ନୂଆପଡା: ଆଜି ନୂଆପଡ଼ାରେ 12 ଘଣ୍ଟିଆ ବନ୍ଦ ପାଳନ । ଜିଲ୍ଲାରେ ମେଡିକାଲ କଲେଜ ପ୍ରତିଷ୍ଠା ଦାବି ନେଇ ନୂଆପଡା ସଦର ମହୁକମା ଠାରେ 12 ଘଣ୍ଟିଆ ବନ୍ଦ ପାଳନ କରାଯାଇଛି ।ଏହାର ପ୍ରଭାବରେ ସହରର ସମସ୍ତ ଦୋକାନ ବଜାର ବନ୍ଦ ଥିବାବେଳେ, ଯାନବାହାନ ଗାଡି ଚଳାଚଳ ମଧ୍ୟ ସମ୍ପୂର୍ଣ୍ଣ ବନ୍ଦ ରହିଛି ।
ଯେଉଁଥିପାଇଁ ଯାତ୍ରୀମାନେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି। ଏହି ବନ୍ଦ ପାଳନରେ ନୂଆପଡା ଜିଲ୍ଲା ଓକିଲ ସଂଘ ଗୁରୁଦାୟିତ୍ବ ନେଇଥିବାବେଳେ, ସହରର ବ୍ୟବସାୟୀ, ମଜଦୁର, ଡ୍ରାଇଭର ଓ ଶ୍ରମିକ ସଂଘ ସମସ୍ତେ ସମର୍ଥନ କରୁଛନ୍ତି । ଯାହାଫଳରେ ବନ୍ଦ ପାଳନ ମହାବନ୍ଦରେ ପରିଣତ ହୋଇଛି ।
ଭିଡିଓ ସୌଜନ୍ୟ:ପ୍ରତିନିଧି, ନୂଆପଡା
ଏହି ବନ୍ଦ ପାଳନ ଜରିଆରେ ସରକାରଙ୍କୁ ଏକ ପ୍ରାଥମିକ ସୂଚନା ଦିଆଯାଇଛି। ଆଗାମୀ ଦିନରେ ଦାବି ପୂରଣ ନହେଲେ ଆନ୍ଦୋଳନକୁ ଆହୁରି ଜୋରଦାର କରାଯିବ ବୋଲି ଆନ୍ଦୋଳନକାରୀମାନେ ଚେତାବନୀ ଦେଇଛନ୍ତି । ଏହାକୁ ଦୃଷ୍ଟିରେ ରଖି ଶାନ୍ତିଶୃଙ୍ଖଳା ପାଇଁ ନୂଆପଡା ପୋଲିସ ମଧ୍ୟ ସଜାଗ ରହିଛି ।
ନୂଆପଡାରୁ ମୋତିଲାଲ ବାଗ, ଇଟିଭି ଭାରତ
