ନୂଆପଡା: ସାପ କାମୁଡ଼ାରେ ଶିଶୁ ପୁତ୍ରର ମୃତ୍ୟୁ ଅଭିଯୋଗ। ନୂଆପଡା ଜିଲ୍ଲା ଖଡ଼ିଆଳ ଥାନା ଅନ୍ତର୍ଗତ ଚନୋଟମାଲ ଗାଁରେ ଏହି ଦୁଃଖଦ ଘଟଣା ଘଟିଛି । ଏକ ବିଷଧର ସାପ କାମୁଡ଼ିବାରୁ ଜଣେ 3 ବର୍ଷର ଶିଶୁର ମୃତ୍ୟୁ ହୋଇଥିବା ଜଣାପଡିଛି।
ମିଳିଥିବା ସୂଚନା ଅନୁସାରେ, ଚନୋଟମାଲ ଗାଁର ବିନୋଦ ଦୀପଙ୍କ 3 ବର୍ଷର ଶିଶୁ ହେମସାଗର ଦୀପ ନିଜ ଘର ପାଖ ବୁଦା ମୂଳରେ ଖେଳୁଥିଲା । ସେହି ସମୟରେ ହଠାତ୍ ଏକ ବିଷଧର ସାପ କାମୁଡି ଦେବାରୁ ଶିଶୁଟି ଚିତ୍କାର କରିଥିଲା ।
ଲୋକେ ଦୌଡି ଆସି ଦେଖିବା ବେଳକୁ ଶିଶୁଟି ଚେତାଶୂନ୍ୟ ହୋଇ ପଡିଛି। ତୁରନ୍ତ ସମ୍ପର୍କୀୟ ଚିକିତ୍ସା ପାଇଁ ଖଡ଼ିଆଳ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ନେଇଯାଇଥିଲେ । ସେଠାରେ ଚିକିତ୍ସାଧୀନ ଅବସ୍ଥାରେ ଶିଶୁକୁ ମୃତ ଘୋଷଣା କରିଛନ୍ତି ଡାକ୍ତର । ଖବର ପାଇ ଖଡ଼ିଆଳ ପୋଲିସ ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇ ଥିବାବେଳେ ଗାଁରେ ଶୋକର ଛାୟା ଖେଳିଯାଇଛି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
