ନୟାଗଡ଼: 2008 ମସିହା ଫେବୃଆରୀ 15 ଅର୍ଥାତ ଆଜିର ଦିନରେ ନୟାଗଡରେ ଲୋମହର୍ଷଣକାରୀ, ଛାତିଥରା ମାଓ ଆକ୍ରମଣକୁ ପୁରିଛି 13ବର୍ଷ । ରାତି ପ୍ରାୟ 10 ଟା 45 ରୁ ଆକ୍ରମଣ ଆରମ୍ଭ ହୋଇଯାଇଥିଲା । ସାରା ଦେଶକୁ ସ୍ତବ୍ଧ କରିଦେଇଥିବା ସେହି କାଳ ରାତିର ଘଟଣା ମନେପଡିଲେ ଏବେବି ଜିଲ୍ଲା ବାସିଙ୍କ ଲୋମ ଟାଙ୍କୁରି ଉଠେ । 200ରୁ ଉର୍ଦ୍ଧ ସଶସ୍ତ୍ର ମାଓବାଦୀ ଜିଲ୍ଲାର 6ଟି ସ୍ଥାନରେ ରଚିଥିଲେ ମହାତାଣ୍ଡବ । ଅପରେସନ ସଫଳତା ପରେ ‘‘ଭାରତ ମାତାକି ଜୟ’’ର ମଧ୍ୟ ସ୍ଲୋଗାନ ଦେଉଥିଲେ । ମାଓବାଦୀଙ୍କ ଆକ୍ରମଣରେ ଜଣେ ସାଧାରଣ ଲୋକ ସମେତ ଚାଲିଯାଇଥିଲା 15 ଜଣ ପୋଲିସଙ୍କ ଜୀବନ ।
ମାଓ ଆକ୍ରମଣକୁ 13 ବର୍ଷ, କାହାଣୀ ବଖାଣିଲେ ପ୍ରତ୍ୟକ୍ଷ ଦର୍ଶୀ ମହିଳା କନେଷ୍ଟବଳ ପ୍ରତିମା ବୋମା ମାଡରେ ଥରି ଉଠିଥିଲା ରିଜର୍ଭ ଅଫିସ, ନୟାଗଡ ଥାନା, ଅସ୍ତ୍ରାଗାର, ମହିପୁର ଫାଣ୍ଡି, ନୂଆଗାଁ ଓ ଦଶପଲ୍ଲା ଥାନା । ଆକ୍ରମଣ କରିବା ସହ ନୟାଗଡ ଅସ୍ତ୍ରାଗାରରୁ ଲୁଟି ନେଲେ ଅତ୍ୟାଧୁନିକ ଶହଶହ ଅସ୍ତ୍ରଶସ୍ତ୍ର । ଅତି ବିଭତ୍ସ ଭାବେ ହତ୍ୟା କରିଥିଲେ 15 ଜଣ ପୋଲିସଙ୍କ ସମେତ ଜଣେ ସାଧାରଣ ଲୋକଙ୍କୁ । ଏହି ଆକ୍ରମଣରେ 5 ରୁ ଉର୍ଦ୍ଧ୍ୱ ଗୁରୁତର ହୋଇଥିଲେ । ତେବେ ଏହି ଦିନ ନୟାଗଡ଼ ଜିଲ୍ଲା ପୋଲିସ ପାଇଁ ଏକ ଦୁଃଖଦ ଦିନ ଥିଲା । ଆଉ ଏଭଳି ସମୟ ନଆସିବା ପାଇଁ ପୋଲିସ ସର୍ବଦା ପ୍ରୟାସ କରୁଛି । ଇତି ମଧ୍ୟରେ ନୟାଗଡ଼କୁ ମାଓ ପ୍ରବଣ ଜିଲ୍ଲାରୁ ବାଦ ଦିଆଯାଇଛି । ସେଦିନ ମାଓ ଆକ୍ରମଣର ଶିକାର ହୋଇଥିଲେ ମହିଳା କନେଷ୍ଠବଳ ପ୍ରତିମା ରାଉତ । 4ଟି ଗୁଳିର ଶିକାର ହୋଇଥିଲେ ସେ । ତାଙ୍କୁ ତଳେ ଶୁଆଇ ଗୁଳି ଚାଳନା କରିଥିଲେ ମାଓବାଦୀ । ସେମାନେ ଭାବିଥିଲେ ଯେ, ପ୍ରତିମାଙ୍କ ମୃତ୍ୟୁ ହୋଇଯାଇଛି କିନ୍ତୁ, ସୌଭାଗ୍ୟବଶତଃ ସେ ବର୍ତ୍ତି ଯାଇଥିଲେ । 4 ଟି ଗୁଳି ଖାଇ ଏବେବି ସେ କର୍ତ୍ତବ୍ୟ ନିର୍ବାହ କରୁଛନ୍ତି । ଶରୀରରେ ଏବେ ମଧ୍ୟ ଗୁଳିର କିଛି ଅଂଶ ଥିବାରୁ ନିଜକୁ ଅସୁସ୍ଥ ମଣୁଥିବା ସେ କହିଛନ୍ତି ।
ନୟାଗଡ଼ରୁ ଜୟେନ୍ଦ୍ର ବେହେରା, ଇଟିଭି ଭାରତ
