ନବରଙ୍ଗପୁର: ଜରାଜୀର୍ଣ୍ଣ ଅବସ୍ଥାରେ ପଡିରହିଛି ବିଷାଗୁଡ଼ା ଗ୍ରାମର ଅଙ୍ଗନବାଡି ଗୃହ । ଦୀର୍ଘ ଦିନ ହେବ ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ବ୍ଲକ ଅନ୍ତର୍ଗତ ପୂଜାରୀଗୁଡା ପଞ୍ଚାୟତର ବିଷାଗୁଡ଼ା ଗ୍ରାମର ଅଙ୍ଗନବାଡି ଗୃହ ଭଙ୍ଗା ଯିବା ଘଟଣାକୁ ନେଇ ବିବାଦ ଲାଗି ରହିଛି। ତେଣୁ ଏହି ଘଟଣାକୁ ନେଇ ଗୁରୁବାର ତଦନ୍ତ ପାଇଁ ବିଷାଗୁଡ଼ା ଗ୍ରାମରେ ନବରଙ୍ଗପୁର ଜିଲ୍ଲା ପ୍ରକଳ୍ପ ନିର୍ଦ୍ଦେଶକ ରମାକାନ୍ତ ନାୟକ ପହଞ୍ଚିଥିଲେ ।
ସୂଚନା ଅନୁୟାୟୀ, ଦୀର୍ଘ ବର୍ଷ ଧରି ଜରାଜୀର୍ଣ୍ଣ ଓ ବିପଦ ସଙ୍କେତ ଅବସ୍ଥାରେ ପଡ଼ି ରହିଥିବା ବିଷାଗୁଡ଼ା ଗ୍ରାମର ଅଙ୍ଗନବାଡି ଗୃହରେ ପିଲାମାନେ ବସିବା ପାଇଁ ଯାଗା ନଥିଲା ବେଳେ ସେମାନଙ୍କ ପାଠ ପଢା ପ୍ରଭାବିତ ହେଉଛି । ଯାହା ଫଳରେ କୁନି କୁନି ପିଲାମାନଙ୍କ ପ୍ରାକ ଶିକ୍ଷାରେବାଧା ସୃଷ୍ଟି ହେଉଛି ।
ଏପଟେ ଗୃହ ଭୁଶୁଡ଼ି ପଡ଼ିବା ଆଶଙ୍କା ଥିବାରୁ ଅଙ୍ଗନବାଡି ଦିଦି ବାଧ୍ୟ ହେଇ ତାଙ୍କ ପାଚିକାଙ୍କ ଘରେ ପିଲାମାନଙ୍କୁ ନେଇ ପାଠ ପଢ଼ାଉଥିଲେ । ଏବେ କିଛି ଦିନ ହବ ଆମ ଗାଁ ଆମ ବିକାଶ ଗୋଷ୍ଠୀ ଉନ୍ନୟନ କେନ୍ଦ୍ରରେ ଶିକ୍ଷା ଦାନ ଚାଲିଛି।
ଏହି ସମସ୍ୟା ନେଇ ଗ୍ରାମବାସୀ ୨୦୧୬ ମସିହାରୁ ବ୍ଲକ ପ୍ରଶାସନକୁ ବାରମ୍ବାର ଅଭିଯୋଗ କରି ଆସୁଛନ୍ତି । ତେବେ ବ୍ଲକ ପ୍ରଶାସନ ମଧ୍ୟ ତୁରନ୍ତ ପଦକ୍ଷେପ ନେଇ ନୂତନ ଅଙ୍ଗନବାଡି ଗୃହ ନିର୍ମାଣ କରିବାକୁ ଗ୍ରାମବାସୀଙ୍କୁ ପ୍ରତିଶୃତି ଦେଇଛନ୍ତି।
ତେବେ ଶିଶୁ ମାନଙ୍କ ଅଙ୍ଗନବାଡ଼ି ଶିକ୍ଷା କେଉଁଠାରେ ଚାଲିଛି ? ଏହି ଘଟଣାର ସତ୍ୟତା ଜାଣିବାକୁ ତଦନ୍ତ ପାଇଁ ଗୁରୁବାର ବିଷାଗୁଡ଼ା ଗ୍ରାମରେ ପହଞ୍ଚିଥିଲେ ଜିଲ୍ଲା ପ୍ରକଳ୍ପ ନିର୍ଦ୍ଦେଶକ ରମାକାନ୍ତ ନାୟକ।
ତେବେ ଏହି ଘଟଣା ସମ୍ପର୍କରେ ଇଟିଭି ଭାରତ ପ୍ରତିନିଧି ପିଡିଙ୍କୁ ପଚାରିବାକୁ ଚେଷ୍ଟା କରିଥିଲେ ମଧ୍ୟ ସେ ଏନେଇ କିଛି କହିନଥିଲେ।
ନବରଙ୍ଗପୁରରୁ ତପନ ବିଷୋୟୀ, ଇଟିଭି ଭାରତ
