ନୂଆପଡ଼ା: ଆଦିବାସୀ ବହୁଳ ଜିଲ୍ଲା ନୂଆପଡ଼ା । କେବଳ ଆଦିବାସୀଙ୍କର ଏଠି ଭିଡ଼ ଜମେ ନାହିଁ, ଅନେକ ସମସ୍ୟା, ରୋଗ, ଏପରିକି ମୌଳିକ ସମସ୍ୟାର ସମାହାର ମଧ୍ୟ ଏଠାରେ ଦେଖିବାକୁ ମିଳେ । ନାନାଦି ରୋଗର ଶିକାର ହୋଇ ନୂଆପଡ଼ାବାସୀଙ୍କ ଶରୀରର ରୂପରେଖରେ ମଧ୍ୟ ପରିବର୍ତ୍ତନ ଆସିଗଲାଣି । କାହାର ଅଣ୍ଟା ନଇଁ ହୋଇଯାଇଛି ତ ଆଉ କାହାର ଆଣ୍ଠୁ, ଗୋଡ଼ହାତ ବଙ୍କା ହୋଇ ଗଲାଣି । ତେବେ ଏହାର କାରଣ ଫ୍ଲୋରାଇଡ ମିଶା ପାଣି ।
ଏହି ସମସ୍ୟା ସମଗ୍ର ଜିଲ୍ଲାରେ ବ୍ୟାପିଛି । ଜିଲ୍ଲାର ସିନାପାଲି, ବୋଡେନ, କୋମନା, ଖଡ଼ିଆଳ, ନୂଆପଡା ବ୍ଲକରେ ଲୋକେ ନିଜ ଅଞ୍ଚଳରେ ଏହି ସମସ୍ୟାରେ ଜୁଝି ହେଉଛନ୍ତି । ଏହାସହିତ ଜିଲ୍ଲାବାସୀ ଶିକ୍ଷା, ସ୍ବାସ୍ଥ୍ୟ, ବିଜୁଳି, ପାନୀୟ ଜଳ ଭଳି ମୌଳିକ ସୁବିଧାରୁ ମଧ୍ୟ ବଞ୍ଚିତ ହୋଇଥିବା ଜଣାପଡେ ।
ସେପଟେ ଡ୍ରିଙ୍କିଂ ଓ୍ବାଟର ସାନିଟେସନ ମିଶନ ପକ୍ଷରୁ ଏକ ରିପୋର୍ଟ ପ୍ରକାଶ ପାଇଛି । ଯାହା ନିଶ୍ଚିତ ଭାବେ ନିନ୍ଦିତ କଲା ଭଳି । ପ୍ରକାଶିତ ରିପୋର୍ଟ ଅନୁସାରେ ନୂଆପଡ଼ା ଜିଲ୍ଲାର 663ଟି ଛୋଟ ବଡ଼ ଗାଁ ମଧ୍ୟରୁ 350 ନଳକୂପରେ ଫ୍ଲୋରାଇଡ ମିଶ୍ରଣ ପାଣି । ସେଗୁଡ଼ିକ ମଧ୍ୟରେ ସିନାପାଲି ବ୍ଲକର ନୂଆମାଲପଡ଼ା, ଖାନ୍ଦାପଡ଼ା, ବୈରାଗୀପଡ଼ା, ବାଗପଡ଼ା, ପୋଡପଡ଼ା, ପୋର୍ତ୍ତିପଡ଼ା ଅଞ୍ଚଳରେ ଏହି ଫ୍ଲୋରାଇଡ଼ ମିଶା ପାଣି ଅଧିକ ମାତ୍ରା ରହିଛି । ଫଳରେ ଏହି ପାଣିକୁ ପିଇ ଅଧିକାଂଶ ବାସିନ୍ଦା ମୃତ୍ୟୁମୁଖରେ ପଡ଼ୁଛନ୍ତି ।
ସେପଟେ ନୂଆପଡ଼ା ଜିଲ୍ଲାର ଭୂତଳ ଜଳରେ ମାତ୍ରାଧିକ ଫ୍ଲୋରାଇଡ଼ ଥିବା ନେଇ 20 ବର୍ଷ ତଳେ ଜଣାପଡ଼ିଥିଲା । ପ୍ରଥମେ ବୋଡେନ, ପରେ ସିନାପାଲି, ନୂଆମାଲପଡ଼ା, ଖନ୍ଦାପଡ଼ା, ପୋର୍ତ୍ତିପଡ଼ା ଅଞ୍ଚଳରେ ଏହି ଫ୍ଲୋରାଇଡ଼ ମିଶା ପାଣି ରହିଥିବା ଜଣାପଡ଼ିଥିଲା । ସେହି ସମୟରେ ଏହାର ସମାଧାନ ନେଇ ପ୍ରଶାସନିକ ସ୍ତରରେ ବେଶ ତତ୍ପରତା ପ୍ରକାଶ ପାଇଥିଲା । ଏହାର ସମାଧାନ ପାଇଁ ପାଇପ ଯୋଗେ ବିଶୁଦ୍ଧ ପାନୀୟ ଜଳ ଯୋଗାଇ ଦେବାକୁ ପଦକ୍ଷେପ ନେଇଥିଲେ । କାମ ମଧ୍ୟ ଆରମ୍ଭ ହୋଇଥିଲା । 10 ବର୍ଷ ତଳୁ ଓଭର ଟ୍ୟାଙ୍କ ନିର୍ମାଣ ହୋଇଛି, ପାଇପ ମଧ୍ୟ ବିଛା ସରିଛି । ମାତ୍ର ଗାଁ ଲୋକଙ୍କ ପାଇଁ ତାହା ଧୀରେ ଧୀରେ ସ୍ବପ୍ନରେ ପରିଣତ ହେବାକୁ ବସିଲାଣି ।
ଏନେଇ ମେଗା ଜଳ ଯୋଗାଣ ପ୍ରକଳ୍ପକୁ କାର୍ଯ୍ୟନିର୍ବାହୀ ଯନ୍ତ୍ରୀଙ୍କୁ ଭେଟିଥିଲୁ । ଏଥିପାଇଁ ସେ ବିଦ୍ୟୁତ ବିଭାଗକୁ ଦାୟୀ କରିଥିଲେ । କହିଥିଲେ ଲୋ-ଭୋଲ୍ଟେଜ କାରଣରୁ ଅନେକ ଯାନ୍ତ୍ରିକ ସମସ୍ୟା ଦେଖାଦେଉଛି । ଫଳରେ ପାଣି ଉଠିପାରୁନାହିଁ । ଭୋଲ୍ଟେଜ ବଢାଇବା ପାଇଁ ଓ୍ବେସ୍କୋ କର୍ତ୍ତୃପକ୍ଷଙ୍କୁ ଜଣାଯାଇଥିବା ସେ କହିଥିଲେ । ତେବେ ଏସବୁ ମଧ୍ୟରେ ନୂଆପଡ଼ାବାସୀଙ୍କୁ କେବେ ମିଳୁଛି ବିଶୁଦ୍ଧ ପାଣି, କେବେ ହେଉଛି ଏହାର ସମାଧାନ ତାହା ଦେଖିବାକୁ ବାକି ରହିଲା ।
ନୂଆପଡ଼ାରୁ ମୋତିଲାଲ ବାଗ, ଇଟିଭି ଭାରତ
