ନବରଙ୍ଗପୁର: ମହାନତା ଦେଖାଇଲେ ବିଡିଓ(BDO) । ଟାଣ ଖରାରେ ମୁଣ୍ଡ ବୁଲାଇ ରାସ୍ତାକଡରେ ପଡିଥିବା ବୟୋଜ୍ୟଷ୍ଠ ବ୍ୟକ୍ତିଙ୍କୁ ସାହାଯ୍ୟ କଲେ ବ୍ଲକ ଉନ୍ନୟନ ଅଫିସର । ବୁଧବାର ତେନ୍ତୁଳିଖୁଣ୍ଟି ବିଡିଓ ଦୁର୍ଯ୍ୟୋଧନ ଭୋଇ ନିର୍ମାଣଧୀନ 5T ସ୍କୁଲର ତଦାରଖ କରି ବ୍ଲକ କାର୍ଯ୍ୟାଳୟକୁ ଫେରୁଥିଲେ । ଏହି ସମୟରେ ଜଣେ ସାଇକେଲ ଚାଳକ ଭାରସାମ୍ୟ ହରାଇ ରାସ୍ତାକଡରେ ପଡି ରହିଥିବାର ଦେଖିଥିଲେ । ଏହା ଦେଖିବା ମାତ୍ରେ ସେ ତୁରନ୍ତ ତାଙ୍କୁ ସାହାଯ୍ୟ କରିଥିଲେ ।
ଟାଣ ଖରା ଯୋଗୁଁ ସମ୍ପୃକ୍ତ ବ୍ୟକ୍ତି ଜଣକ ମୁଣ୍ଡ ବୁଲାଇ ପଡି ଯାଇଥିଲେ । ରାସ୍ତାକଡରେ ଲୋକଟି ପଡିଥିବାର ଦେଖି ବିଡିଓ ତାଙ୍କ ମୁଣ୍ଡ ଓ ମୁହଁରେ ପାଣି ମାରି ନିଜେ ରଖିଥିବା ଗ୍ଲୁକଜ ପାଣି ପିଆଇ ଥିଲେ ଏବଂ ଘରକୁ ପଠେଇବାର ବ୍ୟବସ୍ଥା କରିଥିଲେ l ଏଭଳି ମାନବିକତା ପାଇଁ ତେନ୍ତୁଳିଖୁଣ୍ଟି ବିଡିଓ ଏବଂ ସାଥି କର୍ମଚାରୀ ନାଗାର୍ଜୁନଙ୍କୁ ଅଞ୍ଚଳବାସୀ ଭୂରି ଭୂରି ପ୍ରସଂଶା କରୁଛନ୍ତି । ଆଜିକାଲି ସମାଜରେ ମାନବିକତା ହଜି ଯାଉଥିବା ବେଳେ ତେନ୍ତୁଳିଖୁଣ୍ଟି ବିଡିଓଙ୍କ ଏପରି ମହାନତା ବାସ୍ତବରେ ପ୍ରଶଂସନୀୟ ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
