ନବରଙ୍ଗପୁର: ପବିତ୍ର ଗୁରୁ ଶିଷ୍ୟ ସମ୍ପର୍କରେ ଲାଗିଲା କଳଙ୍କ । ଚତୁର୍ଥ ଶ୍ରେଣୀ ଛାତ୍ରୀଙ୍କୁ ପ୍ରଧାନ ଶିକ୍ଷକଙ୍କ ଅସଦାଚରଣ ନେଇ ଆସିଲା ସଙ୍ଗୀନ ଅଭିଯୋଗ । ପ୍ରଧାନ ଶିକ୍ଷକଙ୍କ ସମେତ ଅନ୍ୟ ଜଣେ ଶିକ୍ଷକଙ୍କ ନାଁରେ ଥାନାରେ ଏତଲା ଦେଇଛନ୍ତି ଛାତ୍ରୀଙ୍କ ବାପା । ଡ଼ାବୁଗାଁ ଥାନା ଅନ୍ତର୍ଗତ ନୂଆଗୁଡା ପ୍ରାଥମିକ ବିଦ୍ୟାଳୟରେ ଘଟିଛି ଏଭଳି ଘଟଣା ।
ଛାତ୍ରୀ ଜଣକ ପାଠ ଦେଖାଇବାକୁ ପ୍ରଧାନ ଶିକ୍ଷକ ପ୍ରତାପ ଚନ୍ଦ୍ର ପଟ୍ଟନାୟକଙ୍କ ପାଖକୁ ଯାଇଥିବା ବେଳେ ପ୍ରଧାନ ଶିକ୍ଷକ ଉକ୍ତ ଛାତ୍ରୀ ସହ ଅଶ୍ଳୀଳ ବ୍ୟବହାର କରିବା ସହ ଶାରିରୀକ ନିର୍ଯାତନା ଦେଇଥିଲେ । ଛାତ୍ରୀ ଜଣଙ୍କ କାନ୍ଦିବାରୁ ତାକୁ ୫ଟଙ୍କା ଦେଇ ଘଟଣା ବିଷୟରେ କାହାକୁ ନକିବାକୁ କହିଥିଲେ ଶିକ୍ଷକ ବୋଲି ଅଭିଯୋଗ ହୋଇଛି । ପରେ ଝିଅଟି ବିଦ୍ୟାଳୟ ନଆସିବାରୁ ଛାତ୍ରୀ ଘରକୁ ୫୦୦ଟଙ୍କା ମଧ୍ୟ ପଠେଇଥିଲେ ପ୍ରଧାନ ଶିକ୍ଷକ ।
ଏପଟେ ଝିଅର ବାପା ମାଲକାନଗିରି ଜିଲ୍ଲାରେ ଶ୍ରମିକ ଭାବେ କାମ କରନ୍ତି । ଆଜି ସେ ଗାଁକୁ ଫେରିବା ପରେ ଝିଅ ଠାରୁ ସମସ୍ତ ଘଟଣା ଶୁଣି ଡାବୁଗାଁ ଥାନାରେ ଅଭିଯୋଗ କରିଛନ୍ତି । ବିଦ୍ୟାଳୟର ପ୍ରଧାନ ଶିକ୍ଷକ ପ୍ରତାପ ଚନ୍ଦ୍ର ପଟ୍ଟନାୟକ ଏବଂ ଶିକ୍ଷକ ମନୋଜ ନାଏକ ପୂର୍ବରୁ ମଧ୍ୟ ଦୁଇଥର ଏଭଳି ବ୍ୟବହାର କରିଥିବା ନେଇ ସେ ଅଭିଯୋଗରେ ଉଲ୍ଲେଖ କରିଛନ୍ତି । ଅନ୍ୟପଟେ ଅଭିଯୋଗକୁ ପ୍ରଧାନ ଶିକ୍ଷକ ଖଣ୍ଡନ କରିଥିବାବେଳ ଡାବୁଗାଁ ଥାନା ଅଧିକାରୀ ଘଟଣାର ତଦନ୍ତ ଜାରି ରଖିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
