ନବରଙ୍ଗପୁର: ଜନ୍ମ କଲା ୨ ମାସର ଭାଲୁ ଛୁଆକୁ ଛାଡି ଚାଲିଗଲା ମା ଭାଲୁ । ଅସୁସ୍ଥ ଭାଲୁ ଛୁଆକୁ ଉଦ୍ଧାର କଲା ବନ ବିଭାଗ । ଜିଲ୍ଲାର ନନ୍ଦାହାଣ୍ଡି ବ୍ଲକ ଅନ୍ତର୍ଗତ ଖୁଣ୍ଟିଆ ଗ୍ରାମ ମୁଖ୍ୟ ରାସ୍ତାରେ ଥିବା କଲଭର୍ଟରୁ ଭାଲୁ ଛୁଆକୁ ଉଦ୍ଧାର କରି ଏକ ଅଜ୍ଞାତ ସ୍ଥାନକୁ ନେଇଯାଇଛି ବନବିଭାଗ ।
ସୂଚନାଅନୁଯାୟୀ ନନ୍ଦାହାଣ୍ଡି ବ୍ଲକ କାର୍ଯ୍ୟାଳୟ ସହ ନବରଙ୍ଗପୁର ମୁଖ୍ୟାଳୟ କୁ ସଂଯୋଗ କରୁଥିବା ରାସ୍ତାରେ ଥିବା କଲଭର୍ଟ ଭିତରେ ପ୍ରାୟ ଦୁଇ ମାସ ହେଲା ଏକ ମା ଭାଲୁ ଛୁଆ ଭାଲୁଟିକୁ ଜନ୍ମ ଦେଇଥିଲା । ଏବଂ ନିଜେ ଛୁଆ ସହ କଲଭର୍ଟ ଭିତରେ ରହିଥିଲା । ଏହା ଏକ ଜନଗହଳି ପୂର୍ଣ୍ଣ ସ୍ଥାନଥିବାରୁ ଅଘଟଣ ଏଡାଇବା ପାଇଁ ବନ ବିଭାଗ କର୍ମଚାରୀ ଦୀର୍ଘ ଦୁଇ ମାସ ଧରି ୨୪ ଘଣ୍ଟା ସୁରକ୍ଷା ଯୋଗାଇ ଆସୁଥିଲେ । ଭାଲୁ ଛୁଆ ବଡ଼ ହୋଇଯାଇଥିବାରୁ ତାକୁ ଅନ୍ୟତ୍ର ସ୍ଥାନାନ୍ତର କରିବା ପାଇଁ ଏକ ଯନ୍ତା ସାହାଯ୍ୟରେ ଉଦ୍ୟମ କରିଥିଲା ବନବିଭାଗ । ଛୁଆ ଭାଲୁ ବାହାରେ ବୁଲୁ ଥିବା ବେଳେ କଲଭର୍ଟ ଭିତରେ ମା ଭାଲୁ ଥିବା ସନ୍ଦେହ କରି ତାକୁ ଧରିବା ପାଇଁ ବନ ବିଭାଗ ଟିମ ଗତକାଲି କଲଭର୍ଟ ସମ୍ମୁଖରେ ଯନ୍ତା ପକାଇ ବସିଥିଲା । କିନ୍ତୁ ମା ଭାଲୁ ଯନ୍ତାକୁ ଆସିନଥିବା ବେଳେ ବାହାରେ ବୁଲୁ ଥିବା ଛୁଆ ଭାଲୁ କଲଭର୍ଟ ଭିତରକୁ ଯାଇଥିଲା ।
ତେବେ ରାତିସାରା ଅପେକ୍ଷା ପରେ ମଧ୍ୟ ଭାଲୁ ବାହାରକୁ ନ ବହାରିବାରୁ ଉଦ୍ଧାର କାରି ଟିମ୍ କଲଭର୍ଟ ଭିତରକୁ ପଶି ଥିଲା, କିନ୍ତୁ ଭିତରେ ମା ଭାଲୁ ନ ଥିବା ବେଳେ ଛୁଆ ଭାଲୁ ଶୋଇ ରହିଥିଲା । ଏହା ପରେ ଛୁଆ ଭାଲୁକୁ ସାଙ୍ଗରେ ନେଇଯାଇ ଏକ ଅଜ୍ଞାତ ସ୍ଥାନରେ ରଖି ତାକୁ ଖାଦ୍ୟ ଦେବାର ବ୍ୟବସ୍ଥା କରୁଛି । ତେବେ ଏବେ ମା ଭାଲୁର ଫେରିବା ଉପରେ ନଜର ରଖିଛି ବନ ବିଭାଗ । ଏନେଇ ବନ ବିଭାଗର ପ୍ରତିକ୍ରିୟା ମିଳିପାରିନାହିଁ ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
