ନୟାଗଡ: ନୟାଗଡ ଜିଲ୍ଲା ଭାପୁର ବ୍ଲକ ପଦ୍ମବତୀ ମଧ୍ୟ ଦେଇ ପ୍ରବାହିତ ମହାନଦୀ ଗର୍ଭରୁ ପ୍ରାଚୀନ ମନ୍ଦିରର ଦଧିନଉତି ଦୃଶ୍ୟମାନ ହୋଇଛି । ମହାନଦୀରେ ପ୍ରାୟ ୫୦୦ ବର୍ଷ ତଳର ଏହି ଗୋପୀନାଥ ମନ୍ଦିର (ରାଧାକୃଷ୍ଣ/ବିଷ୍ଣୁ) ମନ୍ଦିର ଜଳ ଭିତରେ ଦେଖାଯିବା ଖବରକୁ ନେଇ ଜାତୀୟ ଗଣମାଧ୍ୟମରେ ମଧ୍ୟ ଚର୍ଚ୍ଚାର ପ୍ରସଙ୍ଗ ପାଲଟିଛି । ଇଣ୍ଡିଆନ ନ୍ୟାସନାଲ ଟ୍ରଷ୍ଟ ଫର୍ ଆର୍ଟ ଆଣ୍ଡ୍ କଲଚରାଲ୍ ହେରିଟେଜ୍ (ଇନଟାକ୍) ର ପ୍ରତ୍ନତାତ୍ତ୍ବିକ ସର୍ବେକ୍ଷଣ ଦଳ ପକ୍ଷରୁ ମହାନଦୀ ଅବବାହିକା ଐତିହ୍ୟସ୍ଥଳ ପ୍ରଲେଖନ ପ୍ରକଳ୍ପ କାର୍ଯ୍ୟବେଳେ ମହାନଦୀ ଗର୍ଭରୁ ଏହି ପ୍ରାଚୀନ ଜଳମଗ୍ନ ମନ୍ଦିର ଆବିଷ୍କାର ହୋଇଛି ।
ଇନଟାକ୍ର ପ୍ରୋଜେକ୍ଟ ଆସିଷ୍ଟାଣ୍ଟ ଦୀପକ କୁମାର ନାୟକ ଓ ତାଙ୍କ ସହଯୋଗୀ ରବିନ୍ଦ୍ର ରଣାଙ୍କ ମୁତାବକ ଏହି ମନ୍ଦିର ଭଗବାନ ବିଷ୍ଣୁଙ୍କର ଏକ ରୂପ, ଭଗବାନ ଗୋପୀନାଥଙ୍କର 60 ଫୁଟ ବିଶିଷ୍ଟ ମନ୍ଦିର ।
ପ୍ରକଳ୍ପ ସଂଯୋଜକ ଅନୀଲ ଧୀର କହିବା ଅନୁଯାୟୀ ମନ୍ଦିର 60 ଫୁଟ ମଧ୍ୟରେ ଜଳମଗ୍ନ ଏହି ମନ୍ଦିରର ଚୁଡା ନିର୍ମାଣ ଶୈଳୀ ଏବଂ ନିର୍ମାଣ ପାଇଁ ବ୍ୟବହୃତ ସାମଗ୍ରୀକୁ ବିଚାର କରି ପଞ୍ଚଦଶ ଶତାବ୍ଦୀର ଶେଷ କିମ୍ବା ଷୋଡଶ ଶତାବ୍ଦୀର ପ୍ରାରମ୍ଭରୁ ଏହି ମନ୍ଦିର ନିର୍ମାଣ ହୋଇଥିବା ଅନୁମାନ କରାଯାଇପାରେ ।
