ନୟାଗଡ଼: ନୟାଗଡ଼ ଜିଲ୍ଲା ଇଟାମାଟି ଥାନା ଅନ୍ତର୍ଗତ ଖଇରପଟି ଗାଁରେ ବଧୂହତ୍ୟା ଅଭିଯୋଗ । ଅଧିକ ଯୌତୁକ ପାଇଁ ଶାଶୁଘର ଲୋକ ନବବଧୂ ବର୍ଷା ନାୟକଙ୍କୁ ତଣ୍ଟି ଚିପି ହତ୍ୟା କରିଥିବା ଅଭିଯୋଗ ହୋଇଛି । ଏଭଳି ଅଭିଯୋଗ ପରେ ବର୍ଷାଙ୍କ ଶାଶୁ, ଶ୍ବଶୁର, ନଣନ୍ଦ ଓ ଅଭିଯୁକ୍ତ ସ୍ଵାମୀ ସରୋଜ ନାୟକ ଘର ଛାଡ଼ି ଫେରାର ହୋଇଯାଇଥିବା ସୂଚନା ମିଳିଛି ।
ବର୍ଷାଙ୍କ ମୃତଦେହ ଜବତ କରି ଇଟାମାଟି ଥାନା ପୋଲିସ ତଦନ୍ତ ଆରମ୍ଭ କରିଛି । ଅଢ଼େଇ ବର୍ଷ ତଳେ ରଣପୁର ଥାନା କାକଲମା ଗାଁର ବର୍ଷା ନାୟକ ଇଟାମାଟି ଥାନା ଖଇରପଟି ଗାଁର ସରୋଜ ନାୟକଙ୍କୁ ବିବାହ କରିଥିଲେ। ଉଭୟଙ୍କର ଏକ ବର୍ଷ ର କନ୍ୟା ସନ୍ତାନ ଅଛି । କିନ୍ତୁ ବର୍ଷାଙ୍କ ଶାଶୁ ଘର ଲୋକେ ବର୍ଷାଙ୍କୁ ଅଧିକ ଯୌତୁକ ଆଣିବା ପାଇଁ ବାଧ୍ୟ କରି ଶାରିରୀକ ଓ ମାନସିକ ନିର୍ଯାତନା ଦେଉଥିବା ଅଭିଯୋଗ ଆଣିଛନ୍ତି ବର୍ଷାଙ୍କ ପରିବାର ଲୋକ ।
ତେବେ ଆଜି(ସୋମବାର) ବର୍ଷାଙ୍କ ମୃତଦେହ ତାଙ୍କ ଶାଶୁ ଘରୁ ମିଳିବା ପରେ ବର୍ଷାଙ୍କ ସ୍ବାମୀଙ୍କ ସହ ଶାଶୁ ଘର ଲୋକ ଫେରାର ହୋଇଯିବା ସନ୍ଦେହକୁ ଆହୁରି ଘନୀଭୂତ କରିଛି । ତେବେ ପୋଲିସ ଏନେଇ ଏକ ମାମଲା ରୁଜୁ କରି ମୃତଦେହ ଜବତ କରିବା ସହ ତଦନ୍ତ ଜାରି ରହିଛି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
