ନୟାଗଡ଼: ହଜିଗଲା ମାନବିକତା । ଶାଶୁ ଅସୁସ୍ଥ ଥିବା ସତ୍ତ୍ବେ ଘର ଭିତରକୁ ଯିବାକୁ ବାରଣ କଲା ବୋହୁ । ବୋହୁର ବିରୋଧ ପାଇଁ ଚାଲିଗଲା ଶାଶୁଙ୍କ ଜୀବନ । ମୃତ୍ୟୁ ପରେ ମଧ୍ୟ ୧୮ ଘଣ୍ଟାରୁ ଊର୍ଦ୍ଧ ସମୟ ଘର ଆଗରେ ପଡିରହିଲା ମୃତଦେହ । ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି ନୟାଗଡ଼ ଜିଲ୍ଲା ରଣପୁର ବ୍ଲକ ଅନ୍ତର୍ଗତ ହରିହରପୁର ଗ୍ରାମରେ ।
ସୂଚନା ଅନୁସାରେ ହରିହରପୁର ଗ୍ରାମର ନିରଞ୍ଜନ ନାୟକଙ୍କ ମାଆ ମୀନା ନାୟକ କିଛିଦିନ ହେବ ଅସୁସ୍ଥ ଥିବାରୁ ସେ ଭୁବନେଶ୍ବରର ଏକ ଘରୋଇ ହସ୍ପିଟାଲରେ ଚିକିତ୍ସା ହେଉଥିଲେ । ଚିକିତ୍ସା ପରେ ଗାଁକୁ ଫେରିଥିଲେ ମୀନା । କିନ୍ତୁ ପାରିବାରିକ କଳହ ପାଇଁ ତାଙ୍କ ବୋହୁ ପୁଷ୍ପଲତା ନାୟକ ଶାଶୁଙ୍କୁ ଘରକୁ ଆଣିବାକୁ ବିରୋଧ କରି ଭିତର ପଟୁ ଘରକୁ ତାଲା ପକାଇଥିଲେ । ଫଳରେ ପୁଷ୍ପଲତାଙ୍କ ସ୍ବାମୀ ଓ ଶାଶୁ ରାତିସାରା ଘର ଦାଣ୍ଡରେ ବସି ରହିଲେ ।
ଏହି ସମୟରେ ଶାଶୁ ମୀନା ନାୟକଙ୍କର ମୃତ୍ୟୁ ହୋଇଥିଲା । ଖବର ପାଇ ସକାଳୁ ଘଟଣାସ୍ଥଳରେ ଚାନ୍ଦପୁର ଥାନା ପୋଲିସ ପହଞ୍ଚି ବୋହୁଙ୍କୁ ବୁଝାସୁଝା କରିଥିବା ବେଳେ ଗାଁ ଲୋକଙ୍କ ହସ୍ତକ୍ଷେପ ପରେ ମୃତଦେହର ଅନ୍ତିମ ସଂସ୍କାର କରାଯାଇଛି । ପୋଲିସ ଏହି ଘଟଣାର ତଦନ୍ତ କରୁଛି । ତେବେ ବୋହୁଙ୍କ ଏଭଳି କାର୍ଯ୍ୟକୁ ସାଧାରଣ ନିନ୍ଦା କରାଯିବା ସହ ସ୍ଥାନୀୟ ଅଞ୍ଚଳରେ ବେଶ ଚର୍ଚ୍ଚା ଲାଗି ରହିଛି ।
ଇଟିଭି ଭାରତ, ନୟାଗଡ଼