ଯେଉଁ ଅଞ୍ଚଳରେ ମନ୍ଦିର ଦେଖିବାକୁ ମିଳିଥିଲା ସେହି ସ୍ଥାନକୁ ‘ସାତପାଟଣା’ ଭାବରେ କୁହାଯାଉଥିଲା । ପଦ୍ମାବତୀ ଗ୍ରାମ ସାତପାଟଣାର ଏକ ଅଂଶ ଥିଲା ଯାହା ସାତୋଟି ଗାଁର ମିଶ୍ରଣ ଅଟେ | ଏହି ମନ୍ଦିର ଭଗବାନ ଗୋପୀନାଥ ଦେବଙ୍କୁ ଉତ୍ସର୍ଗ କରାଯାଇଥିଲା । ଉନବିଂଶ ଶତାବ୍ଦୀରେ ନଦୀ ଗତି ବଦଳାଇବା ସହିତ ଏହାର ପ୍ରବାହ ବଦଳିଗଲା ଏବଂ ସମଗ୍ର ଗାଁ ନଦୀ ଗର୍ଭରେ ବୁଡି ଯାଇଥିଲା । ଗ୍ରାମବାସୀ ସମସ୍ତ ମନ୍ଦିରର ଦେବତାମାନଙ୍କ ସହିତ ଉଚ୍ଚ ସ୍ଥାନକୁ ସ୍ଥାନାନ୍ତରିତ ହୋଇଥିଲେ । ପଦ୍ମାବତୀ ଗ୍ରାମରେ ଏବେ ମଧ୍ୟ ଭଗବାନ ଗୋପୀନାଥଙ୍କ ମୂଳ ପ୍ରତିମା ମନ୍ଦିରରେ ପୂଜା ପାଉଛନ୍ତି ।
ପଦ୍ମାବତୀ ଗାଁର ଲୋକ କହିଛନ୍ତି ଯେ ଏହି ଅଞ୍ଚଳରେ ପ୍ରାୟ 22 ଟି ମନ୍ଦିର ଅଛି ଯାହା ଜଳ ତଳେ ଅଛି, କିନ୍ତୁ ଗୋପୀନାଥ ଦେବ ମନ୍ଦିରର କେବଳ ଚୁଡା କିଛି ବର୍ଷ ପର୍ଯ୍ୟନ୍ତ ଦୃଶ୍ୟମାନ ହେଉଥିଲା କାରଣ ଏହା ସବୁଠାରୁ ଉଚ୍ଚ ଥିଲା । ଶେଷ ଥର ପାଇଁ 11 ବର୍ଷ ପୂର୍ବେ ମନ୍ଦିର ଚୂଡା ଦେଖାଯାଇଥିଲା | ଗତ ଏକ ବର୍ଷ ମଧ୍ୟରେ ଜଳ ସ୍ତର ପରିବର୍ତ୍ତନ ହେତୁ ଏହା 4 ରୁ 5 ଦିନ ପର୍ଯ୍ୟନ୍ତ ଦେଖାଯାଇଥିଲା ।
ଇଣ୍ଡିଆନ ନ୍ୟାସନାଲ ଟ୍ରଷ୍ଟ ଫର୍ ଆର୍ଟ ଆଣ୍ଡ୍ କଲଚରାଲ୍ ହେରିଟେଜ୍ (ଇନଟାକ୍) ପ୍ରକଳ୍ପ ସଂଯୋଜକ ଅନୀଲ ଧୀରଙ୍କ ଅନୁଯାୟୀ ‘ଡକ୍ୟୁମେଣ୍ଟେସେନ୍ ଅଫ୍ ଦି ହେରିଟେଜ୍ ଅଫ୍ ଦ ମହାନଦୀ ରିଭର୍ ଭ୍ୟାଲି’ ପ୍ରକଳ୍ପ ଆରମ୍ଭ କରାଯାଇଛି । ମହାନଦୀର ଉତ୍ପତ୍ତିସ୍ଥଳ ଓ ମହାନଦୀର ସମୁଦ୍ର ସହିତ ମିଳନ ସ୍ଥଳ ପର୍ଯ୍ୟନ୍ତ ଉଭୟ ପାର୍ଶ୍ବର 5 କିଲୋମିଟର ବ୍ୟାସାର୍ଦ୍ଧ ଭିତରେ ବିଲୀନ ଐତିହ୍ୟ ଉପରେ ଏକ ଡକ୍ୟୁମେଣ୍ଟ ପ୍ରସ୍ତୁତ କରାଯାଉଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
