ନୟାଗଡ଼: ରାସ୍ତାକୁ ନେଇ ପୁଣି ତେଜିଲା ଆନ୍ଦୋଳନ । ନୟାଗଡ଼ ସଦର ଥାନା ଗୁଡୁ ପାଙ୍ଗି ଏବଂ 17 ଖଣ୍ଡ ମୌଜା ମଧ୍ୟରେ ଲାଗିଥିବା ଦୀର୍ଘ ଦିନର ବିବାଦ ଆଜି ପୁଣି ଉଗ୍ର ରୂପ ନେଇଛି । ପ୍ରଶାସନ ଏବଂ ଶାନ୍ତି କମିଟି ପକ୍ଷରୁ ବାରମ୍ବାର ଆଲୋଚନା ବିଫଳ ହେବା ପରେ ପୁଣି ଜାତୀୟ ରାଜପଥକୁ ଓହ୍ଲାଇଛନ୍ତି ଏଠାକାର ଅଧିବାସୀ । ଖୋର୍ଦ୍ଧା-ବଲାଙ୍ଗୀର 57 ନମ୍ବର ଜାତୀୟ ରାଜପଥକୁ ଶିମିଳି ସାହି ଠାରେ ଅବରୋଧ କରିଛନ୍ତି 17 ଖଣ୍ଡ ମୌଜାର ଅଧିବାସୀ । ଗୁଡୁପାଙ୍ଗି ଗାଁ ଏବଂ 17 ଖଣ୍ଡ ମୌଜା ମଧ୍ୟରେ ଦୀର୍ଘ ଦିନ ହେବ ଏକ ରାସ୍ତାକୁ ନେଇ ବିବାଦ ଲାଗି ରହିଥିଲା ।
ଏହି ମୌଜାକୁ ଯିବାକୁ ଗୋଟିଏ ରାସ୍ତା ଥିବା ବେଳେ ଗୁଡୁ ପାଙ୍ଗି ଗ୍ରାମବାସୀ ଏହି ରାସ୍ତା ପାଇଁ ଥିବା ସରକାରୀ ଯାଗା ଛାଡୁ ନଥିବା ନେଇ 17 ଖଣ୍ଡ ମୌଜା ଅଧିବାସୀ ଅଭିଯୋଗ କରିଆସୁଥିଲେ । ପରେ ଏହାର ପ୍ରତିବାଦରେ ବିଗତ ଦିନରେ ରାସ୍ତାରୋକ ହୋଇଥିଲା । ତେବେ ଶାନ୍ତି କମିଟି ଏବଂ ଜିଲ୍ଲା ପ୍ରଶାସନ ପକ୍ଷରୁ ବାରମ୍ବାର ସଭା କରାଯାଇ ନିଷ୍ପତ୍ତି ପାଇଁ ଉଦ୍ୟମ ହୋଇଥିଲା ବେଳେ କୌଣସି ସ୍ଥାୟୀ ସମାଧାନ ହୋଇପାରି ନ ଥିଲା । ତେଣୁ ଆଜି 17 ଖଣ୍ଡ ମୌଜା ଅଧିବାସୀ ପୁଣି ଜାତୀୟ ରାଜପଥକୁ ଅବରୋଧ କରିଛନ୍ତି । ଫଳରେ ଯାତାୟତ ସମ୍ପୂର୍ଣ ବନ୍ଦ ହେବା ସହ ଶହ ଶହ ଯାନବାହନ ରାସ୍ତାରେ ଅଟକି ରହିଛି ।
ନୟାଗଡରୁ ଜୟେନ୍ଦ୍ର ବେହେରା, ଇଟିଭି ଭାରତ
