ନୟାଗଡ: କଟକ LIC ଏଜେଣ୍ଟ ଶୈଳେନ୍ଦ୍ର ହତ୍ୟାକାଣ୍ଡ ଘଟଣା । ହତ୍ୟାକାଣ୍ଡର ଡେମୋ ଦେଖାଇଲା ମୁଖ୍ୟ ଅଭିଯୁକ୍ତ ଦିପୁ ସାହୁ । ବହୁ ଚର୍ଚ୍ଚିତ କଟକ LIC ଏଜେଣ୍ଟ ଶୈଳେନ୍ଦ୍ର ହତ୍ୟାକାଣ୍ଡ ଘଟଣାରେ ହତ୍ୟାର ଡେମୋ ଦେଖାଇଲା ମୁଖ୍ୟ ଅଭିଯୁକ୍ତ ଦିପୁ ସାହୁ । ପତ୍ନୀଙ୍କ ପରକିୟା ପ୍ରୀତି କାରଣରୁ ଶୈଳେନ୍ଦ୍ରଙ୍କୁ ହତ୍ୟା କରିଥିବା କହିଛି ଦିପୁ । ଶୈଳେନ୍ଦ୍ର ଦିପୁଙ୍କ ଘରକୁ ଆସିଥିବା ଜାଣି ହତ୍ୟାର ସୁଚିନ୍ତିତ ଯୋଜନା କରିଥିଲା ଦିପୁ ।
ଦିପୁ ଏବଂ ତାଙ୍କ ପତ୍ନୀ ସୁନିତା ସାହୁ କଟକରେ ରହି ଦହିବରା ବେପାର କରୁଥିଲେ । ଏହି ସମୟରେ LIC କରିବାକୁ ଅନୁରୋଧ କରିଥିଲେ ଶୈଳେନ୍ଦ୍ର ଜେନା । ପରେ ସୁନିତା ଏବଂ ଶୈଳେନ୍ଦ୍ରଙ୍କ ମଧ୍ୟରେ ପ୍ରେମ ସମ୍ପର୍କ ଆରମ୍ଭ ହୋଇଥିଲା । ଏହି ପରକୀୟା ପ୍ରେମକୁ ସହି ନ ପାରି କଟକରୁ ଘରକୁ ଫେରି ଆସିଥିଲେ ଦିପୁ । କିନ୍ତୁ ସୁନିତା ଏବଂ ଶୈଳେନ୍ଦ୍ରଙ୍କ ପ୍ରେମ ସମ୍ପର୍କ ଜାରି ରହିଥିଲା । ପରେ ଦିପୁଙ୍କ ଘର ନୟାଗଡ଼ ଜିଲ୍ଲା ନୂଆଗାଁ ଥାନା ମହୀପୁର ପାଟୁଳିସାହିକୁ ଗତ 3 ତାରିଖରେ ଆସିଥିଲେ ଶୈଳେନ୍ଦ୍ର ।
ଶୈଳେନ୍ଦ୍ରଙ୍କୁ ରାତିରେ ଦେଖି ଲୁହାରଡରେ ଆକ୍ରମଣ କରି ହତ୍ୟା କରିଥିଲା ଦିପୁ । ପରେ ପ୍ରମାଣ ନଷ୍ଟ କରିବା ପାଇଁ ରାତାରାତି ଘର ଠାରୁ ପ୍ରାୟ 1 କିଲୋମିଟର ଦୂର ଗହୀରକୁ ଏକ ସ୍କୁଟି ସାହାଯ୍ୟରେ ମୃତଦେହକୁ ନେଇଥିଲା । ଏଥିରେ ଦିପୁଙ୍କୁ ସହଯୋଗ କରିଥିଲା ତାଙ୍କ ବନ୍ଧୁ ଗ୍ୟାରେଜ ଦୋକାନୀ ସୁରେଶ ସାହୁ । ଉଭୟେ ମିଶି ହତ୍ୟା କରିଥିବା ଗଣମାଧ୍ୟମ ଆଗରେ କହିଛି ଦିପୁ । ଗହୀରକୁ ନେଇ ପ୍ରମାଣ ନଷ୍ଟ ପାଇଁ ପାଳ ସାହାଯ୍ୟରେ ମୃତଦେହକୁ ପ୍ରଥମେ ପୋଡିଥିଲେ ଉଭୟେ । ପୋଡ଼ିବା ପରେ ଦେଖାଯାଉଥିବା ହାଡ଼କୁ ହାତୁଡିରେ ପିଟି ଅବଶିଷ୍ଟ ହାଡ଼କୁ ନିକଟସ୍ଥ ପୋଖରୀରେ ଫୋଫାଡ଼ିଥିଲା ଦିପୁ । ହତ୍ୟାକାଣ୍ଡ ସ୍ଥଳ ଠାରୁ ଆରମ୍ଭ କରି ଶୈଳେନ୍ଦ୍ରଙ୍କ ଶବ ପୋଡିବା ସ୍ଥାନ ପର୍ଯ୍ୟନ୍ତ ସବୁ ସତ ମାନିଛି ଦିପୁ । ଆଜି ସକାଳେ ଆତ୍ମସମର୍ପଣ କରିଥିବା ବାପା ପୁଅଙ୍କୁ ଗିରଫ କରିଛି ନୂଆଗାଁ ପୋଲିସ ।
ଉଭୟଙ୍କୁ ପଚାରାଉଚରା କରିବା ପରେ ଦିପୁଙ୍କୁ ଧରି ଆଜି ଅପରାହ୍ନରେ ନୟାଗଡ଼ ଜିଲ୍ଲା ନୂଆଗାଁ ଥାନା ମହୀପୁର ପାଟୁଳିସାହି ଗାଁରେ ପହଁଞ୍ଚିଥିଲା ପୋଲିସ । ଗୋଟି ଗୋଟି କରି ସତ ଓଗାଳିଥିଲା ଦିପୁ । ହତ୍ୟାର ଡେମୋ ଦେଖାଇ ସାରିବା ପରେ ନୂଆଗାଁ ଥାନାକୁ ଆଣିଛି ପୋଲିସ । ପୂର୍ବରୁ ଏହି ଘଟଣାରେ ସୁନିତା ସାହୁ ଏବଂ ସୁରେଶ ସାହୁଙ୍କୁ ଗିରଫ କରିଥିଲା ପୋଲିସ । ଆସନ୍ତାକାଲି ମୁଖ୍ୟ ଅଭିଯୁକ୍ତ ଦିପୁ ସାହୁ ଏବଂ ତାଙ୍କ ବାପା ଭାବ ସାହୁଙ୍କୁ କୋର୍ଟ ଫରୱାର୍ଡ କରିବ । ପୂର୍ବରୁ ଶୈଳେନ୍ଦ୍ରଙ୍କ DNA ପରୀକ୍ଷା ପାଇଁ ଫରେନସିକ୍ ଲ୍ୟାବକୁ ପଠାଇଛି ପୋଲିସ ।
ଇଟିଭି ଭାରତ, ନୟାଗଡ
