ସ୍ଵାତୀ ମୃତ୍ୟୁର କାରଣ ଉପରୁ ହଟୁନି ପରଦା, ଗୁଣିଆ ଉପରେ ବଢୁଛି ସନ୍ଦେହ

ବଧିପାଟଣା ଗ୍ରାମର କୁନି ଝିଅ ସ୍ଵାତୀ ମୃତ୍ୟୁ ଉପରୁ ହଟୁନି ପରଦା l ତା'କୁ ପ୍ରଥମେ ଅପହରଣ ଓ ପରେ ହତ୍ୟା କରାଯାଇ ପୋଖରୀରେ ପକାଯାଇଥିବା ଅଭିଯୋଗ କରୁଛନ୍ତି ପରିବାର l

ନୟାଗଡ: ବଧିପାଟଣା ଗ୍ରାମର କୁନି ଝିଅ ସ୍ଵାତୀ ମୃତ୍ୟୁ ଉପରୁ ହଟୁନି ପରଦା l ପୋଖରୀରେ ବୁଡ଼ି ମୃତ୍ୟୁ ହୋଇଛି ନା ତା'କୁ କିଏ ମାରିଛି ସେ ନେଇ ସମସ୍ତେ ଚିନ୍ତାରେ l ସ୍ଵାତୀକୁ ପ୍ରଥମେ ଅପହରଣ ଓ ପରେ ହତ୍ୟା କରାଯାଇ ପୋଖରୀରେ ପକାଯାଇଥିବା ଅଭିଯୋଗ କରୁଛନ୍ତି ପରିବାର l

ଅନ୍ୟ ପକ୍ଷରେ ପୋଲିସ ସ୍ଵାତୀର ମୃତଦେହ ବ୍ୟବଚ୍ଛେଦ କରି ଚୁପ ରହିଛି l ପୋଷ୍ଟମର୍ଟମ ରିପୋର୍ଟ ଆସିନଥିବାରୁ ପୋଲିସ ତଦନ୍ତକୁ ଆଗକୁ ବଢ଼ାଇ ପାରୁନି l ସ୍ଵାତୀର ପାଣିରେ ବୁଡି ମୃତ୍ୟୁ ହୋଇଥିବା ପୋଲିସ ଅନୁମାନ କରୁଛି l ଯାହାକୁ ସହଜରେ ଗ୍ରହଣ କରିପାରୁନାହାଁନ୍ତି ପରିବାର ଲୋକେ ଏବଂ ଗ୍ରାମବାସୀ l ପରିବାର ଲୋକେ ଏବଂ ଗ୍ରାମବାସୀ ଜଣେ ଗୁଣିଆ ଉପରେ ସନ୍ଦେହ ପ୍ରକଟ କରୁଥିବା ଜଣାପଡ଼ିଛି l ଗୁଣିଆ ଜଣକ ମାରିଥାଇ ପାରେ ବୋଲି ଚର୍ଚ୍ଚା ଜୋର ଧରିଛି l

ଏପଟେ ସ୍ଵାତୀକୁ ଯଦି ହତ୍ୟା କରାଯାଇ ନାହିଁ l ତାହାଲେ ପ୍ରଥମ ଦିନ ଡଗ୍‌ ସ୍କ୍ବାଡ୍‌ କାହିଁକି ସ୍ଵାତୀର ମୃତଦେହ ମିଳିଥିବା ପୋଖରୀକୁ ନ ଯାଇ ଆଉ ଏକ ପୋଖରୀକୁ ଗଲା ବୋଲି ପ୍ରଶ୍ନ ଉଠିଛି l ଅନ୍ୟପକ୍ଷରେ ସ୍ଵାତୀର ମୃତଦେହ ଉଦ୍ଧାର ଦିନ ଡଗ୍‌ ସ୍କ୍ବାଡ୍‌ ସିଧାସଳଖ ପୋଖରୀ କୂଳରୁ ସ୍ଵାତୀ ଘରକୁ ଯାଇଥିଲା l ସ୍ଵାତୀର ମୃତଦେହରେ କୌଣସି ସ୍ଥାନରେ କ୍ଷତ ଚି଼ହ୍ନ ନଥିବା ଦେଖିଥିଲା ପୋଲିସ l ଏଭଳି ଅନେକ ଦିଗରେ ସ୍ଵାତୀ ବୁଡି ପ୍ରାଣ ହରାଇଥିବା କରିଥିବା ଅନୁମାନ କରାଯାଉଛି l ତେବେ ପୋଲିସ ପୋଷ୍ଟମର୍ଟମ ରିପୋର୍ଟକୁ ଅପେକ୍ଷା କରିଛି l ପୋଷ୍ଟ ମର୍ଟମ ରିପୋର୍ଟରେ ହତ୍ୟାର ସୁରାକ ମିଳିଲେ ପୋଲିସ ହତ୍ୟାକାରୀକୁ ଖୋଜିବ l

ବୁଧବାର ସ୍ଵାତୀର ମୃତଦେହ ପରିବାରକୁ ହସ୍ତାନ୍ତର କରିଥିଲା ପୋଲିସ l ସୂଚନାଥାଉକି, ନୟାଗଡ ଜିଲ୍ଲା ରଣପୁର ଥାନା ଅଧିନ ନରେନ୍ଦ୍ରପୁର ଗ୍ରାମପଞ୍ଚାୟତ ବଧିପାଟଣା ଗ୍ରାମର ସଞ୍ଜୟ କୁମାର ସାହୁ ୩ବର୍ଷର ଶିଶୁ କନ୍ୟା ହରପ୍ରିୟା ସାହୁ (ସ୍ଵାତୀ )ଗତ ଶୁକ୍ରବାର ଠାରୁ ନିଖୋଜ ହୋଇଥିଲା l ପଞ୍ଚମ ଦିନ ଗାଁର ଏକ ପରିତ୍ୟକ୍ତ ପୋଖରୀରୁ ସ୍ଵାତୀର ମୃତ ଦେହ ମିଳିଥିଲା l ସ୍ଵାତୀକୁ ହତ୍ୟା କରାଯାଇଥିବା ପରିବାର ଲୋକେ ଅଭିଯୋଗ କରିଛନ୍ତି l

ନୟାଗଡରୁ ଜୟେନ୍ଦ୍ର ବେହେରା, ଇଟିଭି ଭାରତ