ନବରଙ୍ଗପୁର: ଅଲୋଡା କନ୍ୟା ସନ୍ତାନ । ପୁଣି ସାମ୍ନାକୁ ଆସିଛି କନ୍ୟା ଭ୍ରୃଣ ହତ୍ୟା ଘଟଣା । ନବରଙ୍ଗପୁର ଜିଲ୍ଲାରେ ଚାଞ୍ଚଲ୍ୟ ସୃଷ୍ଟି କରିଛି ଏ ଘଟଣା । କିଛି ଦିନ ତଳେ ଜିଲ୍ଲା ଡାବୁଗାଁ ଅଞ୍ଚଳରେ ଏକ ଶିଶୁ ପୁତ୍ରକୁ ବୁଦାମୂଳେ ଫିଙ୍ଗି ଦିଆଯାଇଥିଲା । ତାର କିଛି ଦିନ ପରେ ପାପଡାହାଣ୍ଡି ବ୍ଲକର ପାଣିରେ ଭାସୁଥିଲା ଏକ ନବଜନ୍ମିତ ଶିଶୁର ମୃତଦେହ l ଆଉ ଆଜି ନବରଙ୍ଗପୁର ସହର ଜିଲ୍ଲାପାଳଙ୍କ ଅଫିସ ଠାରୁ ମାତ୍ର 100 ମିଟର ଦୂରରେ ଏକ ନବଜାତକ କନ୍ୟାସନ୍ତାନର ମୃତଦେହ ଉଦ୍ଧାର ହୋଇଛି । ସ୍ଥାନୀୟ ଲୋକ ଏନେଇ ପୋଲିସକୁ ଖବର ଦେଇଛନ୍ତି ।
ଡ୍ରିମ କଲୋନୀ ପାଖ ପରିତ୍ୟକ୍ତ ସ୍ଥାନରେ ଏକ କନ୍ୟା ସନ୍ତାନର ମୃତଦେହ ପଡିଛି । କେଉଁ ପରିସ୍ଥିତିରେ ଏଭଳି ଅମାନବୀୟ କାର୍ଯ୍ୟ କରୁଛନ୍ତି ତାହାକୁ ନେଇ ଏବେ ବଡ଼ ପ୍ରଶ୍ନ । କନ୍ୟା ସନ୍ତାନ ହେବା ଜାଣିବା ପରେ କେହି ଏଭଳି ଅମାନୁଷିକ କାର୍ଯ୍ୟ କରିଛନ୍ତି ବୋଲି ଅନୁମାନ କରାଯାଉଛି l
ନିକଟସ୍ଥ ଅଞ୍ଚଳର କିଛି ମହିଳା କନ୍ୟାସନ୍ତାନର ମୃତଦେହ ପଡିଥିବାର ଦେଖି ସ୍ଥାନୀୟ ପୋଲିସକୁ ଖବର ଦେଇଥିଲେ । ପୁଣି କନ୍ୟା ସନ୍ତାନଟିଏ ଏପରି ଅବସ୍ଥାରେ ପଡି ରହିଥିବା ବେଳେ କେବେ ଓ କେଉଁ ପରିସ୍ଥିତିରେ ଏହା ହୋଇଛି ତାହା ପୋଲିସ ତଦନ୍ତ ପରେ ହିଁ ପ୍ରକୃତ ତଥ୍ୟ ସାମ୍ନାକୁ ଆସିବ ।
ଇଟିଭି ଭାରତ, ନବରଙ୍ଗପୁର
