ନୂଆପଡ଼ା: CRPF 216 ବାଟାଲିୟନ କ୍ୟାମ୍ପରେ ଅଘଟଣ । ନିଜ AK 47 ପିସ୍ତଲରୁ ଗୁଳି କରି ଜୀବନ ହାରିଲେ ଯବାନ । ନୂଆପଡା ଜିଲ୍ଲା ମାଓ ପ୍ରବଣ ବୋଡେନ ବ୍ଲକ ଅନ୍ତର୍ଗତ ଖଡୁପାନିରେ ଏପରି ଅଘଟଣ ଘଟିଛି । ଜଣେ ଯବାନ ନିଜ AK 47 ବନ୍ଧୁକରେ ନିଜକୁ ଗୁଳି କରିଥିବା ଜଣାପଡ଼ିଛି । ମୃତ ଯବାନ ଜଣକ ହେଉଛନ୍ତି ଡି.ଗୁନ୍ନ ଶେଖରନ । ସେ ତାମିଲନାଡୁର ହୋଇଥିବା ଜଣାପଡିଛି । ଏ ସମ୍ପର୍କରେ ଖବର ପାଇ ନୂଆପଡା ଏସପି ଜି. ରାଘବେନ୍ଦ୍ର ରେଡ୍ଡୀ ଖଡୁପାନି ଘଟଣାସ୍ଥଳରେ ପହଞ୍ଚିଛନ୍ତି ।
ନୂଆପଡା ଏସପିଙ୍କ ଟିମ୍ ଘଟଣାସ୍ଥଳକୁ ଯାଇ ସ୍ଥିତି ପରଖିବା ସହିତ ଅଧିକ ତଦନ୍ତ ଆରମ୍ଭ କରିଛନ୍ତି । ସେମାନେ CRPF କ୍ୟାମ୍ପକୁ ଯାଇ ତନାଘନା କରୁଛନ୍ତି । ହେଲେ ଯବାନ ଜଣଙ୍କ କାହିଁକି ଏଭଳି କଲେ ତାହାର କାରଣ ଏଯାଏଁ ଜଣାପଡିନାହିଁ । ସେପଟେ ପାରିବାରିକ ଚିନ୍ତା ଯୋଗୁଁ ଏଭଳି ହୋଇଥାଇପାରେ ବୋଲି ସନ୍ଦେହ କରୁଛି ପୋଲିସ ।
ଏହା ବି ପଢନ୍ତୁ...ଜୀବନ ହାରିଲେ SSB ଯବାନ, ମାସେ ଛୁଟିରେ ଥିଲେ
ସେପଟେ ଗତବର୍ଷ କମିଶନରେଟ ପୋଲିସର SSB ବାଟାଲିୟନର ସୁବାଶିଷ ସେଠୀ ନାମକ ଜଣେ ଯବାନ ଜୀବନ ହାରିବାକୁ ଉଦ୍ୟମ କରିଥିବାବେଳେ କଟକ ବଡ ମେଡିକାଲରେ ତାଙ୍କର ମୃତ୍ୟୁ ହୋଇଥିଲା । ତାଙ୍କ ଘର ଢେଙ୍କାନାଳ ଜିଲ୍ଲା ନରସିଂହପୁର ଅଞ୍ଚଳରେ ହୋଇଥିବାବେଳେ ସେ ମାସେ ଧରି ଛୁଟିରେ ଥିଲେ । ତେବେ ବରିଷ୍ଠ ପୋଲିସ ଅଧିକାରୀଙ୍କ ଦ୍ବାରା ମାନସିକ ଚାପର ବଶବର୍ତ୍ତୀ ହୋଇ ସେ ଜୀବନ ହାରିଥିବା ତାଙ୍କ ପରିବାର ଲୋକେ ଅଭିଯୋଗ ଆଣିଥିଲେ ।
ସେହିପରି ଗତ ବର୍ଷ ଜୁଲାଇରେ ରାଜସ୍ଥାନ ଜୟପୁରର ନରେଶ ଜାଟ ନାମକ ଜଣେ CRPF ଯବାନ ନିଜ ଉପରକୁ ୮ ରାଉଣ୍ଡ ଗୁଳି ଚଳାଇଥିଲେ । 17 ଘଣ୍ଟା ଧରି ନିଜକୁ, ଝିଅ ଓ ପତ୍ନୀଙ୍କ ସହ ରୁମରେ ବନ୍ଦ ରଖିବା ପରେ ଗୁଳି କରି ଜୀବନ ହାରିଥିଲେ ଯବାନ । ରାଜସ୍ଥାନ ଯୋଧପୁର ସହରରେ ଅବସ୍ଥିତ CRPF ର ତାଲିମ କେନ୍ଦ୍ରରେ ଜଣେ ଯବାନ ଏପରି ଜଘନ୍ୟକାଣ୍ଡ ଭିଆଇଥିବା ଜଣାପଡିଥିଲା । ନିଜକୁ ପରିବାର ସହିତ ବନ୍ଧକ ରଖିବା ପରେ ଯବାନ ଜଣକ ନିଜ ଉପରକୁ ୮ ରାଉଣ୍ଡ ଗୁଳି ଚଳାଇଥିଲେ । ନିଜ କର୍ମକ୍ଷେତ୍ରରେ କୌଣସି କାରଣ ପାଇଁ ଯବାନ ଜଣଙ୍କ ମାନସିକ ଅବସାଦରେ ଥିଲେ ବୋଲି କୁହାଯାଉଥିଲା। ତେଣୁ ମାନସିକ ଭାରସାମ୍ୟ ହରାଇ ସେ ଏପରି କାଣ୍ଡ ଭିଆଇଥିବା ସନ୍ଦେହ କରାଯାଉଥିବାବେଳେ ବାରମ୍ବାର ଯବାନଙ୍କ ଜୀବନ ହାରିବା ଖବର ସାମନାକୁ ଆସୁଛି ।
ଇଟିଭି ଭାରତ, ନୂଆପଡ଼ା
