ନବରଙ୍ଗପୁର: ଜିଲ୍ଲାରେ ଦେଖିବାକୁ ମିଳିଛି ଦାଦନ ଶ୍ରମିକର କରୁଣ କାହାଣୀ । ତାମିଲନାଡୁରୁ ନିଜ ଭିଟାମାଟିକୁ ଆସି ପାରୁନାହିଁ ଶ୍ରମିକର ମୃତଦେହ । ଏପରି ଘଟଣା ଦେଖିବାକୁ ମିଳିଛି ନବରଙ୍ଗପୁର ଜିଲ୍ଲା ପାପଡାହାଣ୍ଡି ବ୍ଲକ ପାତ୍ରୀ ପଞ୍ଚାୟତ ଅନ୍ତର୍ଗତ ଖୋଲିଗୁଡା ଗାଁରେ । ଶ୍ରମିକଙ୍କ ମୃତଦେହ ଫେରାଇ ଆଣିବାକୁ ଜିଲ୍ଲା ପ୍ରଶାସନର ଦ୍ବାରସ୍ଥ ହୋଇଛନ୍ତି ମୃତ ଶ୍ରମିକଙ୍କ ପରିବାର ।
ସୂଚନାଅନୁସାରେ, ଖୋଲିଗୁଡା ଗାଁର ଦୀପ୍ତି ପ୍ରକାଶ ରୂପଚାନ୍ଦଙ୍କ ପୁଅ ଉରିଅ ରୂପଚାନ୍ଦ (27) କାମ ଧନ୍ଦା ଅଭାବରୁ ପରିବାରର ଭରଣ ପୋଷଣ ପାଇଁ ଦୁଇ ମାସ ତଳେ ତାମିଲନାଡୁର ଏସ.ସି.ଏମ ଗାର୍ମେଣ୍ଟସ ପ୍ରାଇଭେଟ ଲିମିଟେଡ଼ ନାମକ ଏକ କପଡା କମ୍ପାନୀରେ କାମ କରୁଥିଲେ । ଗତକାଲି ଉରିଅ ରୂପଚାନ୍ଦଙ୍କ ଏକ ସଡକ ଦୁର୍ଘଟଣାରେ ମୃତ୍ୟୁ ହୋଇଛି । ତାମିଲନାଡୁରୁ ତାଙ୍କ ମୃତଦେହ ଆଣିବା ଉରିଆଙ୍କ ପରିବାର ପକ୍ଷେ ଅସମ୍ଭବ ହୋଇଛି । ଏ ନେଇ ଜିଲ୍ଲାପାଳ ଓ ଜିଲ୍ଲା ଶ୍ରମ ବିଭାଗ ଅଧିକାରୀଙ୍କ ଦ୍ବାରସ୍ଥ ହୋଇଛନ୍ତି ଉରିଆଙ୍କ ପରିବାର । ଉରିଆଙ୍କର ଏକ ୬ ବର୍ଷର ଝିଅ ଓ ୩ ବର୍ଷର ପୁଅ ଅଛି ।
ପରିବାରର ନିବେଦନ ଶୁଣିବା ପରେ ଜିଲ୍ଲା ପ୍ରଶାସନ ପକ୍ଷରୁ ଦାଦନ ଶ୍ରମିକ କାମ କରୁଥିବା ସମ୍ପୃକ୍ତ କପଡା କମ୍ପାନୀ ଓ ସ୍ଥାନୀୟ ପୋଲିସ ସହ ଯୋଗାଯୋଗ ଆରମ୍ଭ କରିଛି । ଏଥି ସହ ମୃତ ଦାଦନ ଶ୍ରମିକ ଉରିଅ ସହ କାମ କରୁଥିବା ଗାଁର ଅନ୍ୟ ଶ୍ରମିକଙ୍କ ସହ ମଧ୍ୟ ନବରଙ୍ଗପୁର ଜିଲ୍ଲା ଶ୍ରମ ଅଧିକାରୀ ଯୋଗାଯୋଗ କରିଛନ୍ତି । ମୃତଦେହ ବ୍ୟବଚ୍ଛେଦ ହେବା ପରେ ଶ୍ରମିକର ମୃତଦେହଟି କିପରି ନବରଙ୍ଗପୁରରେ ପହଞ୍ଚିବ ସେ ନେଇ ସଂପୃକ୍ତ କମ୍ପାନୀ ସହିତ କଥାବର୍ତ୍ତା କରିଛି । ଏହା ସହିତ ସରକାରୀ ନିୟମ ଅନୁସାରେ ଯାହା ଆର୍ଥିକ ସହାୟତା ମିଳିବାର ଅଛି ତାଙ୍କୁ ଯୋଗାଇ ଦିଆଯିବ ବୋଲି କହିଛନ୍ତି ଜିଲ୍ଲା ଶ୍ରମ ଅଧିକାରୀ ।
ନବରଙ୍ଗପୁରରୁ ତପନ କୁମାର ବିଷୋୟୀ,ଇଟିଭି ଭାରତ
