ନବରଙ୍ଗପୁର: ଜିଲ୍ଲା ରାଇଘର ବ୍ଲକ୍ ଜୋଡିଙ୍ଗା ଗ୍ରାମ ପଞ୍ଚାୟତ ଅନ୍ତର୍ଗତ ନୂଆଗାଁ ଗ୍ରାମ ନିକଟ ୪୦ ନମ୍ବର ରାଜ୍ୟ ରାଜପଥ କଡରେ ବହୁ ସଂଖ୍ୟାରେ ମାଓ ପୋଷ୍ଟର ଓ ବ୍ୟାନର । ମାଓ ସଙ୍ଗଠନର ମୃତ ମାଓବାଦୀଙ୍କ ପାଇଁ ସହିଦ ସପ୍ତାହ ପାଳନ, ସବୁଜ ଜଙ୍ଗଲ ନ କାଟିବା ଏବଂ ସହିଦ ମାଓବାଦୀଙ୍କ ପାଇଁ ସ୍ମାରକ ସଭା କରିବାକୁ ବ୍ୟାନର ଓ ପୋଷ୍ଟର ମାଧ୍ୟମରେ ଲୋକଙ୍କୁ ଆହ୍ବାନ କରିଛି ମାଓ ସଙ୍ଗଠନ ।
ନବରଙ୍ଗପୁରରେ ମାଓ ପୋଷ୍ଟର ଓ ବ୍ୟାନର
ମେନପୁର ନୂଆପଡା ଡିଭିଜନ କମିଟି ପକ୍ଷରୁ ଲଗାଯାଇଥିବା ଏହି ପୋଷ୍ଟର ଓ ବ୍ୟାନର ଗୁଡିକ ରାସ୍ତା କଡରେ ଲାଗିଥିବାରୁ ସ୍ଥାନୀୟ ଲୋକେ ଭୟଭୀତ ହୋଇ ଉକ୍ତ ରାସ୍ତା ଦେଇ ଯାତାୟତ କରୁ ନଥିବାବେଳେ ରାଇଘର ପୋଲିସ କୁନ୍ଦେଇ ବିଏସଏଫ୍ ଯବାନଙ୍କ ସହଯୋଗରେ ଉକ୍ତ ପୋଷ୍ଟର ଓ ବ୍ୟାନର ଗୁଡିକୁ କାଢିଥିବା ସୂଚନା ମିଳିଛି । ସେପଟେ ଜିଲ୍ଲାର ରାଇଘର ଅଂଚଳରେ ପୂର୍ବରୁ ମଧ୍ୟ ମାଓବାଦୀମାନେ ଏଭଳି ପୋଷ୍ଟର ଓ ବ୍ୟାନର ଲଗାଇବା ସହ ଟିଫିନ ବୋମା ଲଗାଇ ନିଜ ସ୍ଥିତି ଜାହିର କରି ସାରିଛନ୍ତି ।
ନବରଙ୍ଗପୁରରୁ ତପନ କୁମାର ବିଷୋୟୀ, ଇଟିଭି ଭାରତ
