ନୟାଗଡ: ନୟାଗଡ ଜିଲ୍ଲା ରଣପୁର ବ୍ଲକ ଅନ୍ତର୍ଗତ ମହତପଲ୍ଲା ଗ୍ରାମରେ ଘଟିଛି ଏକ ଅଭାବନୀୟ ଘଟଣା । ଶନିବାର ବିଳମ୍ବିତ ରାତିରେ ଜଣେ ନାବାଳକକୁ ଅତି ନିର୍ମମ ଭାବେ ଛୁରୀରେ ବେକ କାଟି ହତ୍ୟା କରିଛି ନିଜ ବଡବାପା ପୁଅ ଭାଇ । ମୃତକଙ୍କ ନାମ ସୁମନ ବେହେରା । ଖବର ପାଇ ପୋଲିସ ଘଟଣାସ୍ଥଳରେ ପହଁଚି ଶବ ଉଦ୍ଧାର କରିବା ସହ ବ୍ୟବଚ୍ଛେଦ ପାଇଁ ରଣପୁର ମେଡିକାଲକୁ ପଠାଇଛି । ସୁମନଙ୍କ ବଡବାପା ପୁଅ ଭାଇ ସୋମନାଥ ତାଙ୍କୁ ଘରୁ ଡାକି ନେଇ ହତ୍ୟା କରିଥିବା ଲିଖିତ ଅଭିଯୋଗ କରିଛନ୍ତି ସୁମନଙ୍କ ବଡଭାଇ। ତେବେ ଅର୍ଥଲୋଭର ଏହି ହତ୍ୟାକାଣ୍ଡ ଘଟିଥିବା ସନ୍ଦେହ କରାଯାଉଥିବାବେଳେ ପୋଲିସ ତଦନ୍ତ ଚଳାଇଛି ।
ମୃତକ ଜଣକ ନାବାଳକ ଥିବାବେଳେ ସେ ନବମ ଶ୍ରେଣୀରେ ପାଠ ପଢୁଥିଲେ । ତାଙ୍କ ବାପାଙ୍କର 8 ବର୍ଷ ତଳେ ପରଲୋକ ଘଟିଛି । ସୁମନଙ୍କ ମାଆ ଜୟନ୍ତୀ ବେହେରା ଗୋଟେ ସ୍କୁଲରେ ରୋଷେୟା ଭାବେ କାମ କରନ୍ତି । ଗତକାଲି ବିଳମ୍ବିତ ରାତିରେ ସୋମନାଥ ସୁମନଙ୍କୁ ଘରୁ ଡାକି ନେଇ ଯାଇଥିଲେ । ବ୍ରାଉନସୁଗାର ଖାଇ ବଡବାପା ପୁଅ ସୁମନଙ୍କୁ ହତ୍ୟା କରିଥିବା ତାଙ୍କ ବଡଭାଇ ରଣପୁର ଥାନାରେ ଅଭିଯୋଗ କରିଛନ୍ତି । ଏହାସହ ତାଙ୍କୁ ଆଜୀବନ କାରାଦଣ୍ଡ କିମ୍ବା ଫାଶୀ ଦଣ୍ଡ ଦେବାକୁ ସେ ଦାବି କରିଛନ୍ତି ।
ହତ୍ୟା କରିଥିବା ସମ୍ପର୍କୀୟ ଭାଇକୁ ଗାଁ ଲୋକେ ଅଟକ ରଖିଛନ୍ତି । ଖୁବଶୀଘ୍ର ପୋଲିସ ତାଙ୍କୁ ଗିରଫ କରିବ ବୋଲି ସୂଚନା ମିଳିଛି । ତେବେ ଅର୍ଥଲୋଭରୁ ସୁମନଙ୍କୁ ବଡବାପା ପୁଅ ଭାଇ ହତ୍ୟା କରିଥିବା ଅନୁମାନ କରଯାଉଛି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
