସ ରହିଛି । ଯାହାଫଳରେ ମା'ଙ୍କ ଆଶିଷ ପାଇବା ପାଇଁ ଦୀପ, ଧୂପ, ନୈବେଦ୍ୟ ସହିତ ଖଇ ଗୁଡ଼ ଘିଅ ମନ୍ଦାର ମାଳା ଧରି ସଡକର ଉଭୟ ପାର୍ଶ୍ୱରେ ଭକ୍ତ ମାନେ ଅପେକ୍ଷା କରିଥିବା ଦେଖିବାକୁ ମିଳିଥିଲା । ଦଶମୀରେ ପ୍ରଥମେ ଉଭୟ ମା' ଖଡ଼ିଆଳ ରାଣୀ ସାହେବାଙ୍କ ଠାରୁ ପୂଜା ପାଇବା ପରେ ଅନ୍ୟାନ୍ୟ ଜାତି, ଧର୍ମ, ବର୍ଣ୍ଣ ସମସ୍ତଙ୍କ ଠାରୁ ପୂଜା ପାଇବାର ପରମ୍ପରା ଖଡ଼ିଆଳ ଠାରେ ରହିଛି । ଏନେଇ ବିଶାଳ ଯୋଡ଼ି ଛତର ଯାତ୍ରାକୁ ଘଣ୍ଟ ଶଙ୍ଖ ବାଦ୍ୟରେ ସହର ପରିକ୍ରମା କରାଯାଇଛି ।
ନୂଆପଡା ଜିଲ୍ଲା ଖଡ଼ିଆଳ ଠାରେ ଯୋଡି ଛତର ଯାତ୍ରା ଦର୍ଶନ କରିବା ପାଇଁ ହଜାର ହଜାର ଶ୍ରଦ୍ଧାଳୁଙ୍କ ଜନ ସମାବେଶ ହୋଇଥିଲା । ଯୋଡି ଛତର ଯାତ୍ରା ଦର୍ଶନ କଲେ ମାନସିକ ପୂରଣ ହୋଇଥାଏ ବୋଲି ଲୋକଙ୍କ ଅଗାଢ ବିଶ୍ୱାସ ରହିଛି ।
