ନବରଙ୍ଗପୁର: କୋରୋନା ମୁକାବିଲା ନାମରେ ବକ୍ସାଗୁଡା ଗ୍ରାମକୁ ପ୍ରବେଶ ବନ୍ଦ କଲେ ଗ୍ରାମବାସୀ । ନବରଙ୍ଗପୁର ଜିଲ୍ଲା କୋଡିଙ୍ଗା ଥାନା ଅନ୍ତର୍ଗତ ବକ୍ସାଗୁଡା ଗ୍ରାମର ପ୍ରବେଶ ପଥକୁ ଆଜି ଗ୍ରାମବାସୀ ସମ୍ପୂର୍ଣ୍ଣ ବନ୍ଦ କରିଦେଇଛନ୍ତି । କୋରୋନା ଭୂତାଣୁ ଭୟରେ ସମ୍ପୂର୍ଣ୍ଣ ଦେଶରେ ଲଗ୍ଡାଉନ୍ ହୋଇଥିବାବେଳେ ବକ୍ସାଗୁଡା ଗ୍ରାମବାସୀ ଗ୍ରାମର ମୁଖ୍ୟ ପ୍ରବେଶ ପଥକୁ ବନ୍ଦ କରି ପହରା ଦେଉଛନ୍ତି ।
ଅତି ଜରୁରୀ କାର୍ଯ୍ୟ ଥିଲେ ବାହାରକୁ ଯିବା ସହ ଫେରିବା ବେଳକୁ ହାତକୁ ଭଲ ଭାବେ ଧୋଇବା ଏବଂ ବାହାରକୁ ଗଲାବେଳେ ମୁହଁକୁ ସମ୍ପୂର୍ଣ୍ଣ ମାସ୍କ ପିନ୍ଧି ଯିବେ ବୋଲି ସଚେତନ କରାଉଥିବା ଦେଖିବାକୁ ମିଳିଛି । ସେହିପରି ବାହାର ଗ୍ରାମର ଲୋକଙ୍କୁ ଗ୍ରାମ ଭିତରେ ପ୍ରବେଶକୁ ସମ୍ପୂର୍ଣ୍ଣ ବାରଣ କରାଯାଇଛି । ଦାଦନ ଶ୍ରମିକ ମାନେ ଏବେ ସମସ୍ତେ ଗାଁରେ ଫେରୁଥିବା ଦେଖି ଏଭଳି ନିଷ୍ପତ୍ତି ନେଇଛନ୍ତି ଗ୍ରାମବାସୀ । ଯେଉଁ ଶ୍ରମିକମାନେ ବାହାରୁ ଆସୁଛନ୍ତି ସେମାନଙ୍କୁ ପ୍ରଥମେ ଡାକ୍ତରଖାନାକୁ ଯାଇ ପରୀକ୍ଷା କରିବାକୁ ଏମାନେ କହୁଥିବା ଦେଖିବାକୁ ମିଳିଛି ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
