ନବରଙ୍ଗପୁର: ବିଦ୍ୟୁତ୍ ଖୁଣ୍ଟରେ ପିଟି ହୋଇ ଦୁଇ ବାଇକ ଆରୋହୀଙ୍କ ଶୋଚନୀୟ ମୃତ୍ୟୁ ହୋଇଛି । ନବରଙ୍ଗପୁର ଜିଲ୍ଲା ରାଇଘର ବ୍ଲକ ଟିମନପୁର ନିକଟରେ ଏଭଳି ଏକ ଘଟଣା ଦେଖିବାକୁ ମିଳିଛି । ମୃତକମାନେ ସ୍ଥାନୀୟ ଅଞ୍ଚଳର ଗୋବର୍ଦ୍ଧନ ଗଣ୍ଡ ଓ ଓମ୍ ପ୍ରସାଦ ଗଣ୍ଡ ବୋଲି ଜଣାପଡ଼ିଛି । ଦୁହେଁ କୌଣସି କାମରେ ବାହାରକୁ ଯାଉଥିବାବେଳେ ଦୁର୍ଘଟଣାର ଶିକାର ହୋଇଥିଲେ ।
ଗୋବର୍ଦ୍ଧନ ଗଣ୍ଡ ଓ ଓମ୍ ପ୍ରସାଦ ଗଣ୍ଡ କୌଣସି କାମରେ ଗୋଟିଏ ବାଇକରେ ଟିମନପୁରରୁ ବିନୟପୁରକୁ ଯାଉଥିଲେ। ତେବେ ଯିବା ବାଟରେ ଦ୍ରୁତ ଗତି ଯୋଗୁଁ ବାଇକଟି ଭାରସାମ୍ୟ ହରାଇ ରାସ୍ତାକଡ଼ରେ ଥିବା ଏକ ବିଦ୍ୟୁତ ଖୁଣ୍ଟରେ ପିଟି ହୋଇ ଯାଇଥିଲା । ଫଳରେ ଘଟଣାସ୍ଥଳରେ ଦୁଇଜଣଙ୍କର ମୃତ୍ୟୁ ହୋଇଛି ।
ଘଟଣାସ୍ଥଳରେ ରାଇଘର ପୋଲିସ ପହଞ୍ଚି ଏକ ଅପମୃତ୍ୟୁ ମାମଲା ରୁଜୁ କରିଛି । ଏହାସହ ମୃତଦେହ ଦୁଇଟିକୁ ଜବତ କରିବା ସହ ବ୍ୟବଚ୍ଛେଦ ପାଇଁ ପଠାଇଛି । ସେପଟେ ଗୋବର୍ଦ୍ଧନ ଗଣ୍ଡ ଓ ଓମ୍ ପ୍ରସାଦ ଗଣ୍ଡଙ୍କ ମୃତ୍ୟୁ ପରେ ଦୁଃଖରେ ଭାଙ୍ଗି ପଡ଼ିଛନ୍ତି ସେମାନଙ୍କ ପରିବାର।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
