ନବରଙ୍ଗପୁର: ଲଗାଣ ବର୍ଷା ଯୋଗୁଁ ନବରଙ୍ଗପୁରରେ ଅସ୍ତବ୍ୟସ୍ତ ହୋଇ ପଡିଛି ସାଧାରଣ ଜନ ଜୀବନ । ଫଳରେ ସ୍ଥାନୀୟ ପାପଡାହାଣ୍ଡି ବ୍ଲକ ଖୁଟୁବାଇ ପଞ୍ଚାୟତ ଅନ୍ତର୍ଗତ ଦାମାପାଲା ଓ ସାନଦାମାପାଲା ଗ୍ରାମକୁ ସଂଯୋଗ କରୁଥିବା କାଦୁଅ ରାସ୍ତାରେ ଗ୍ରାମବାସୀ ଧାନ ଗଛ ଲଗାଇ ପ୍ରତିବାଦ କରିଥିବା ଦେଖିବାକୁ ମିଳିଛି । ସୂଚନା ଅନୁଯାୟୀ ଖୁଟୁବାଇ ପଞ୍ଚାୟତର ଦାମାପାଲା ଓ ସାନଦାମାପାଲା ଗ୍ରାମକୁ ସଂଯୋଗ କରୁଥିବା ପ୍ରାୟ 1 କିଲୋମିଟର ରାସ୍ତା ଲଗାଣ ବର୍ଷାରେ ଶୋଚନୀୟ ହୋଇ ପଡିଛି ।
ଏନେଇ ଗ୍ରାମବାସୀମାନେ ବହୁବାର ସ୍ଥାନୀୟ ସରପଞ୍ଚ, ସମିତି ସଭ୍ୟ, ବିଡ଼ିଓ, ସାଂସଦ, ଡାବୁଗାଁ ବିଧାୟକଙ୍କୁ ରାସ୍ତା ନିର୍ମାଣ ପାଇଁ ଦାବି କରିଥିଲେ । କିନ୍ତୁ ଏହି ସମସ୍ୟା ପ୍ରତି କେହି ଧ୍ୟାନ ଦେଇନଥିବା ଗ୍ରାମବାସୀମାନେ ଅଭିଯୋଗ କରିଛନ୍ତି । ଏହି ରାସ୍ତା ଉପରେ ପଞ୍ଚାୟତ କାର୍ଯ୍ୟାଳୟକୁ ଗରିବ ଲୋକେ ଚାଉଳ, କିରୋସିନ, ଡାକ୍ତରଖାନା ସହ ଅନ୍ୟ କାର୍ଯ୍ୟ ପାଇଁ ନିର୍ଭର କରନ୍ତି । ହେଲେ ଲଗାଣ ବର୍ଷା ଯୋଗୁଁ ଏହି ରାସ୍ତାରେ ଏତେ ମାତ୍ରାରେ କାଦୁଅ ଭରିଯାଇଛି କି ଏଠାରେ ଏବେ ଚାଲିବା ବି କଷ୍ଟକର ହୋଇ ପଡିଛି ।
ତେବେ ଏହି ଗୁରୁତର ସମସ୍ୟା ପ୍ରତି ପ୍ରଶାସନର ଦୃଷ୍ଟି ଆକର୍ଷଣ କରିବା ପାଇଁ ଗ୍ରାମର ଶତାଧିକ ଲୋକେ ଧାନ ତଳି ଆଣି ରାସ୍ତାରେ ଲଗାଇ ପ୍ରତିବାଦ କରିଥିବା ଦେଖିବାକୁ ମିଳିଛି । ସେହିପରି ମାଲେକୋଟ ଛକଠାରୁ ଖୁଟୁବାଇ ଗ୍ରାମର ପାୟ 7 କିଲୋମିଟର ରାସ୍ତା ମଧ୍ୟ ଶୋଚନୀୟ ଅବସ୍ଥାରେ ରହିଛି । ଏହି ରାସ୍ତା ଗତ 2001 ମସିହାରେ ପ୍ରଧାନମନ୍ତ୍ରୀ ସଡକ ଯୋଜନାରେ ସାମିଲ କରି ନିର୍ମାଣ କରାଯାଇଥିଲା । ହେଲେ ପ୍ରାୟ 20 ବର୍ଷ ହେଲା ଏହି ରାସ୍ତାରେ ଟଙ୍କାଟିଏ ବି ଖର୍ଚ୍ଚ କରାଯାଇନଥିବାରୁ ଏବେ ଏହି ରାସ୍ତା ମରଣଯନ୍ତା ପାଲଟିଥିବା ଗ୍ରାମବାସୀ ଅଭିଯୋଗ କରିଛନ୍ତି ।
ତେଣୁ ଯଦି ଜିଲ୍ଲା ପ୍ରଶାସନ ପକ୍ଷରୁ ତୁରନ୍ତ ଏହି ରାସ୍ତାର ନିର୍ମାଣ ନହୁଏ ତେବେ ଆଗାମୀ ଦିନରେ ଖୁଟୁବାଇ ପଞ୍ଚାୟତବାସୀ ଗଣଧାରଣା ଦେବା ସହ ଜନ ଆନ୍ଦୋଳନ କରିବାକୁ ଚେତାବନୀ ଦେଇଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
